![](/upload/iblock/bc1/bc1cebcefaae3ea445c18fe51b847edd.jpg)
Хориин 11 эсэгын үри hа- даhадай түбхинэн һуудаг минии тоонто Хори. Уран шүлэгшэ Базар ЦЫБИКОВЭЙ нютаг тухайгаа бэшэhэн шүлэг сооһоо эдэ мүрнүүдые дурдамаар:
Эхэ нютаг, Хоримни,
Элдин дайдынш хүрьһэн соо
Элинсэг хулинсагайм яһан бии,
Эртынш сагай домог бии.
Зүб даа. Минии уг изагуурай һуудаг Булам нютаг ошоходоо, эжымни Анаа үртөө тухай hонин юумэ хөөрэдэг. Эндэ үни хада Үртөө- станци байгуулһан. Анаагай үртөөдэ улаа шэрэжэ ябаhан зон мориёо амаруулдаг, hэлгэдэг байhан. Улаагай харгыгаар гүрэнэй гэмтэдые урагша хойшонь туухадаа, үндэр шүргэтэй хашаа соохи этапай гэр соо хонуулдаг, эдеэлүүлдэг байhан ха. Эндэ hүүлшын тайшаа Эрдэни Вамбацыренов ажаhуудаг байгаа. Энэ өөрөө ород яhанай хүн байhан аад, буряад нэрэтэй болоhониинь тон hонин. Баян ноён Вaмбацыренэй (тэрэ үхибүүгүй байгаа) намаржаанда зөөжэ ерэн гэhээнь, мансытай нарай үхибүүн дулаахан гуламтын хажууда унтажа хэбтэбэ. Тэрэ ноён тон ехээр баярлажа: «Эрдэни олооб!» - гэжэ хэлэhэн гэдэг. Тэрэ олзо хүбүүгээ Эрдэни гэжэ нэрлэhэн, hайн hайханаар үргэжэ, эрын ээмдэ хүргэhэн юм. Эрдэни үргэhэн эсэгынгээ нэрэ нэрлүүлhэн: Хориин тайшаа боложо, арад зондоо аша туһа хүргэhэн гээшэ.
Замаа үргэлжэлүүлхэдээ, нарһан ой соогуур ябаад, Ониноборск (буряадаар «Хүтэл нуур») гэжэ ород hууринай хажуугаар гарахаш. Юрэдөө, урдандаа энэ ой соогуур ашаанай юумэ, хүнүүдые шэрэхэ гээшэ ехэ аюултай байгаа. Энэ нарһан тужа соо хоргодоһон дээрмэшэд харгын зониие тоножо, баяжаhан гэдэг. Сүлэлгэhөө тэрьелhэн хаатаршанууд Кухтерин, Березовский, Серебряков, Банщиков г.м. зөөритэй болоод, эндэ гэр барижа hуурижаhан түүхэтэй. Иигэжэ эндэ ород hуурин бии болоhон. Ониноборск манай Булам нютагай хойно оршодог. Булам, Ашанга, Амгаланта нютагууд харгын хажуу тээ байдаг. Буряадууд харгыһаа холо hуурижадаг байгаа гэжэ мэдэхээр. Тэдэнэй тонуулшад, дээрмэшэдhээ айжа, харгыһаа холуур түбхинэдэг байhаниинь ойлгосотой.
Элдин дайдымнай хүрьhэн соо элинсэг хулинсагаймнай яhан, эртын сагайшье домог байха. Хэдэн жэлэй туршада кружогто хабаадахадаа, хизаар ороноо шэнжэлэлгын хүдэлмэри ябуулдаг байгаабди. Намайе Улаагай харгын, харгын хажуугаархи hууринуудай, Булган талын түүхэ ехэтэ hонирхуулаа.
Булган сагаан тала
Хэр yгhaa хойшо Булган сагаан тала гэжэ алдаршаhан домогто hайхан тала Хори буряадай зүрхэ сэдьхэлдэ хододоо дүтөөр hанагдаха. Нюдэ алдама энэ талын үргэн тэгшэ нюруу хүхэ номин тэнгэритэй үнгөө буляалдан байдаг юм. Булган тала гэжэ нэрэтэй болоhон тухай hонирхожо, Амгаланта нютагайнгаа үбгэд, хүгшэдhөө hурагшалhамнай, тайлбарилжа үгэбэ. Дашанимаева Цырмагай хүгшэн эжынь иигэжэ хөөрэhэн байна: «Нютагай нэрэтэй түрэтэй баян хүн басагаяа хүргэжэ ябаhаар, энэ талада булган малгайгаа гээhэн юм. Тиигэжэ энэ тала Булган тала гэжэ нэрэтэй болоhон байна».
