452
Алексей Цыденов олзын хэрэг дэмжэхэ талаар федеральна болон уласай засаг зургаануудай абаhан хэмжээнүүд тухай хэлэбэ: налог татабариин хүнгэлэлтэнүүд, банкнуудай талаhаа урьhаламжын hуладхалга болон бусад тухай. Тиихэдэ Ородой Холбоото Уласай Юрэнхылэгшын тогтоолоор ниигэмэй туhаламжа үзүүлхэ арганууд тухай хэлэгдээ. Эндэ эхын капиталда хүртэхэ эрхэтэй гэр бүлэнүүд, үхибүүндэ 5000 түхэриг, ажалга болоhон хүнүүдтэ түлэгдэдэг тэдхэджын дээшэлүүлэгдэhэн хэмжээн тухай хэлэгдээ.
Стратегическэ үлэдбэринүүдэй ажал
- «ТГК-14», «Бурятэнерго», РЖД, ЛВРЗ - шухала үйлэдбэринүүд хүдэлнэ, ажалай hууринууд тэрэ зандаа үлэнхэй. Тиихэдэ салин, - гэжэ Буряадай Толгойлогшо хэлэбэ.
Алексей Цыденовэй тэмдэглэhээр, гэрhээ гарангүй байха долоон хоногто, ажалай салин түлэгдэхэ. Энэ талаар байдал улас дотор прокуратура болон Роструд хинаха.
- Энэ долоон хоногто ажалай түлөө салин түлэгдэхэ. Ородой Юрэнхылэгшын тогтоолой ёhоор, ажалаар хангагшад хүдэлмэрилэгшэдтөө салингын түлэхэ ёhотой. Гэрhээ гарангүй байха долоон хоног – ажалhаа сүлөөлгэ бэшэ, харин коронавирус үбшэ дэлгэрхэ, hүжэрхэгүйн талаар абтаhан хэмжээн, - гэжэ Алексей Цыденов тэмдэглэбэ.
Буряадай Толгойлогшо улас дотор гэрhээ гарангүй байха гэжэ уряалагдаа, карантин соносхогдоогүй. Карантин соносхогдобол, үшөө шанга хизаарлалтанууд абтаха, дүрим эбдэбэл, бүри ехэ харюусалга абтаха.
Ажалаа тогтоонгүй үргэлжэлүүлhээр: ЛВРЗ ( литейнэ цех 70 хүн), Улаан-Үдын авиазавод (дежурнэ хүдэлмэрилэгшэд, котельни, компрессорнэ цех 40-70 хүн), Селенгын ЦКК (700 хүн), Улаан-Үдын приборостроительнэ нэгэдэл (20 хүн). Хүдөө ажахын болон эдеэ хоолой hалбарида байhан гуримаараа «Бурятмясопром», «Бурятхлебпром», «Молоко Бурятии», тиихэдэ Буряад Уласай аймаг бүхэндэ пекарнинууд хүдэлнэ. «Түгнын уурхай» бүлгэм хүдэлhөөр, дистанционно аргаар бухгалтери болон хангадаг албангууд хүдэлнэ.
- Уласай бюджедэй hалбари мүнгөөр hомологдонхой. Бюджедэй hалбарида муниципальна хүдэлмэрилэгшэд, эмшэд, багшанар, ЗАГС, шүүгшэд, хүүгэдэй сэсэрлигүүдэй хүмүүжүүлэгшэд болон бусад – 70 мянган тухай хүн хүдэлнэ. Тэдэнэр булта мүнгөөр болон ажалаар хангагданхай, тиигэжэ ажаhуугшадай ехэнхи хубинь тогтууритай байдалтай. Туhаламжа үзүүлдэг hалбарида: худалдаа наймаан, транспорт, салон, парикмахерскэ, хоол баридаг газарнуудай талаар асуудал бии, - гэжэ Алексей Цыденов тэмдэглэбэ.
