​Сагдаануудай туһалагшадай хуралдаан

Yнгэрһэн долоон хоногой эсэстэ Буряад Уласай арадай дружиннигуудай хуралдаан эмхидхэгдэбэ. Тус хэмжээ ябуулга хоёрдохиёо үнгэргэгдэбэ гэжэ тэмдэглэхэ шухала. 

Аюулгүйе сахилгын ажаябуулгада ажаһуугшадые хабаадуулха тухай федеральна хуулиин 2015 ондо баталагдахада, Ород гүрэн дотор дружиннигуудай эмхинүүд байгуулагдажа эхилээ hэн. Манай уласта Сэлэнгэ аймагта 2015 оной сентябрь hарада түрүүшын эмхи байгуулагдаа һэн. 

Аймагай Дотоодын хэрэгүүдэй яаманай таһагые даагша Великтон Содноповой хэлэһээр, һүүлэй байдалаар 275 эмхи Буряадта тоологдоно, 2,5 мянга гаран хүн хабаадуулагдана. 

Буряад Уласай Засагай газарай Түрүүлэгшын орлогшын уялгануудые дүүргэгшэ Петр Мордовскойн хэлэһээр, дружиннигууд манай ажабайдалда тон хэрэгтэй албан гээшэ. 

- Дружиннигууд үйлсэдэ гаража, эрхэтэдэй аюулгүйе хамгаална. Мүн тиихэдэ хүдөө нютагуудта түймэрһөө һэргылэлгын ажал арад зоной дунда ябуулна. Түймэр унтараалгада олонхинь хабаадана, - гэжэ Петр Мордовской хэлээ. 

Дотоодын хэрэгүүдэй яаманай сайд Олег Кудиновай мэдүүлһээр, 2016 ондо гэмтэ ябадалнуудай тоо 16 процентээр доошолоо. Энэ ушарта дружиннигуудай үзүүлһэн туhа сэгнэшэгүй. Тэдэ полициин ажалшадтай нягта харилсаа холбоотойгоор хүдэлнэ ха юм. 

Дружиннигуудай ажал ябуулхын түлөө мүнөө жэлдэ 4,5 сая түхэриг дамжуулагдаха юм. Хуралдаанда хабаадаhан дружиннигууд түрүүшын туһаламжа үзүүлжэ һураа. ОМОН-ой сэрэгшэд тэдэниие гар тулалдаанай нюусануудтай танилсуулаа. Эгээл эрхимээр хүдэлһэн дружиннигууд Баярай бэшэгүүдтэ, үнэтэ бэлэгүүдтэ хүртэбэ.

Шалгарагшадые шагналгын үедэ

Борис Балдановай гэрэл зурагууд