796
Буряад Уласта буряад хэлэн болон бэшэгэй хэлэндэ зорюулжа, хүшөө бодхоохо гэһэн түсэл бэелүүлэгдэхэ.
Буряад Уласай Үндэһэтэнэй номой сангай дэргэдэ олониитын хабаадалгатайгаар, арадай барилгын аргаар хүшөө бодхоогдохоор түсэблэгдэнэ. Апрелиин 24-дэ энэ асуудалаар олониитын түлөөлэгшэдэй суглаан үнгэргэгдэһэн юм. Энэ хэмжэээ ябуулгада Буряадай гүрэнэй ехэ һургуулиин буряад хэлэ хүгжөөлгын түбэй, Ородой Холбоото Уласай Эрдэмэй академиин Сибириин таһагай Түбэд болон буддын шажан шэнжэлэлгын институдай, Арадай Хуралай Залуушуулай танхимай, Олониитын танхимай, “Найдал” жасын, “Байгал” гэһэн буряад хэлэн болон соёл хүгжөөлгын жасын түлөөлэгшэд, буряад хэлэ, бэшэгэй багшанар хабаадаһан байна.
Эмхидхэгшэдэй хэлэһэнэй ёһоор, табигдаха скульптурада буряад хэлэнэй болон бэшэгэй хэлэнэй хүгжэлтын түүхын шатанууд харуулагдаһан байха ёһотой. Тиихэдээ уран гараар бүтээгдэһэн эрхим хүдэлмэри шэлэн абагдаха болоно гэжэ эмхидхэгшэд тэмдэглэнэ. Конкурсдо хабаадаха дуратайшуул бүтээһэн ажалнуудаа А3 түхэлэй саарһан дээрэ гү, али презентаци хэжэ эльгээхэ болоно. 2017 оной июниин 11 болотор үглөөнэй 10 сагһаа үдэшын 17 саг болотор Буряад Улас Ранжуровай гудамжада оршодог 4-дэхи байшан гэһэн хаягаар ажалнуудаа эльгээхэдэ болохо. Илагшадые конкурсын комисси элирүүлхэ юм.
