1051
Мартын 16-да Мухар-Шэбэрэй засаг дарга Владимир Молчанов Хүсөөтын эгээл үндэр наһатай хүгшөөдэй Цыпилма Цырендоржиевае 90 наһанайнь ехэ ойн баяраар амаршалаа.
Эсэгэ ороноо хамгаалгын дайнай үедэ үхибүүн наһаяа үнгэргэһэн, 13-тайһаа ажалайнгаа намтар эхилһэн хүгшөөдэйдэ аймагай засаг дарга Агуу Илалтын 75 жэлэй ойн баярай медаль зүүлгээ.
1930 оной мартын 15-да Боом һууринда түрэһэн Цыпилма Цырендоржиевагай эсэгэнь политическэ хамалганда ороод, шоронһоо бусаагүй. 1992 ондо Цыден-Доржи Цыдыповичэй нэрэнь сагааруулагдаһан юм. Мүнөө басаганиинь “Политическэ хамалганһаа хохидогшо” гэһэн үнэмшэлгэтэй.
1954 ондо Цыпилма хүгшөөдэй хадамда гаража, нүхэрэйнгөө нютаг Намарзан руу зөөһэн. Балдандоржо Тудупович Эрдынеев нүхэртэеэ хамта “Эрдэм” болон “Одон” совхозуудта хонин ажалда наһаараа хүдэлөө. Зууһаа зуу гаран түл абажа, үндэр дүнгүүдые туйлаһанайнгаа түлөө гүрэнэй хайра шагналнуудта хүртэһэн байха юм. Гурбан хүбүүдые үндылгөө. Мүнөө найман ашанартай, найман гушанартай болонхой, одхон хүбүүндээ үргүүлжэ байна.
Автор: Нина Эрдынеева
