​Буряад Уласта коронавирусаар үбшэлhэн зоной тоо 50-да хүрөө

Апрелиин 7-ой байдалаар Буряад Уласта коронавирусаар үбшэлһэн 50 хүн бүридхэгдөө. Үшөө 4 хүн шэнжэлгэ гаража байна. Харин коронавирус тудаһан хүнүүдтэй харилсаһан зоной тоо 1771-дэ хүрөө. Халдабарита үбшэнтэниие аргалдаг эмнэлгын газарта 99 хүн арга абажа байна. Тэдэнэй 55-иинь лаб коронавирусаар үбшэлнэ гээд баталагданхай. 5 хүниинь хүндэшэг байна. Харин 99 хүн эдэгээд, гэртээ табигдаа. 

Гэхэ зуура уржадэр коронавирусаар үбшэлһэн наһажаал эхэнэр наһа бараба гэһэн гашуудалта мэдээн сахилгаан түргөөр тараа. Теэд тэрэ коронавирусһаа гадна, үшөө олон үбшэнтэй байгаа, тэдэнь лэ һүжэржэ, хэдэн үдэрэй туршада тусхай хэрэгсэлэй туһаар амилжа байтараа, наһа бараа бшуу. 

Улаан-Үдэ хотодо олон зоной ябадаг газарнууд, ниитын тээбэринүүд сэбэрлэлгын бодосоор сасагдана. Мүн энэ долоон хоногой эхинһээ шухала үүргэтэй зарим эмхи зургаанууд ажалаа ябуулжа эхилээ. Харин бусад зон амин шухала хэрэгэй гараагүй һаань, гэртээл һууха ёһотой болоно. Үбшэнэй улам дэлгэрхэһээ һэргылжэ, өөрынгөөшье, ниигэмэйшье тала хаража, тэсэбэриеэ хүбшэлэн, гэртээ байял даа.