​Эмшэдэй һайндэр тэмдэглэгдэбэ

Эмшэдэй мэргэжэлтэ һайндэртэ зорюулагдаhан баяр ёhололой суглаан Улаан- Үдэ хотодо үнгэрөө.

Ород драмын театрай байшан соо Буряад Уласай элүүрые хамгаалгын һалбариин эрхимүүд уригдажа, амжалтатайгаар ажалладаг эмшэдтэ Буряад Уласай болон Элүүрые хамгаалгын яаманай Хүндэлэлэй тэмдэгүүд, Баярай бэшэгүүд барюулагдаа. Жэл бүри эгээл эрхим эмшэдые тодоруулдаг Буряад Уласай урилдаанай дүнгүүд заншалта ёһоороо соносхогдобо. Тиигэжэ элүүрые хамгаалгын эмхиин эгээл эрхим хүтэлбэрилэгшэ гэжэ Улаан-Үдын 4 дүгээр больницын хүүгэдэй поликлиникые даагша Галина Федотова тодоруулагдаба. “ Эрхим врач-2017” гэһэн уласай хэмжээнэй харалгын илагшад элирүүлэгдээ. Шүдэнэй 2 дугаар поликлиникын эмшэн – ортопед Дашидоржи Цымпилов, туберкулез үбшэнһөө һэргылэмжын диспансерэй хүүгэдэй эмнэлгын таһагые даагша Лариса Амараева, БСМП-гэй уролог эмшэн Алексей Сакияев гэгшэд эгээл эрхим эмшэд гэжэ тэмдэглэгдээ. Харин эгээл эрхим залуу эмшэн гэһэн шэглэлээр БСМП-гэй хүүгэдэй эмнэлгын таһагай травматолог – ортопед Олег Козлов тодорбо.

Һаяын сагта Буряад орондо Ородой Холбоото Уласай элүүрые хамгаалгын сайд Вероника Скворцова ажалай хэрэгээр ерэхээр хараалагдана. Энэ уулзалгаһаа Буряад Уласай эмнэлгын газарнуудай хүгжэлтын олон асуудалнууд дулдыдаха юм. Жэшээнь, Буряад Уласай хабдарта үбшэнэй диспансерэй байшан барилгын асуудал мүнөө сагта амин шухала болонхой. Мүнөө байһан байшан үргэдхэгдэжэ, шэнэ оньһон хэрэгсэлнүүдээр хангагдаха хэрэгтэй. Семашкын нэрэмжэтэ уласай больницада гурбадахи ээлжээнэй барилга болохоор түсэблэгдэнхэй. Ехэ хэмжээнэй энэ эмнэлгын газарта бүхы һалбаринууд хүгжөөгдэхэ бшуу.

- Манай уласта холо оршодог хүдөө һууринуудта хабаатай гүрэнэй программа бэелүүлэгдэжэ эхилһэниинь тон һайшаалтай. Тэрэнэй ёһоор, 237 сая түхэриг мүнгэн шэглүүлэгдээ. Июниин 3-да МИ- 8 гэһэн эмнэлгын түхеэрэлгэнүүдтэй вертолет абтагдаа. 30 час ниидэжэ, хүн зоной ами наһан абарагдаад байна, - гэжэ Александр Октябревич мэдээсэбэ.

Хэрбэеэ нарай хүүгэдэй эмнэлгын түб байгша оной һүүл һарада ашаглалгада тушаагдаха һаа, хабдарта үбшэнэй шэнэ байшан түсэбэй ёhоор 2018-2020 онуудта баригдаха. Энэ барилгада 3-4 тэрбүм (миллиард) түхэриг гаргашалагдаха юм.

Түргэн туһаламжын вертоледой бууха талмай барилгын асуудал баһал шиидхэгдэхэ. Мүнөө сагта Улаан-Үдын авиазаводой болон Дээдэ Онгостойдо оршодог талмайнууд хэрэглэгдэнэ.