![](/upload/iblock/2f8/2f8640b20a82278f270891928c382d7a.jpg)
Иимэ нэрэтэй барилдаанай һургуули тухай (ородоор “Стиль Небесного Боевого волка”) ном нара хараа. Бидэ, буряад-монголшууд, һаял түүхэеэ нээжэ, уряа урданайнгаа соёл, дайшалхы арга шадабарияа мүнөө үедэ ойлгохо сагнай ерээл даа гэжэ Николай Вячеславович Абаев Цыбик Черип-Цынгеевич Хобраков хоёр түрэл арадтаа ойлгуулхаяа оролдобо гээшэ. Энэ үүсхэлыень манай “Буряад үнэн” ехэтэ дэмжэжэ, хуушаниие уудалжа, мүнөөнэйхидэ гаргагша эрхим сэтгүүлшэдэй нэгэн Степан Очировай һанамжые уншагшадайнгаа һонорто толилбобди.
Тус ном соо буряад-монголой “Шонын-баша” – Стиль Небесного волка” гэһэн буряад-монгол һургуулиин этногенетическэ, культурологическа, шажан мүргэлэй-гүн ухаанай үндэһэ һууринууд хаража үзэгдэнэ. “Шонын-баша” гэжэ һургуулиин Чингис хаанай тэнгэриин мүргэлэй, Евразиин (даосизм, Махаянын хойто зүгэй будаадын мүргэл, чань (дзэн) болон бусад), тэрэшэлэн нүүдэл зоной байгаали хамгаалгын соёл болон буряад- монголой тэнгэринэртэ шүтэлгын буддийска оршолон байгууламжатай холбоонууд харуулагдана. Евразиин арадуудай мүргэлөөр, соёлоор һонирходог хүнүүдтэ, Дотоодын, Түбэй Азиин зүүн-хойто зүгэй оронуудай дайшалхы искусствын гүн ухаанай, түүхын, психологиин асуудалнуудые шудалдаг мэргэжэлтэдтэ, Зүүн зүгэй соёл ба мүргэл шудалдаг оюутадта ба аспирантнуудта энэ ном зорюулагдана.
Иимэ гүнзэгы удхатай оршол бэшэһэнэй удаа, энэ ном тухай тон хуряангыгаар зарим асуудалнуудтань харюу үгэхэ гэһэн зорилго табигдаба гээшэ. Монголой академик Дашням-ахай иигэжэ бэшэһэн юм: “Тэнгэри гээшэмнай мэдээсэлэй угаа ехэ хизаар орон, тэрэнэй нүлөө хүнэй ажабайдалда, хүн бүхэндэ хаанашье, хэзээшье тон ехэ. Тэнгэриин аша нүлөөе, тэрэнэй хүсые, оршол дайдые мэдэрхэ саг хүрэжэ ерээ хаш. Тэрэнь, олон эрдэмтэдэй һанамжаар, Чингис хаанай ажабайдал болон ажаябуулгада бодото нүлөө үзүүлһэн байна”.
Баатарлиг хүсэтэй, Урянхайһаа уг гарбалтай, Чингис хаанай ойрын нүхэр ба зүбшэлэгшэ байһан Сүбэдэйн гайхамшаг ехэ шэн габьяатай болоһон ушарта энэ барилдаанай арга дүрэнүүд ехэ нүлөөлһэн юм. Саяанай ба Алтайн нюуса сэрэгэй бүлгэмүүдтэ эдэ арга дүрэнүүд хүгжэн һалбарһан түүхэтэй. Эдэ нюуса бүлгэмүүд, нэгэдэлнүүд, сэрэгэй холбоонууд түүрэг-монголнуудай сэрэгэй бэлэдхэлдэ эдэбхитэй хабаадалсадаг байгаа ха. Нэгэ-нэгээрээ тулалдаха онол арганууд, номо годлёор харбаха, нюдаргаараа шаасалдаха, хутага ба шүбгэ жадаар хадхалсаха гэхэ мэтын юрын сэрэгшэдэй хэрэглэдэг онол аргаһаа ондоо байжа болоо.
Тэнгэридэ шүтэхэ мүргэл Чингис-хаанай ударидалга доро үнгэргэгдэдэг һэн тула, тэрэ Хүхэ Мүнхэ Тэнгэриин бодото Хүбүүн байһан болоно. Энэ ном соо ехэ нюуса сэрэгэй шадабари хүсэн (искусство), буряад-монголой “Шонын- баша” һургуулиин нэгэ-нэгээрээ барилдаха арга дүрэнүүд үндэһэ һууринь боложо тодороо юм.
