Үбэлэй шэрүүн хаһа үнгэржэ, хабарай дулаахан уларил тогтожо, хүн зоншье зугаатай, шубуу шонхоршье шууяатай болоно. Хотын гудамжаар зон олошоржо, эндэ тэндэ залуушуул амарна, хүүгэд наадана. Теэд энэ байдалай оршондо зүдэрүү, муухай хубсаһатай, ажал хэдэггүй, гэр байрагүй, архида орожо, нэгэндээ нэтэрһэн зон мүн лэ олоороо ябана. Энэ ушараар бидэ Гэр байрагүй зайгуул хүнүүдтэ «Шанс» гэһэн уласай түбэй ниигэмэй туһаламжын таһагые даагша Саяна Михайловна Доржиеватай уулзажа хөөрэлдэбэбди.
– Саяна Михайловна, «Шанс» гэһэн түб хэзээ бии болоһон бэ? Ямар үүргэ дүүргэнэ гээшэб?
– Хүндэ хүшэр байдалда ороһон зонтой үнинэй ажал хэгдэдэг байһан гээшэ. Буряад Уласай Ниигэмэй хангамжын яаман энэ талаар ехэ ажал ябуулна. Энэ «Шанс» гэһэн түб 2000 ондо тусхай реестрэй дансатай болоһон юм. Мүнөө түбые Сергей Борисович Жамцаев гэжэ залуу бэрхэ захирал эрхилнэ.
Манай түб болбол хүндэ байдалда ороһон, хонохо газаргүй, ажалгүй зондо туһалха гэһэн зорилготой юм. Тиихэдээ бидэ тэдэниие бүхы наһаарнь энэ байрадаа байлгаха гэнэ бэшэбди. Энэ түбтэ байрлаһан болзоройнь хугасаада паспорт, пенсиин үнэмшэлгэ, ИНН гэхэ мэтэ дансагүй зондо тэдэниие бүтээхэдэнь туһалалсадагбди. Эмшэнэй, психологой туһаламжа үзүүлнэбди. Тиигээд саашадаа түрэлхидыень бэдэржэ золгуулха, үгышье һаа, ганса бэе хүн һаань, пансионадта, наһатайшуулай байшанда түбхинүүлхэ ажал ябуулагдана.
– Энэ түбтэ бүхэли үдэр үнжэхэ аргатай гү?
– Үгы. Үдэшын 18 сагһаа үглөөнэй 7 саг болотор манай үүдэн нээлгэтэй байдаг юм. Ерээд лэ, хоноод гарана гэхэдэ болоно. Тиихэдээ тон түрүүн ерэһэн зониие бидэ поликлиникэ эльгээжэ, флюорографи, анализуудыень гаргуулаад, эмшэнэй тусхай саарһатай болгонобди. Тиигээд тэдэнтэй саашаа хүдэлжэ эхилнэ гээшэбди.
Эндэ үшөө иигэжэ тэмдэглэлтэй. Гэр байрагүй зон (бомж) гэхэдээ, зайгуул, архи тамхинда нэтэрһэн, газаагуур хоноод ябадаг зон гэжэ ойлгонобди. Тэрэнэй хажуугаар манай түбтэ ганса иимэ зон хандана бэшэ, үнэхөөрөө хонохо газаргүй (хүдөө нютагһаа ерээд гү, али олон зон түрмэһөө сүлөөрөөд, ажал үшөө олоодүй, түрэл гаралаа алданхай г.м.) зон хандана. Эдэмнай хүндэ байдалда ороһон зоной тоодо ороно гээшэ. Тэдэнэртэ баһал туһа хүргэхые оролдонобди.
– Энэ түбһөө гадуур үшөө хаана иимэ байра бии гээшэб?
– Энэ байрадамнай 31 унтаха орон бии юм. Хубсаһаа һэлгэхэ, бэеэ заһаха, угааха, эдеэ хоолой танхим, таһалганууд байха. Эдеэ хоолоор энэ хажуудамнай оршодог «Слон» кафе хангадаг юм. Хэлсээн баталагданхай.
Светлый һууринда «социальна гостиница» гэжэ бии юм. Тэндэ зон ганса һүни ерээд, хоноод гараха бэшэ, харин үдэрынь байха аргатай. Тиихэдээ өөһэдөө эдеэ хоолоо шанажа эдидэг, телевизор, уншалгын танхим, амарха таһалга гэхэ мэтэ байха. Ажал хэхэ аргатай зон үдэрэй 140 түхэриг, эрэмдэг бэетэй, наһанай амаралтада гараһан зон 130 түхэриг түлэхэ хэлсээн баталагдадаг гээшэ.
