​​«Ом маа ни бад май хум»

Маани, мэгзэм, тарни гэһэн ойлгосонуудые һайн мэдэхэ ёһотойбди. Урдахи дугаарнуудаймнай нэгэндэ мэгзэм тухай ойлгосо үгтөө һэн. Харин маанимнай юун гэһэн удхатайб гэжэ уншагшаднай асууна.

Зүблэлтэ засагай үедэ энэ маани “Бадма лёнхобо сэсэгэй дэльбэнүүдһээ мүндэлһэн” гэһэн ойлгосоор лэ хизаарлагдадаг һэн. Үнэхөөрнь удхалан тайлбарилбал, мааниин зургаан үзэг гэжэ хэлэгдэдэг Арьяа-Баалын “ОМ МАА НИ БАД МАЙ ХУМ” зүрхэн тарниин удха шанарыень хэлэжэ барашагүй гүнзэгы юм гэдэг. Юундэб гэхэдэ, энэ зургаан үзэг соо бурханай ном согсологдожо, юрын хүндэ зохистой түхэлөөр үгтэһэн байна. Үдэр бүри уншан һүзэглэжэ ябахада, Эхэ зургаан зүйл хамаг амитан зоболонһоо һалажа, жаргалангаа эдлэхэ.

ОМ – тэнгэриин зоболонһоо арилгаха;

МАА - асари тэнгэриин хэрүүл шууяанһаа зайлаха;

НИ – хүн түрэлтэн үхэхэ ба зобохын зоболонһоо сүлөөрхэ;

БАД – адагуусанай зоболон үзэхэгүй;

МЭ – бэридэй зоболонһоо зайлаха;

ХУМ – тамын зоболонһоо зайлаха.

Саашань тайлбарилбал:

ОМ – арга бэлиг хоёрой хүсэн ниилэхэ;

МАА - арга шадал хүгжэхэ;

НИ – нигүүлэсхы сэдьхэл түрэхэ;

БАД – бурханай харгые олохо;

МЭ – бэлигүүн сэдьхэл олгуулха;

ХУМ – Арьяа-Баала бурхан бодотоор заларба.

Эндэһээл удхатай - хоёр альгаяа хоорондонь зайгүйгөөр ниилүүлэн хабсаргажа мүргэдэг.

Урдань олонхи зон “Доншуур маани” сээжэлдээд, үглөөгүүр ба үдэшэ бүри уншадаг байһан. Мүнөө “Буряад-FM” радиогоор үглөө бүхэндэ дамжуулжа байдаг болоһониинь ехэ һайшаалтай – айл бүхэндэ дамжуулагдажа, илангаяа замда ябаһан зон шагнажа, даган уншалсажа, саглашагүй ехэ буян үйлэдэнэ.