681
Буряадай оперо болон баледэй дуушан Астана хотодо августын 15-һаа 25 болотор Евразиин хүгжэмэй уласхоорондын мүрысөөндэ хабаадаха.
«ЭКСПО-2017» гэһэн Бүхыдэлхэйн уласхоорондын үзэсхэлэнэй хэмжээндэ тус мүрысөөн түрүүшынхиеэ үнгэргэгдэхэ. Казахстанай үндэһэтэнэй соёл урлагай дээдэ һургуули, Соёл урлаг дэмжэдэг Европын жаса хүгжэмэй мүрысөө эмхидхэбэ. Дэлхэйн 18 гүрэнүүдэй 12-35 наһатай хүгжэмшэд, дуушад мүрысөөндэ хабаадаха юм.
Казахстан уласай арадай зүжэгшэн Айман Мусаходжаева, Ородой Холбоото Уласай оперын дуушан Любовь Казарновская, СССР-эй арадай зүжэгшэн Константин Орбелян, Пабло Сарасете гэгшын нэрэмжэтэ уласхоорондын мүрысөөнэй лауреат Карэн Шахгалдян, Казахстан уласай габьяата артист Шахимардан Абилов, Юрий Диденко болон Альберт Мамриев пианистнууд, Talent Music Master courses гэһэн Италиин академиин юрэнхылэгшэ болон уран һайханай хүтэлбэрилэгшэ Паоло Бальери, Казахстанай соёлой габьяата хүдэлмэрилэгшэ Тимур Урманчеев, Италиин скрипач болон дирижёр Пьерклаудио Феи, Турциин Бурса хотын гүрэнэй симфоническа оркестрэй захирал Гекче Озлер, Анкара хотын Гүрэнэй оперо болон баледэй театрай захирал, дуушан Метин Туран, Украинын түлөөлэгшэ, уласхоорондын мүрысөөнүүдэй лауреат Геннадий Кабка гэгшэд мүрысөөнэй жюриин гэшүүд болохо юм.
- Красноярск хотодо хабар Словцовой нэрэмжэтэ гала-концертдэ хабаадаха үедэмни, хүгжэмэй мүрысөөндэ хаба шадалаа туршаха дурадхал намда Любовь Юрьевна Казарновская оруулһан байна. Түрүүшынхиеэ эмхидхэгдэжэ байһан хүгжэмэй наадануудта бүхы дэлхэй дуушад хабаадаха. Би ород, англи, француз, итальян хэлэнүүд дээрэ дуунуудые гүйсэдхэхэб, -гэжэ Михаил Пирогов хэлэбэ.
