1614
«Илалтын волонтёрнууд» гэһэн Бүхэроссиин хүдэлөөнэй сайтда Агууехэ Илалтын һайндэрэй хэмжээ ябуулгануудые эмхидхэлгэдэ хабаадалсаха дуратайшуул мэдүүлгэ оруулна. Мүнөө Ородой Холбоото Уласай бүхы можо нютагуудһаа 50 мянганһаа дээшэ хүн мэдүүлгэ оруулаад байна. тэрэ тоодо, Буряадай 300 залуушуул.
- Бидэ 100 мянганһаа дээшэ волонтёрнуудые бэлдэжэ, тэдэнэр һайндэрэй хэмжээ ябуулга эмхидхэлсэһээ гадуур, туһа хүргэхэ аргатай. Волонтёрнууд ветерануудта туһалжа, угай һарбаалжан һэргээхэ, дурасхаалай газарнууд, хүшөөнүүдые заһабарилха, сэрэгшэдэй хүдөөлэгдэһэн газарнуудые заһабарилгада хабаадалсаха. Суг ажал ябуулха нүхэдтэеэ хамта волонтёрнуудые бэлдэхэ нэгэ гурим байгуулжа, һайн дураараа туһа хүргэгшэдэй үүргэ тухай хөөрэхэһөө гадна, Эсэгэ ороноо хамгаалгын Агууехэ дайнай түүхэ тухай хөөрэнэбди, - гэжэ Бүхэроссиин хүдэлөөнэй хүтэлбэрилэгшэ Ольга Амельченкова хэлэбэ.
Хоёр һараһаа үлүүхэн үдэр Илалтын үдэр болотор үлөөд байна. Энэ хугасаада «Илалтын волонтёрнуудай» һонирхолтой, шухала түсэлнүүд бэелүүлэгдэхэ. Дээрэ хэлэгдэһэн хэмжээ ябуулгануудта хабаадалсаха дуратай һаа, волонтерыпобеды.рф гэһэн сайтда бүридхэлдэ абтаха шухала.
- Илалтын үдэр волонтёрнууд Улаан-Үдэдэ болон Буряад Уласай аймагуудта «Хэтэ мүнхын жагсаал» эмхидхэлсэхэ Тиихэдэ «Георгиевская ленточка», «Красная гвоздика», «Синий платочек», «Рекорд Победы» гэһэн хэмжээ ябуулгануудта хабаадалсаха, - гэжэ «Илалтын волонтёрнуудай» түсэбүүд тухай уласай хүтэлбэрилэгшэ Елена Бороева хэлэбэ.
Анна Огороднигой гэрэл зураг
