787
Ким Базарсадаевай түрэһөөр 80 жэлэй ойдо зорюулагдаһан хэмжээ ябуулганууд үнгэргэгдэбэ.
Улаан-Үдэ хотодо Ким Иванович Базарсадаевай түрэһөөр 80 жэлэй ойн баярта зорюулагдаһан митинг үнгэргэгдэбэ. Дуушанай ажаһууһан гэрэй дэргэдэ нэрыень мүнхэлһэн самбарта хүнүүд сэсэгүүдые табиба. Буряад Уласай Соёлой яаманай урлагай, арадай уран бүтээлэй болон болбосоролой таһагые даагша, Соёл урлагай хорооной түрүүлэгшын орлогшо Татьяна Дугарова , оперо болон баледэй театрай уран һайханай хүтэлбэрилэгшэ Юрий Лаптев, К. Базарсадаевай нүхэр, хүршэ байһан,Уласай ветерануудай зүблэлэй түрүүлэгшэ Ревомир Гармаев, Ородой Холбоото Уласай арадай артист Вячеслав Бальжинимаев, Монголой арадай артист Жаргалсайханай Чингис, Агын тойрогой К. И. Базарсадаевай нэрэмжэтэ урлагай һургуулиин захирал Надежда Самбуева гэгшэд сэдьхэлэй дулаахан үгэнүүдые хэлэбэ.
Буряад Уласай габьяата артист, Сэрэгэй баруун тойрогой дуу, хатарай ансамблиин солист, Ким Базарсадаевай хүбүүн Саян Базарсадаев иигэжэ хэлэбэ:
- Энэ хэмжээ ябуулгада хабаадагшадта бултандань баярые хүргэнэб. Иимэ абатай байһандаа би омогорхоноб. Тэрэ ехэ шадамараар бас хоолойгоороо дуу хангюурдадаг һэн. Тэрэнэй дуунуудай, аринуудай буулгабаринууд үнэхөөрөө алтан жаса юм. Шэнэ зохёол сээжэлдэхэдээ, би өөрөө абынгаа буулгабаринуудые шагнадагби. Зарим хүнүүд абадаал адли хоолойтойш гэжэ намда хэлэдэг. Тиимэшье байжа болоо.Тэрэ эртэ наһа бараа. Мүнөө үхибүүдэйнгээ, аша зээнэрэйнгээ дуулахые шагнаха, хараха, үшөө олон юумэ хэхэ байгаал даа. Эндэ сугларжа, иимэ дулаахан үгэнүүдээр минии абые дурсажа байһандатнай баярые хүргэнэб.
Эдэл үдэрнүүдтэ Буряадай гүрэнэй оперо болон баледэй театрта Ким Базарсадаевай нэрэмжэтэ Дуушадай уласхоорондын мүрысөөн 5- дахияа үнгэргэгдэбэ. Буряад Уласай Засагай газарай дэмжэлгээр, Буряад Уласай Соёлой яаман, оперо болон баледэй театр, СССР-эй арадай артист К. Базарсадаевай нэрэмжэтэ соёлой жаса энэ хэмжээ ябуулга эмхидхэбэ.
Соёлой яаманай сайтһаа гэрэл зураг абтаба.