Иимэрхүү байдалтай эхэнэрнүүдые Сотниково һууринда эхэнэрнүүдэй һүмэдэ (социальный приют для женщин при церкви) түбхинүүлдэгбди. Тэдэнэр тэндэ ажал бага сага хээд, туһалалсаад байдаг юм.
– Һүүлэй жэлнүүдтэ иимэ зайгуул зоной тоо үсөөрнэ гү, али олошорно гү? Тэрэ ямар ушарһаа болоноб?
– Тэдэнэй тоо олошорно гэжэ тэмдэглэлтэй. Ганса 2016 ондо 638 хүндэ туһаламжа үзүүлһэн байнабди. Тэдэнэрэй 157 хүндэ ажал олгогдоо; 29 – интернадта байдаг болоо, 38 хүндэ Россиин эрхэтэнэй паспорт барюулагдаа, 162 – саг зуурын бүридхэлдэ оруулагдаа.
2017 оной гурбан һарын туршада 171 хүн бидэндэ хандаһан байна.
Ямар шалтагаан бэ гэхэдэ, нэн түрүүн архиин хорон лэ юм ааб даа. Энээнһээ боложо, гэр бүлэһөө хахасана, байрагүй болоно. Тиихэдээ хүдөө нютагта иигэн тиигэн нютагай зоной үргэмжөөр ажамидарна, харин хотодо ехэ хүшэр ха юм даа. Зайгуул зониие түрэлхидынь гэртээ оруулхагүй. Тиигэжэ өөртөөл адли зонтой ушараад лэ, эндэ тэндэ канализацинууд соо гү, али элдэб архинша айлнуудта хононо ха юм. Мүнөө сагта ажал олохонь хүшэр хүндэ, һургуули, мэргэжэлгүй зон олон. Мүнгэгүй дээрэһээ боложо, элдэб гэмтэ ябадалда ороно, хулгай хэнэ, тэндэһээ түрмэдэ ороно гэхэһээ эхилээд лэ, буруу харгыда орошоно. Нэгэндээ нэтэрээд, түрэл гаралһаа холодоно, үри хүүгэдшье хэрэггүй болоно. Хэдэн жэл хаалтада һуугаад гарахадань, саг ондоо болоһон, өөһэдөөшье нюургүй, хүн зоноор харилсахада хүндэ болоһон ушар олон. Тиимэһээ бидэндэ хандажа, оршон байдалда шэнээр дадалга эхилнэ гээшэ. Зарим хүнүүд ажал хэхэ дурагүй, зүрхэгүй дээрэһээ гэр бүлэһөө хахасаад, зайгуул болодог ушарнууд дайралдана. Түрэлхидэйнгөө элдэб ажал оложо, байрашье бэлэн болгоожо үгэхэдэ, нэгэ газартаа һуужа, байжа шадахагүй зон гэжэ баһал хэдэн процент байха юм. Тэдэ зон ондоо болохогүй. Үнөөхил үйлсэдэ гараад, гудамжаар тэнэжэ ябахадаа, өөрынгөө «юртэмсэдэ» «жаргалтай» ябанад.
Адаглажа байхада, эхынгээ амиды мэндэ ябахада, хүнүүд үшөө ямар нэгэ түшэлгэтэй ябадаг. Энэл ха юм даа эхын сэдьхэл, энхэрэл, түшэлгэ гэжэ һанагдана. Эжын байхада, гэр, буусашье һаа дүүрэн, орохо дулаан гэр, эдеэ хоол байна ха юм. Ямаршье һаань, үридөө эхэ хүн һанаагаа зобожол һууха табисууртай. Тиимэһээ гэр бүлын байдалһаа, хүнэй хандасаһаа ехэ юумэн дулдыдадаг гэжэ һанагдана.
– Энэ ажалай хажуугаар үшөө ямар ажал хэгдэнэ гээшэб?
– Хото соогуур элдэб газарта соргонууд, гэрэй подвал, бог шорой хаядаг газарнуудта байрладаг хүнүүдые сагдаагай албанай түлөөлэгшэдтэй, эмнэлгын албанай хүдэлмэрилэгшэдтэй хамта ябажа эрьедэгбди. Хэрэгтэй сагтань туһа хүргэжэ, бүридхэлдэ абажа, халуун эдеэгээр хооллуулха гэхэ мэтэ хэмжээ ябуулганууд үнгэргэгдэдэг юм. Энэмнай ехэ социальна бэрхэшээл болоно гээшэ. Тиимэһээ бидэнэй зорилго иимэ зондо багаханааршье һаань, туһа хүргэжэ, зүб харгыда орохо хэрэгтэнь түлхисэ боложо үгэхые оролдоно гээшэбди.
– Һайнта даа, Саяна Михайловна! Хүнгэн бэшэ энэ буянтай ажалдатнай амжалта хүсэнэбди.