​Харланай үхибүүдэй халуун шунал

Майн 19-дэ Ивалгын дасанай ехэ һургуулида “Эхэ хэлэн – манай баялиг” гэжэ урилдаан 24-дэхи удаагаа эмхидхэгдэбэ. Һуралсалай жэлэй түгэсхэлэй үмэнэ үнгэрһэн энэ хэмжээ ябуулга Буряад Уласай Болбосоролой болон эрдэм ухаанай яаман эбээн тэдхэһэн байна.

Энэ урилдаанда хабаадаха бүридөө үхибүүдэй буряад хэлээр мэдэсэ улам дээшэлнэ гээд адаглахаар байдаг. Гэбэшье һонирхолыень улам үргэдхэхын тулада “квест” гэхэ мэтын шэнэ хэмжээ оруулха саг тулажа ерээ гээд, жюриин гэшүүд бодомжолно. Харин урилдаанай эхиндэ Бандида хамба лама Дамба Аюшеев үгэ абахадаа, буряад хэлэеэ баяжуулха ёһотойбди гэжэ тэмдэглээ. Тиигэхын тулада нэрэтэй солотой дуунуудые буряадаараа дууладаг болохо хэрэгтэй. Жэшээлхэдэ, яхадууд “Журавли” гэжэ дуу түрэлхи хэлээрээ дуулажа, һайхан клип буулгаад байна ха юм.

Буряад Уласай Арадай Хуралай хорооной түрүүлэгшэ Цыденжап Батуевай хэлэһээр, туһалагша хүбүүгээ буряадаар дуугаржа һурганаб. Хажуудахи секретарьни суг хүдэлдэг баһа нэгэ хүниие һургана. Тиигэжэ хэмнай урид һургахаб гэжэ урилдаа эхилээбди. Дүнгыень заатагүй дуулгахаб гэбэ.

Тэрэшэлэн 8 үрөөнүүдээр 54 команда таража, урилдаан эхилбэ. Хүдөөгэй һургуулинуудта орходоо, хотын үхибүүд буряадаараа ядалдана. Гэбэшье арга шадалаараа оролдоно. Энэ удаа Улаан-Үдын 29-дэхи буряад гимнази анха түрүүшынхиеэ илажа гараба. Хоёрдохи һуури Сэлэнгэ аймагай Жаргалантын һургуулиин шабинар, гурбадахи һуури Зэдэ аймагай Доодо-Бургалтайн һургуулиинхид абаһан байна.

Тиихэдэ 9 дахин түрүүлһэн, 3 удаа хоёрдохи һуурида гараһан Бэшүүрэй Харланай һургуулиин шабинар 4-дэхи һуурида гараба. Тиибэшье эдэ үхибүүдые онсолон тэмдэглэхэ хэрэгтэй. Юундэб гэхэдэ, тэдэ хододоо һайн бэлэдхэлтэй ерэдэг. Тиигэхынь тулада сомоной дарга Бэлигто Жигжитов тон ехэ ажал ябуулдаг байна. Мэргэжэлээрээ зоотехник аад, ямаршье багшаһаа дутуугүйгөөр үхибүүдые бэлдэнэ.

“Минии гэртээ бусахыем үхибүүд тэсэжэ ядан хүлеэжэ байдаг. Үдэшын 4 саг багаар һуужа, бэлдэлгэеэ эхилнэбди”, - гэжэ Бэлигто Дамбиевич тэмдэглэнэ.

Харланай һургуулида 16 үхибүүд, Охин-Булагай һургуулида 12 һурагша тоологдоно. Эдэнэр бэе бэеэ һэлгэн, “Эхэ хэлэн – манай баялиг” гэжэ урилдаанда таһалгаряагүй шахуу 2017 онһоо хабаадана. Эдэ үхибүүдэй дунда “одохонуудшье” толоржо эхилэнхэй. Жэшээнь, байгша оной “Эдир баатар” Барас Дайндаров “Хүхюу буряадташье”, “Эдир Будамшуудашье” бэеэ мэдүүлээ бэлэй.