“Шонын-баша” гээшые олон зон мэдэхэгүй байна. Хурамхаанай аймагай Аргата нютагта түрэһэн Лубсан Хобраков тиимэ онол арга мэдэдэг ганса хүн байгаа гэхэдэ болоно. Тэрэнээ аша хүбүүн Цыбик Черип- Цынгеевичтэ дамжуулан үгэһэн юм. Зоной дунда “Мугы Лубсан” гэжэ нэрэтэй болоһон байгаа. Юуб гэхэдэ, тэрэ “түбэдэй кунфу” гэжэ барилдаанай онол арга шудалһан тула, “Шонын-баша” гэжэ барилдаанай онол аргануудта хэрэглэһэн байгаа бшуу. Ямар нэгэ хүнэй добтолоо һаань, “шонын-башаар” тэрэ доронь харюу үгэжэ шададаг байгаа. Хүлөө урагшань табяад, гараараа, тохоногоороо, толгойгоороо тэрэ добтологшоёо үрьдижэ сохидог байгаа. Энэнь “шонын тулалдаан” болодог һэн. Шоно хадаа юунһээшье айдаггүй, сухаридаггүй амитан һэмнай. Шонын һургуулиин гол удха, тэнгэритэй нягта холбоотой зүйлынь удаадахи мүргэлэй үгэнүүдһээ элирнэ:
Хүсэ ехэтэй Хүхэ мүнхэ
тэнгэри – Ехэ эсэгэмни!
Хайра ехэтэй налгай ногоон
һайхан дэлхэй – Ехэ эхэмни!
Эдэ мүргэлэй уряалһаа бүхы һуралсал ба һорилгонь эхилдэг һэн. “Шонын-баша” һайн мэдэдэг Лубсан Хобраков - Ханхайн аша хүбүүн Хурамхаанай аймагай Аргата һууринда 1906 ондо түрэһэн юм. Тэрэ бүхы Баргажан голдо суутай барилдаашан болобо. Шонын-баша һургуулиин мастер-һургагша Цыбик Хобраковой абгань Лубсан Хобраков нютагай ламанарай харгалзалга доро Эгэтын дасанай хубараг болоһон байгаа. Тэрэ будаадын гүн ухаанай нюусануудые шудалжа, гэбшэ нэрэ зиндаатай болоһон юм. Тэрэ үеэр дасан дугангуудые хааха, ламанарые мүшхэхэ ябадал эхилээ. Тиихэдэнь Лубсан Хобраков “гэбшэ” гэһэн нэрэ зиндааһаа буулгахыень ламанарта хандаба. Тэрэ хэрэгыень гэбшэ лама Борон гэгшэ бүтээһэн юм.
Тэрэнэй һүүлээр Лубсан Арсаланович нютагайнгаа колхоздо юрын ажалшан болоһон бэлэй. Цыбик Хобраков абга тухайгаа һонин ушарнуудые хөөрэдэг:
- Нэгэтэ “боксёрби гээд” нэгэ ёборходом, газарта унахаш гээл һэн. Үнэхөөрөөшье, далагад гэжэ үрьдижэ ёбороогүй байхадаа, газарта унашоод байгаа һэм. Шонын-баша хэрэглэжэ, намайе мухарюулжархиһан байгаал даа.
