777
Сентябриин хоёрто Н. А. Бестужевай нэрэмжэтэ ород драмын театр Калининград хото гастрольдо гараһан байна.
Калининград можын драмын театрай тайзан дээрэ Сергей Левицкын «Фронтовичка» гэһэн зүжэг болон «Анатэма. Посвящение кино» найруулга сентябриин 5-6-най үдэрнүүдтэ Буряадай ород драмын театрай зүжэгшэд харуулха юм. Тэдэнэр зургаан мянган модоной зай гаталжа, арбан тонно тайзанай шэмэглэл абажа ошоһон байна.
Анна Батуринагай бэшэһэн «Фронтовичка» гэһэн пьесэ Н. А. Бестужевай нэрэмжэтэ ород драмын театрай амжалтатай зүжэгүүдэй нэгэн юм. Тэрэ Москва, Санкт-Петербург, Новосибирск, Красноярск хотонуудай театрнуудай тайзан дээрэ табигдаа. Леонид Андреевай хоррор жанрай «Анатэма. Посвящение кино» гэһэн зохёолоор найруулагдаһан зүжэг харагшадай зүрхэ сэдьхэлдэ хадуугдажа, илангяа залушуулай дунда мэдээжэ болоһон юм.
«Большие гастроли-2017» гэһэн зүжэгшэдэй гастрольдо гарахые дэмжэдэг түбэй хэмжээндэ, манай зүжэгшэд анха түрүүшынхиеэ Калининград хото гараба. Тиихэдэ Калиниград можын драмын театр байгша оной ноябрь һарада Буряад улас ерэжэ, эрхим зүжэгүүдээ харагшадта харуулха юм.
