​​Арга дүрыень анхаржа...

Һүүлэй хэдыхэн жэлэй туршада буряад арадаймнай һээр хухалха жэнхэни зугаа хүгжэжэ, арад зоной эгээл дуратай наадануудай нэгэн боложо шадаа.

Анхандаа һээр сохиходоо, шубуунай далияа һэбиһэндэл, хоёр гараа хажуу тээшэнь далайжа гү, али гарнуудаа урагша хойшонь далайжа, нэгэ адли уулзуулжа хухалдаг байгаа. Харин энэ нааданай һэргэжэ, урилдаанууд хаа-хаанагүй үнгэргэгдэдэг болоходонь, олон зон һонирходог боложо, һээр хухалха олон ондоо аргануудшье бии болоо.

Аршаан тосхондо болоһон «Алтан Мундарга» нааданда сугларһан хүнүүдэй ахамадуудынь ехэнхидээ урданайнгаа заншалта маягаар сохино, харин залуушуул өөрын элдэб онол аргануудые зохёоно. Нэгэ зариман гарнуудаа далайхадаа, элдэбээр һэбинэ, харин нүгөөдэнь гүйдэл дундаа сохижо эбдэнэ. Захааминай аймагай түлөөлэгшэ Александр Базаров гэдэг ахатан нюдэндөө хара шэл зүүгээд, огсом хүгжэм доро хатаржа байгаад, һээрээ хухалжархидагаараа арад зоной дура үнинэй татадаг.

Үнгэрэгшэ жэлэй һүүл багаар Интернет сүлжээндэ Хурамхаанай аймагай түлөөлэгшэ Бабасан Митапов гэжэ нэрэтэй залуу хүбүүн собхороод, агаарта эрьелдэхэ хоорондоо һээр хуха сохёод, олониие гайхуулаа. Тэрэ хүбүүн энэ урилдаанда хабаадахадаа, баһал энэ аргаяа хэрэглэжэ, һээр эбдээд, сугларһан зондо һайшаагдаа.

«Алтан Мундарга-2020» гэһэн урилдаанай абарга Түнхэнэй аймагай Хойто- Гол тоонтотой Жалсып Манзаров баһал бусадһаа илгарма өөрын онол аргатай байба. Урагшаа түргэн гэшхэлжэ, ябууд дундаа һээр сохижо хухална. Юрэдөө, арадайнгаа энэ наада хаража байхада, гоёл байна даа. 

facebook.com