​Красноярск хотодо– “Театральна хабар- 2017” үнгэрхэнь

Тус коллектив Сергей Левицкиин “Фронтовичка” гэһэн зүжэг Красноярск хотын А. С. Пушкинай нэрэмжэтэ драмын театрай тайзан дээрэ харуулха юм. 

"Театральна хабар” гэһэн хэмжээ ябуулга 2009 онһоо хойшо Красноярска хизаарай Соёлой яаманай болон Ородой Холбоото Уласай театрай ажал ябуулагшадай холбооной эблэлэй үүсхэлээр үнгэргэгдэдэг юм.

Фестивалиин үедэ шэнэ зүжэгүүдтэй танилсахаһаа гадна, мастер –классууд, зохёохы үдэшэнүүд, дүхэриг шэрээнүүд, театрай коллективүүдтэй уулзалганууд эмхидхэгдэдэг.

Сурбалжалагша, театр шүүмжэлэгшэ, “Красноярск Дейли” интернет – сэтгүүлэй шэнжэлэгшэ, “Театр”, “ Петербургский тетральный журнал”, “Музыкальный журнал” гэһэн сэтгүүлнүүдэй автор Елена Коновалова иигэжэ хэлэбэ:

- Буряад Уласай ород драмын театрай найруулагша болон бүхы хүдэлмэрилэгшэдые амаршалнаб. Би энэ труппые фестивальда зууршалһан байнаб.

Ород драмынхидай “Фронтовичка” гэһэн зүжэг ондоо театрай тайзан дээрэ дүрбэдэхиеэ табигдахань. 2016 оной мартын нэгэндэ “Алтан баг” гэһэн мүрысөөндэ конкурсһоо гадуур хабаадаһан юм. Удаань майн хориндо “Новосибирский транзит - 2016”гэһэн мүрысөөндэ шалгараа: “Ехэ түхэлэй эрхим зүжэг” гэһэн номинацида түрүү һуури эзэлжэ, найруулан табигшань театр шүүмжэлэгшэдэй эблэлэй дипломдо хүртөө, гол роль гүйсэдхэһэн Буряад Уласай габьяата артистка Светлана Полянская “Эхэнэрэй эрхим роль” гэһэн дипломооор шагнагдаа. Удаань энэ зүжэг ноябриин арбан табанда Улаан-Үдын соёлой үдэрнүүдэй үедэ Санкт –Петербург хотын “Балтийский дом” гэһэн театр-фестивальда табигдаһан юм гэжэ Буряад Уласай соёлой яаман мэдээсэнэ.