853
Майн 11-дэ энэ заншалта хэмжээ ябуулга ниислэл хотын Соведүүдэй талмай дээрэ үнгэргэгдэжэ, олон зониие суглуулһан байна. Сэрэгэй албанда татагдаһан хүбүүдые үдэшэхэеэ түрэлхид, нүхэдынь, сэрэгшэд болон Буряад Уласай Засагай газарай түлөөлэгшэд ерэбэ.
Анханайхида орходоо тус баяр ёһолол үргэн дэлисэтэйгээр үнгэрбэ. Илалтын үдэрэйхидэл Соведүүдэй талмай дээрэ сэрэгэй мүнөө үеын эрилтэдэ харюусама сэрэгэй олон тоото түрүү техникэ, элдэб буу зэбсэгүүд болон нюуса хэлхеэ холбооной тусхай хэрэгсэлнүүд олоной анхаралда дэлгээгдэжэ, сугларагшадай һонирхол татаһан байна. Тэдэниие дуратай зон гартаа барижа, туршаха аргатай байгаа. Эдэ бүгэдэнтэй 36 дугаар сэрэгэй армиин алба хаагшад танилсуулаа юм. Тэрэнэй хажуугаар сэрэгшэдэй эдеэ хоол амталха болон алба хааха дуратайшуулай хэлсээ баталха майханууд ажаллаа.
Хэлсээ баталдаг таһагай дарга Максим Терентьевэй мэдээсэһээр, эндэ 70-аад залуу хүбүүд хандажа, 34-иинь мэдүүлгэ бэшэһэн байна. Дунда болон дээдэ мэргэжэлэй болбосоролой эмхи зургаануудые дүүргэһэн хүбүүд уялгата албанһаа гадна үшөө 2 жэлэй хэлсээ баталжа, алба хааха аргатай.
– Мүнөө жэлдэ Зүүн зүгэй сэрэгэй тойрогой штабай даабаряар 1500 сэрэгшэдые татаха ёһотойбди. Заншалта ёһоор тэдэнэр Зүүн зүгэй сэрэгэй тойрог эльгээгдэхэ, харин хэдэн бүлэг Баруун тээшээ ошохо юм. Сэрэгэй хубсаһа огто үмдэхэеэ арсаһан зон бии. Мүнөө тиимэ зон 200-гаад гэжэ тоологдоно. Гэхэтэй хамта, тэдэ зоной тоо жэлһээ жэлдэ үсөөрнэ, – гэжэ Буряад Уласай сэрэгэй комиссар Александр Трубников хэлэнэ.
Энэ үдэр Соведүүдэй талмай дээрэһээ 70-аад гаран хүбүүд сэрэгэй алба хэжэ, Эхэ оронойнгоо урда уялгаяа дүүргэхэеэ мордобо.
Анна Огороднигой гэрэл зураг
Энэ үдэр сэрэгэй хэрэгсэлнүүдые хэнэйшье барижа, шэнжэжэ үзэхэдэ болохо байгаа
Анна Огороднигой гэрэл зураг
Сэрэгшэд дайшалхы дүрэ арагнуудые харуулна
Анна Огороднигой гэрэл зураг
Илалтын үдэрэйхидэл Соведүүдэй талмай дээрэ мүнөө үеын эрилтэдэ харюусама сэрэгэй олон тоото түрүү техникэ, элдэб буу зэбсэгүүд болон нюуса хэлхеэ холбооной тусхай хэрэгсэлнүүд дэлгэгдээ
Анна Огороднигой гэрэл зураг
Сугларагшад сэрэгшэдэй эдеэ хоол туршаха аргатай байгаа
Автор: Елена ДАМДИНОВА
