847
Нижнеангарск һууринай түбэй номой санда Хойто-Байгал аймагай засаг дарга Игорь Валерьевич Пухаревай номой санда бэлэглэһэн номуудай үзэсхэлэн үнгэргэгдэбэ.
Албанайнгаа хэрэгээр И. В. Пухарев Ород гүрэнэй нютаг можонуудаар болон уласайнгаа аймагуудаар оло дахин ябадаг гээшэ ааб даа. Ямаршье нютагуудаар тэрэ ябахадаа, газар можонуудай түүхээр һонирходог юм. Тиимэһээ олон һонирхолтой номууд, альбомууд, монографинууд суглуулһан байна. 2015 ондо Игорь Валерьевич 36 ном, 2016 ондо 42 ном номой санда бэлэглээ. Уншагшад энэ үзэсхэлэнгөөр ехэтэ һонирхоно.
И.В. Пухарев “Правовые основы деятельности морских воинских частей внутренних войск МВД России” гэһэн номой авторнуудай нэгэн юм. Энэ номоо тэрэ баһал бэлэглэһэн байна. Февралиин 23-най һайндэртэ дашарамдуулан, “Путь мужества и славы” гэһэн хэмжээ ябуулга түбэй номой санда үнгэргэгдэһэн юм. Энээндэ бэлэдхэлэй үедэ И.Пухаревай бэлэглэһэн номһоо материал абтаа эмхидхэгшэд тэмдэглэнэ.
Буряад Уласай аймагуудай түүхэ болон соёл уншагшадай һонирхол ехэтэ татана. “Кяхтинская старина” гэһэн альманах, “Баунт: прошлое и настоящее” гэһэн нютагай шэнжэлэл, “Золотая долина” гэһэн Зэдэ аймагай 75 жэлэй ойдо зорюулагдаһан номуудые уншагшадһонирхон уншана гэжэ номой сангай ажалшад тэмдэглэнэ.
Нижнеангарск хотын ахалагша классуудай һурагшадта “Санкт-Петербург: История и архитектура”, “Истоки Амура”, “Каслинский феникс” (“Художественный металл Урала” гэһэн бүлэгһөө), “Томск. Прогулки по знакомым местам” ехэ туһатай юм.
Хойто-Байгал аймаг ерэһэн аяншалагшад болон айлшадта “Улан-Удэ”, “Золотая долина”(Түнхэн аймаг), “Республика Бурятия. Баунтовский эвенкийский район”», “Попутчик по Северному Прибайкалью” гэһэн номууд дурадхагдадаг.
И.В. Пухаревай бэлэглэһэн номуудаар һонирхолтой хэмжээ ябуулганууд үнгэргэгдэжэл байха гэжэ Хойто-Байгал аймагай түбэй номой сан мэдээсэнэ.
