400
Дайнай ветерануудай уласай госпиталь саг зуура пневмони үбшэнтэниие эмнэхэ стационар болгогдобо. «Светлый» гэhэн ниигэмэй-реабилитационно түбтэ коронавирустай үбшэнтэй харилсаhан хүнүүд орохо.
- Мүнөө инфекционно больницада ханяаданай үбшэнhөө 70 хүн эмнэгдэнэ, энэ эмхидэ 186 хүн нэгэ доро орохо аргатай. Үшөө 128 hуури бэлдэнэбди: апрелиин 15 болотор түсэбэй болон эрилтэнүүдэй ёhоор. Энэ болотор Солнечная гудамжаар оршодог эмхидэ карантин дүүрэхэ. Тэндэ 88 hуури, тэрэ тоодо реанимациин 25 hуури байгуулагданхай. Мүнөө дайнай ветерануудай госпитальдо 40 hуури байгуулаабди. Дайнай ветеранууд Зүүн зүгэй эмнэлгын түбтэ эмнэлгэ гараха, - гэжэ Буряад Уласай элүүрые хамгаалгын сайд Евгения Лудупова хэлэбэ.
Һаяын сагта ниигэмэй-реабилитационно «Светлый» түбтэ коронавирус үбшэнтэнтэй харилсаhан, гэртээ амяараа байха аргагүй хүнүүдэй орохо обсерватор байгуулагдаха.
Эмнэлгын эмхинүүдые хангалгада федеральна болон уласай бюджетhээ мүнгэ hомололго дээшэлээ.
- Гүрэнэй энэ тэдхэмжэ 128 сая түхэриг Ородой Холбоото Уласай Засагай газарай нөөсын жасаhаа эмнэлгын эмхинүүдын хангалгада дамжуулагдаа. Нэмэлтэ 73 ИВЛ аппарат болон хоер тусхай хэрэгсэл хүлеэгдэнэ, - гэжэ Евгения Лудупова нэмэбэ.
Мүнөө улас дотор 492 ИВЛ аппарат бэлэн, үшөө 39 hаяын сагта асарагдаха.
Эмнэлгын эмхинүүдтэ коронавирус үбшэнэй дэлгэрхэгүйн талаар хэмжээ ябуулагнуудта уласай бюджетhээ 271 сая түхэриг дамжуулагдаа. Энэ мүнгөөр эмнэлгын хэрэгсэлнүүд, эмүүд, сэбэрлэлгын, бэеэ аршалха хэрэгсэлнүүд абтаа.