Үнгэрэгшэ зүүн жэлэй үедэ түмэр харгын баригдаагүй байхада, энэ харгыгаар «гүрэнэй гэмтэдые» зүүлжэнь, баруулжань туудаг харгы байhан юм. Московско трактые мүн Шэтын тракт гэжэ нэрлэдэг. Булган таламнай Шэтэ Улаан-Үдэ хоёр хотын хоорондохи тэн гэжэ тоологдодог.
180 жэлэй саана декабристнуудые Шэтэhээ Петровско заводой шэнэ түрмэдэ (хаанай баталhан проектээр баригдаhан байгаа) туужа абаашаhан юм. Шэтын хамбын харгы уйдхар, гашуудал түрүүлhэн үйлэ хэрэгүүдыешье үзэhэн. Элинсэг хулинсагууднай хаатаршануудай түмэр гэнжэеэ ханхинуулан, энэ харгыгаар туулгажа ябахыень харадаг байhан байха.
Н.Бестужевай бэшэhэн «Шэтэhээ Петровско завод хүрэтэр аян замда ябаhан манай үдэр бүриин тэмдэглэл» гээшэдэ хандая: «... 1830 ондо Шэтэhээ Петровскын завод ошоходоо, Яруунын дайдаhаа гаража, Хориин үргэн ая гангаар анхилhан газараар 22 модо ябажа, 10 үрхэтэ айлтай Грядецкэ деревнидэ амараад, баруулжаа 26 модо ябажа, 14 үрхэтэ айлтай Онинский Бор деревнидэ хонолгодо тогтообди... Эндэл нэгэ гайхалтай ушар болоо. Ониноборскын хажууда баронесса Розен үбгэнтэеэ уулзашаhан юм. Энэ уулзалга бултанай зүрхэ сэдьхэл хүдэлгэhэн, баярлуулhан байна». Энэ уулзалга тухай «Записки княгини Н.Н. Волконской» гэhэн ном coohoo уншабаб.
Ашангын урда Шэбээтэ гэжэ ород hуурин байһан. Г-Ц. Ешиева «Ашанга» гэжэ ном соогоо эндэ үни хада үртөө-станци байhан гэжэ бэшэнэ: үндэр шүргэ хорёотой, хүнэй толгойн багтахагүй онигор сонхотой, бүдүүн модоор бариhан түрмэ - хаатаршангуудай хонолгын гэр Шэбээтэдэ байһан. Ашангын буряадууд тэрэниие ятаабай гэр гэлсэдэг байhан ха. Тэрэ гэрэй hууриин модон Шэбээтын деревниин зүүн захада хожом болотор байhан гэлсэдэг.
Росси дотор 20-ёод онуудаар граждан дайн эхилжэ, хүндэ хүшэр сагай ерэhэн тухай булта мэдэнэбди. Харин энэ үедэ манай нютагта ямар үйлэ хэрэгүүд болооб гэжэ хөөрэхэ хүсэлтэйб. «Буряад үнэн» сониной хуудаhанда толилогдоhон «Революциин hүүлээр Хоридо» гэжэ Ц.Эрдынеевэй статья coohoo граждан дайнай хүлгөөтэ үе тухай уншанабди:
«Сибирьтэ бута сохигдоод, 1920 оной февралиин hүүл багта Верхнеудинскhаа Шэтэ руу түрюулhэн генерал Каппелиин гурбан мянган морин сэрэгшэдые нэгэдүүлhэн частьнууд Шэтын трактаар гал дүлэтэ мүр гаргажа үнгэрөө юм. Үнэгэтэйн, Дээдэ-Тайлсын партизанска отрядууд сагаантаниие Устье, Заха-Шэбэр, Карбаиновка тосхонуудта буудалгаар угтаба. Үсөөншье, буу зэбсэгэршье ядуу партизанууд һайнаар зэбсэгжүүлэгдэһэн сэрэгүүдтэ мүртэй эсэргүүсэжэ шадаагүй.
