​​Һээр шаажа, гэр шүүбэ

Мартын 8-9-эй үдэрнүүдтэ Түнхэн аймагай Аршаан һууринда үнгэргэгдэһэн “Алтан Мундарга” гэһэн һээр шаалганай гол шангуудые түнхэнэйхид абаба. Нэгэ таһалгатай квартира Жалсып Манзаровта үгтөө. Буряад үүлтэрэй морин шан Надежда Балданова абаа. Эдэ хоёр Алтан Мундаргын хормойдо оршодог Хойтогол һууринда үндыһэн хүнүүд болоно.

Иимэ томо шан абахын тулада аяар 550 гаран тамиршан оролсоо. Тыва Уласай, Үбэр Байгалай хизаарай, Эрхүү можын, Буряад Уласай 10 гаран аймагай түлөөлэгшэд Түнхэн буугаа.

Эхэнэрнүүдэй дунда хүлэг морин гол шан табигдаа. “Феррари” гэжэ нэрэтэй мориндо хүртэхын тулада ехэ тэмсээн болоо. Захаамин аймагай 15 наһатай Людмила Дарижапова болон Түнхэнэй Долгор Ангархаева гэгшэдһээ Надежда Балданова түгэсхэлэй шатада түрүүлжэ гараба.

Эрэшүүлэй дунда мүрысөөн наһанай табан бүлэгтэ үнгэргэгдөө. Һүүлшын шатада оройдоол 9 хүн үлөө. Захааминай болон Агын гур­ба-гурбан тамиршан, Ахын хоёр һээршэн болон Түнхэнэй ори ган­са түлөөлэгшэ һүүлшын шатада ороһон байна. Энэ үе болотор хүн бүхэниинь 20 һээр хухалаа. Финал­да 7 наһатай эрэ тэмээнэй һээр табигдаа. Түрүүшын туршалгын удаа хоёр хүн мүрысөөгөө түгэсхөө. Удаадахи шатада үшөө дүрбэниинь һээр шаажа шадаагүй. Тиигэжэ Ага тойрогой залуу түлөөлэгшэ Алексей Очиров болон Түнхэнэй Жалсып Манзаров гэгшэд хоюулаа үлэжэ, шэнэ квартирын эзэн элирүүлэгдээ. Жээрэб татаһанай удаа Агын айл­шан удаадахи шата эхилээ. Томо гэг­шын һээр тэрэ хухалжа шадаагүй. Тиимэһээ Жалсыпай гарахые хүлеэн үлөө. Талмайн эзэн хойшоо харан, хада бурхадтаа мүргөөд гара­хадань, тэмээнэй һээр гурбан тээ­шээ һалан ниидэшөө һэн.

- Иимэ олон хүнүүдэй һээр шаахые 2014 ондо түрэл Хойтоголдоо хараа һэм. Тиихэдэ үшөө жаахан байгааб. Нэгэшье һээр хухалжа шадаагүйб. Намтай суг һургуулида һурадаг нүхэр өөрынгөө наһанай бүлэгтэ III һуури абаа һэн. Нэгэ классай хүбүүд тэрэ гэһээр лэ һээр хухалжа, һорилго хэнэбди. Өөрын квартиратай болошооб гэжэ үшөө этигэнэгүйб, - гээд, Жалсып Манзаров хөөрэнэ.

Тус мүрысөөнэй һонирхолтой ушарнууд тухай “Буряад үнэнэй” сайт дээрэ һаяар уншаарайт.

Борис БАЛДАНОВАЙ гэрэл зураг