Саашадань юу бэшэхэб гэхэдэ, шонын-баша хэрэглэдэг хүнүүд ямар байха ёһотойб гэһэн аяар арба гаран шухала эрилтэнүүд тоологдоно. Ямаршье сагта шонын-баша хэрэглэдэг хүнүүд гансал илалта туйлаха ёһотой бшуу. Тиимэ илалтануудые туйлахын тула үдэр бүриин һорилго хэрэгтэй болодогынь элирнэ. Гансал бар хүсэеэ нэмээхэ һорилго бэшэ, мүн һанаан бодолоо зоригжуулжа һургаха тон шухала. Гэхэтэй хамта “Шонын-баша” гэһэн буряад-монголой һургуули хитадай ушу гэхэ мэтэһээ урид бии болоһон гэжэ онсолхо хэрэгтэй. Тиигэбэ яабашье, буряад-монголой ба хитадай һургуулинууд хоорондоо холбоотой гээд эрдэмтэд тоолодог. Шонын-баша хэрэглэхэдээ, хүнүүд олон ондоо “нюуса” онсо аргануудые хэрэглэдэг гээд хэлэхэ ёһотойбди. Хобраков Лубсанай хэлэһэнэй ёһоор: «Ямаршье дайшалхы мэргэн шадабари ямар нэгэ модон шэнги үндэһэтэй, гол мүшэртэй, набшаһатай. Эндэһээ үндэһэлэн, “шонын-башын” үндэһэ- ниинь гэхэдэ, тэнгэриин мүргэл болоно, гол мүшэрынь гэхэдэ, нюрганай яһан, набшаһаниинь эдэ шухала органуудые хамгаалдаг зүйл болодог. “Шонын-баша” добтолгын шадабари бэшэ, харин бэеэ хамгаалха талаар ябуулга гээшэ». Ц.Ч. Хобраковой мүргэлэй удаадахи үгэнүүд энээниие гэршэлнэ:
Хүсэ ехэтэй мүнхэ Тэнгэриин
Үндэр ехэ шубуун бүргэд,
Ехэ шубуун баабайтай
Хүбшэ тайгын эзэн,
Хүхэ шоно Ехэ эхэтэй
Эхин ехэ эсэгэмнай,
Хүсэ ехэтэй үндэр ехэ
Шоно-Баатар ехэ Баабаймнай,
Хүсэ ехэтэй хүхэ мүнхэ Тэнгэри –
Ехэ эсэгэмни!
Хайра ехэтэй налгай
һайхан дэлхэй – Ехэ эхэмни!
Эдэ үгэнүүдые хэлэхэдээ, Чингис- Хаан шэнгеэр Тэнгэридэ һүгэдэнэб гэжэ хүн бүхэн ойлгохо ёһотой.
Мүнөө үедэ газар дэлхэй дээрэ олон тоото мүргэлнүүд, мүргэлэй һургуулинууд бии гээд тодорхойлое. Тэдэ һургуулинууд, мүргэлэй һургаалнууд тэнгэриин мүргэлдэ нэгэшье һаад ушаруулдаггүй, харин тэдэниие гол түлэб адлишаажа байдаг. Энэнь будаадын шажан мүргэлдэ сэхэ хабаатай.
Нэгэ-нэгээрээ тэмсэдэг “Шонын-баша” гэжэ буряад-монголой һургуули Ази түбиин олон тоото (түүрэгэй кураж, саха-яхадай хабсагай, түбэдэй кунфу, тэрэшэлэн тэнгэриин нохой болон бусад) мэдээжэ һургуулинуудтай харилсаха, тэнсэхэ аша габьяатай гээд тэмдэглэхэ ёһотойбди. Тэрээнһээ гадуур “Шонын-баша” һургуулиин һургаал буряад-монгол арадай Тэнгэриин мүргэлдэ үндэһэлэнхэй. Эхэ газартаа, нангин хада уулануудтаа хандасаяа улам үргэдхэхэ зорилго бултанай урда табигдана гээшэ.
Үшөө нэгэ жэшээ. Тэнгэриин мүргэл уг удхаараа японцуудай “самурайнуудай мүргэлтэй” адлирхуу гэхэдэ болоно. Тэдэнэр мүн лэ тэнгэриин мүргэл баримталдаг ха юм. Японцуудай «Жада-самурайн оюун бодол» гэдэгынь һонирхолтой.
“Шонын-баша” гэжэ буряад- монголой һургуулиин онсо ашаг үрэтэй талые тодорхойлон, Омск хотын “Хутагануудай тулалдаан” гэһэн һургуулиин түлөөлэгшэ Дмитрий Бахта гэжэ Ц.Ч. Хобраковые «мүнөөнэй бодото мастер, ехэ үзэгөөр бэшэгдэхэ һурган хүмүүжүүлэгшэ Багша, үльгэр түүхын домогто хүн” гэжэ сэгнэлтэ үгэһэниинь гайхалгүй.
Тус номой авторнууд: Абаев Николай Вячеславович, Будаадын шажанай гүн ухаанай хүндэтэ доктор, мэдээсэл тараадаг Уласхоорондын академиин (Нью-Иорк), РАСН-ын академик, Тыва Республикын эрдэм ухаанай габьяата ажал ябуулагша; Хобраков Цыбик Черип-Цынгеевич, Буряад Уласай габьяата эмшэн, «Шонын-баша» гэжэ Тэнгэриин мүргэлэй һургуулиин мастер-багша.
Степан ОЧИРОВ, РФ-гэй Журналистнуудай холбооной гэшүүн.