Түрэһэн нютагаймнай газар дээрэ 95 жэлэй саана болоһон энэ һүрөөтэ үе тухай хүнүүдэй хөөрөөн ехэ һонирхомоор. Каппелевцүүд замдаа дайралдаһан зониие дээрмэдэжэ, ехэ хохидол үзүүлээ гэдэг. Гол голоороо, бэе бэеhээ холо һууһан юрын малшад тон ехэ бэрхэшээлдэ ороһон байгаа. Харагдаа, үзэгдөөгүй һүрөөтэй сэрэгшэдэй тонуул дээрмэ хэhэн тухайнь тэрэ үедэ залуу ябаһан багшымнай нагаса эжы – Эрдынеева Надмид хүгшэн хөөрэһэн байна: «Буутай шуутай сэрэгэйхид гүйлдэжэ ерээд, дүтэ тойрон байhан адуу мал буудажа алаад, юумыень hэнэгшэлжэ абаад, арилшадаг байгаа. Бэрхэшээлдэ ороһон Мэгжын Үбэрэйхид өөhэдынгөө, мүн Цэбэг баянайнгаа олон тоото хони мал туужа, Мэгжынгээ ой руу тэрьедээ hэмди. Цэбэг баянаймнай адуу мал хүлгөөнhөө жэгшээ юм гү, али яагаа юм, ой соо байжа үгэнгүй, үхэр малынь мөөрэлдэhөөр, шууялдаhаар, ой сооһоо тэрьелжэ, бууса руугаа буушоо hэн. Тиигээд лэ олонхи малынь сэрэг суурай хүнэhэн болоо hэн даа.
Ой руу тэрьедэхэ аргагүй хадаа, буусадаа хадам эхэ хоёртой һама гэжэ аша басагантаяа үлөө hэн. Һүүлдэнь эжымни тон ехээр сэрэгэйхидhээ айhанаа хөөрөөл даа. Моритой, буу зэбсэгтэй ородууд ороод лэ, гэр соомнай ханза, үхэг уудалжа, онгилжо эхилбэ ха. Тиигэжэ байтараа, басаганайм арбагар хүдэhэн дэгэл оложорхёод, урбуулжа, эрьюулжэ байгаад хаража оробо. Нэгэшье үгэ ородоор мэдэхэгүй эжы өөрынгөө басага руу заажа: «Бидэ хоёр лэ байнабди, бидэ хоёрhоо бэшэ юумэн үгы», - гэхэhээ бэшэ юумэ мэдэбэгүй. Тэдэ тэрэ дэгэлыень шэдэжэрхёод, бэшэ мүртэй юумэшье олонгүй, ошоhон байгаа ха. Теэд үгытэй байhан зондо юун тиигэтэрээ байхаб даа. Байгаа болоhон юумээ нюутаа, далдалаа болоо hаабзабди даа.
Дайсадта ганса эдихэ хоол хэрэгтэй бэшэ, мүн унаагай мори тэргэ, боожошон хэрэгтэй hэн. Юундэб гэхэдэ, зугадажа, тэрьедэжэ ябаhан каппелевцүүдэй байдал тон бирагүй болоhон байгаа: тэдэнэй олонхидынь шархатанхай, элүүр зониинь халдабаритай халуун үбшэндэ (тифтэ) дайрагдажа, үхэжэ эхилээ hэн.
Нютагай зарим эрэшүүлые мори тэргэтэйнь буу шуугаар туужа, Булагай сэлеэн абаашаа ха. Нэгэ хэды сагай үнгэрhэн хойно өөрынгөө бэрхээр тэрьедэжэ ерэhэн уршагта ябадалаа гэртэхиндээ хөөрэһэниинь лабтай. Каппелевцүүд хүсөөрөө туужа асарһан буряадуудые нэгэ гэртэ оруулаад, халуун үбшөөр үбдэжэ, дэмыржэ, шала дээрэ хэбтэhэн хүнүүдтэ эм дом шудхахыень баадхаа ха. Яахашье аргагүй болоhон зон гэншэжэ, ёоложо, мэдээгээ табяад, hүхиржэшье хэбтэhэн хүнүүдтэ буугай хүрзөөр занажа ябаад, эм шуудхаа ха. Нэгэ газартаа удаан тогтохо аргагүй болоhон дайсад тэдэл буряадуудай тэргэ дээрэ шархатаhан, үбшэлhэн зоноо шэрээд, зүүлжээ ябаа һэн. Дайсад ябаhан газар нютагуудаа ганса тоноод үнгэрдэг бэшэ, харин халуун үбшэ халдаажа, ехэ тодхор татаһан байха. Буряадууд каппелевцүүдэй тарааһан тахал үбшэнhөө наһа дүүрэhэн хүнүүдээ «хааплитажа» үхөө гэлсэдэг байгаа.
