670
Тохёолдоод байһан бэрхэшээлтэй сагта Буряадай Засагай газар хүүгэдтэй гэр бүлэнүүдые дэмжэлгын хэдэн хэмжээнүүдые абанхай. Харин мүнөө гансаараа үхибүүдээ тэжээдэг түрэлхидэй ээлжээн ерэбэ. Коронавирус үбшэнэй байдал хиналгын болон саг үргэлжэ шалгалгын уласай штаб иимэ гэр бүлэнүүдтэ баһал эдеэ хоолой суглуулбаринуудые үгэхэ шиидхэбэри абаа.
- Хүндэ байдалда ороһон дүүрэн бэшэ гэр бүлэнүүдэй үхибүүн бүхэндэ эдеэ хоолой суглуулбаринууд хараалагдаха, - гэжэ Буряадай Толгойлогшо Алексей Цыденов хэлээ.
Тус дэмжэлгэдэ 9309 гэр бүлэ хүртэхэ эрхэтэй юм. Эдэ айлнуудта һургуулида һурадаггүй 12458 үхибүүн хүмүүжүүлэгдэнэ. Энэ хэрэгтэ уласай бюджедһээ 14 сая түхэриг шэглүүлэгдээ. Эдеэ хоол гэр бүлэнүүдтэ дамжуулха арга зохёохыень Буряадай Ажаһуугшадые ниигэмэй талаар хамгаалгын яаманда даалгагдаа. Энээнһээ урид һургуулидаа хүнгэлэлтэтэйгөөр хооллодог байһан үхибүүдые холоһоо һуралсалай үедэ эдеэ хоолой суглуулбаринуудаар хангаха шиидхэбэри абтаа һэн гэжэ һануулая. Тиин бүхыдөө улас дотор 46 мянган һурагша иимэ дэмжэлгэдэ хүртэжэ эхилэнхэй. Энэ хэрэгтэ 49 сая түхэриг хараалагданхай.
Буряад Уласай Засагай газарай мэдээсэлэй албан
