415
Улас дотор гэрhээ гарангүй байха сагта хүнүүдтэ hайн дураараа туhа хүргэхэ волонтёрнуудай хоёр штаб байгуулагдаа – Буряад Уласай спортын болон залуушуулай бодолгын талаар яаманай «Добродом» гэhэн нөөсын түбтэ болон Бүхэроссиин Арадай фронтын залуушуулай таhагай дэргэдэ #МЫВМЕСТЕ.
Мүнөөдэр, апрелиин 1-дэ, Буряад Уласай Толгойлогшо Алексей Цыденов эдэбхитэдтэй уулзажа, тэдэнэй ажалтай танилсажа, ямар туhа хэрэгтэйб гэжэ hонирхобо. Уулзалгын дүнгүүдээр, Буряад Уласай Засагай газарай сүлөө машинануудые нөөсын түбтэ хамааруулжа, туhа хүргэхэдөө ашаглаха гэhэн шиидхэбэри абтаа.
Буряадай Толгойлогшо уласай үйлэдбэриин яаманда ама хамараа бүглэхэ маскануудые оёхо үйлэдбэринүүдтэй хэлсэжэ, 10% маскануудые волонтёрнуудта түлбэригүйгөөр дамжуулха гэжэ даалгаба. Тэдэнь саашадаа уласай ажаhуугшадта дамжуулагдаха. Энээнhээ гадуур, hаяын сагта уласта дамжуулагдаха маскануудай 10%-нь аймагуудта тараагдахар волонтёрнуудта баhал дамжуулагдаха юм.
- Москваhаа үглөө, мүнөө дамжуулагдаха, - гэжэ Алексей Цыденов хэлэбэ.
Тиихэдэ волонтёрнуудые түлишөөр хангаха, аймагуудта – эдэбхитэдые хоолоор хангаха, үдэр бүри бэеын тамир шалгаха гэжэ уласай хүтэлбэрилэгшэ даалгаа.
Буряад Уласай спортын болон залуушуулай бодолгын талаар яаманай сайдай орлогшо Татьяна Парпаевагай дуулгаhаар, «Добродом» гэhэн штабта уласай волонтёрнуудай бүхы эмхинүүдэй түлөөлэгшэд, тэрэ тоодо федеральна хэмжээндэ хүдэлдэг хүнүүд сугларна. Федеральна хэмжээндэ ажал ябуулдаг волонтёрнууд 65 наhанhаа дээшэ хүнүүдhээ ороhон мэдүүлгэнүүдые бүридхэдэг. Һайн дураараа туhа хүргэгшэд федеральна «халуун утаhаар» болон уласай болон Улаан-Үдын ниигэмэй хамгаалгын таhагуудай дежурна утаhаар харюусажа, тэдэнэ уласай штабуудта дамжуулдаг. Мартын 31-дэ волонтёрнуудай бүридхэлдэ ородог dobro.ru талмайда 116 волонтёрнууд бүридхэлдэ абтажа, ганса Улаан-Үдэдэ 19 мэдүүлгэээр ажал ябуулаа, тэрэ тоодо түлбэригүй эдеэ хоолдо хүртэхэ талаар.
Мүнөөдэр, апрелиин 1-дэ, мартын 25-да хүдэлжэ эхилhэн штабта 241 мэдүүлгээр ажал ябуулагдаа.
Буряад Уласай наhатай, нарай үхибүүтэй эжынэр, хаюбдарта үбшэнтэнhөө мэдүүлгэнүүд ороно. Волонтёрнуудай эмхинүүд тухай хүнүүд сүлжээ холбоонhоо, мэдээсэлнүүдhээ, танил зонhоо мэдэнэ. Наhажаал зоной түлөө ехэнхидээ хүршэ болон түрэлэй зон дуулгадаг. Улас дотор бүхыдөө 250 тухай хүнүүд эдихэ хоол, эмүүдые тарааха талаар ажал үдэр бүри ябуулна.
- #МЫВМЕСТЕ гэhэн волонтёрнуудай штаб, тэрэнэй бүридэлдэ эмшэд оролсодог, эмүүдые абаха талаар мэдүүлгэнүүдээр хүдэлдэг. Тиихэдэ штабта оло дахин хэрэглэхэ маскануудын оёхо ажал ябуулагдадаг, тэдэнь саашадаа Буряад уласай ажаhуугшадта оруулhан мэдүүлгээр дамжуулагдадаг, - гэжэ Арадай фронтын Буряад Уласай таhагай гүйсэдхэхы хорооной хүтэлбэрилэгшэ Юлия Ким хэлэбэ.
Волонтёёрнуудай ажалда эбээн тэдхэгшэд туhа хүргэнэ.
- Уласай эбээн тэдхэгшэд эдеэ хоол худалдан абалгада мүнгэ hомолно. Үсэгэлдэр тэдэнэр 50 мянган түхэриг дамжуулаа, мүнөөшье мүнгэн hомологдоо. Бидэ 300 түхэригтэ эдихэ хоол суглуулнабди, тэрээндэ гречкэ, макароны, тушенко, hүн, хилээмэн ороно. Удаань тэрэнээ хаягаар таранабди. Мүнөө дээрээ мүнгэн хүрэнэ. Эбээн тэдхэгшэд мүнгэн болон эдеэ хоолоор туhалхаяа гадна, яагаад антисептигүүдые бэлдэхэ гэжэ заажа, тэдэниие бэлдэхэ зүйлнүүдые асаржа үгөө. Тиихэжэ хүнүүд ажаhуугшадта тарааха маскануудые асаржа үгэнэ. Буряад уласта харюусалгатай олзын хэрэг эрхилэгшэд олон, - гэжэ Татьяна Парпаева хөөрэнэ.
Мүнөө волонтёрнууд туhа хүргэхэдөө, хубиин машина хэрэглэнэ, эдеэ хоол, эмүүдые тарааха талаар олзын хэрэг эрхилэгшэд, политигууд, олониитын ажаябуулагшад, залуушуулай түбэй, спортын яаманай мэргэжэлтэд, аяншалгын hалбариин хүдэлмэрилэгшэд туhа хүргэнэ.
- Сэбэр, сагаан сэдьхэлтэй, эдэбхитэй залуушуулда баяр хүргэнэб, - гэжэ Алексей Цыденов волонтёрнуудта баяраа мэдүүлбэ.
«Добродом» хандаха гэбэл үглөөнэй 9 сагhаа үдэшын 20 саг болотор 8(3012) 37-95-29 гэhэн утаhаар, Улаан-Үдын ниигэмэй хамгаалгын таhагта үглөөнэй 8-hаа hүниин 23 болотор 9503841150 гэhэн утаhаар хонходохо арга бии.
«Сияние» компани, Буряадай туроператорнуудай нэгэдэлнүүд, «Korean house» кафе, «Etno panno» магазин, «Дзен пицца» кафе , «Нютаг» кафе, «Единая Россия» намай Буряадай таhаг, ЛДПР намай Буряадай таhаг, «Байкальский текстиль» бүлгэм, ИП Прокопова Ю.А., Одорова Любовь, Доржиева Сэлмэг, КВН-хүдэлөөнэй ударидагша Бурятии Чингис Болотов, Денис Слепцов гэрэл зураг буулгагша болон беэ танюулха дурагүй хүнүүд волонтёрнуудта туhа хүргэнэ.