Иигэжэ амгалан һууһан буряадуудта гай тодхор, үбшэ тахал асарһан дайсадые Улаан Армиин сэрэгшэд hүнөөhэн. Тиигэжэ манай нютагта амгалан hайхан байдал тогтоо бэлэй. Мүнөө үедэ хубиин ажалтай болоhон нютагаархидаймнай hүрэг малнууд эндэ-тэндэ Булган талаар, хада гүбөөгөөр бэлшэжэ ябадаг. Түрүүн үргэлжэ ургажа һуудаг таряанай полинууд хооһороо. Тиибэшье Булган сагаан таламнай манай сэдьхэлдэ дулааханаар hанагдажал байдаг. Энэ талада үдэжэ тэнжэhэн бидэнэр түүхэеэ мартангүй, үehөө үедэ дамжуулан ябахабди.
Угаймни омогорхол
Минии үбгэн абын эсэгэ Гомбоев Базар-Сада Тогмитович дайнай ба ажалай ветеран. 1925 ондо Ашанга нютагай Сагаан Хүндыдэ түрэhэн. Хара эрьеын эхин hургуулида 8-тайhаа hуража эхилээ hэн. 11-тэйдээ абаяа гээжэ, Жамса, Дамба, Дондок аханартаяа, Пэлжэд, Жэбзэма, Дулмажаб эгэшэнэртэеэ элдэб ажал хэжэ үндыhэн. Долгоржаб дүүгээ дахуулжа, харалсажа ябадаг hэн.
1939 ондо Нарин-Горхондо таряа хуряалгын ажалда хүдэлжэ эхилээ. Агууехэ дайн эхилжэ, 1943 ондо 18-тайхан залуу хүбүүн военкомадhаа повесткэ абажа, сэрэгэй албанда мордоо hэн. 2-дохи Украинска фронтын 173-дахи стрелково полкын сэрэгшэдтэй дүлэтэ харгыгаар ябажа гараа.
Польшын Бунулау хото шадар 1945 оной февральда айхабтар шанга байлдаанда хабаадалсажа, “Шэн зоригой түлөө” гэhэн медаляар шагнагдаа hэн. Энэ медаляа абажа үрдингүй, март һарын эхеэр Граньскада болоhон байлдаанда хүндөөр шархатаһан. «Госпитальдо майн 9-нэй Илалтын үдэр угтааб», - гэжэ хөөрөө hэн. Дайнай hүүлээр Белград дээрэ запасной полкдо зенитчигээр, hүүлдэнь Торна дээрэ авиационно частиин харуулда албаяа үргэлжэлүүлээ.
1947 ондо армиhаа табигдажа, гэртээ бусажа ерээд, хүдөөгэйнгөө хара ажалда хам оролсожо, хүй- тэниие хүйтэн гэнгүй, 38 жэлдэ таhалга яагүй хүдэлжэ, наhанайнгаа амаралтада гараа.
1945 ондо фронтдо шагнагдаhан «Шэн зоригой түлөө» гэһэн дайшалхы медаль дүшэ гаран жэл үнгэрhэн хойно СССР-эй президент М.С.Горбачёвой гараа табиhан үнэмшэлгэтэйгээр ерэжэ, булта гэр бүлөөрөө баярлаа hэмди.
Минии үбгэн абын эжы, ветеран, Гомбоева Даша-Дулма дайнай үедэ тpaктop агтa жолоодоhон. Гэр бүлэ боложо, 5 хүбүү, 2 басага үндылгэжэ, hургажа, ажалаа дааха хүнүүд болгожо түбхинүүлээ.
2000 ондо, минии 4-тэй болохоо байхадамни, хайрата үбгэн абам наһа бараа. Дайнай ба ажалай ветерануудай Эсэгэ ороноо хамгаалжа, hүрөөтэй тулалдаанууд соогуур гараhыень, хэhэн хэрэг ажалыень, нютагаархид, бү мартая!
Юлия ГОМБОЕВА, 8 «а» классай hурагша байхадаа бэшээ.
Хүтэлбэрилэгшэ: Ксения Нимаевна ГАРМАЕВА, буряад хэлэнэй дээдэ категориин багша, Буряад Республикын габьяата багша.