583
Байгша оной декабриин 2-3-най үдэрнүүдтэ Улаан-Үдын наймаанай дэлгүүрнүүдтэ заншалта мяханай яармаг үнгэргэгдэхэ.
«Стимул», «Октябрьский», «Центральный», «СМП-398» дэлгүүрнүүдтэ, «Туяа», «Крестьянский», «Фортуна» гэһэн худалдаа-наймаанай комплекснүүдтэ хүдөө ажахы эрхилэгшэд мяха наймаалха. Декабриин 2-то үглөөнэй 10 сагһаа яармаг ажалаа эхилхэ. Тиихэдэ ажаһуугшад гахайн, үхэрэй, хониной, адуунай мяха, гэдэһэ дотор, мяханһаа буйлуулһан эдеэ хоол, загаһа болон жэмэс, һамар худалдажа абаха аргатай.
- Буряад Уласай хүдөө ажахын болон эдеэ хоолой яаман болон Улаан-Үдэ хотын захиргаантай хамта энэ хэмжээ ябуулга үнгэргэнэ. Мяханай яармагта 300-һаа дээшэ хүдөө ажахы эрхилэгшэд хабаадаха. Улаан-Үдын ажаһуугшад хямда сэнгээр мяха худалдажа абаха аргатай боложо, ехэ олоороо ерэдэг, - гэжэ Буряад Уласай Хүдөө ажахын болон эдеэ хоолой яаманай мүнгэ һомололгын болон агро эдеэ хоолой дэлгүүр хүгжөөхэ таһагай дарга Дамдин Намсараев хэлэбэ.
Заншалта болоһон мяханай яармагай удаа «Стимул», «Крестьянский» дэлгүүрнүүдтэ амаралтын үдэрнүүдтэ фермернүүд мяха наймаалха аргатай.
Буряад Уласай хүдөө ажахын болон эдеэ хоолой яаманай мэдээсэһээр, ажаһуугшад уласта үйлэдбэрилһэн эдеэ хоол худалдан абана. Буряадта эдеэ хоолой үйлэдбэриин хэмжээн байгша ондо дээшэлһэниинь тэмдэглэлтэй.
2017 оной юһэн һарын туршада колбаса үйлэдбэри 3,7 хубяар, мяханһаа буйлуулһан эдеэ хоолой үйлэдбэри 28% хубяаар дээшэлэһэн байна. Зунай сагта һү үйлэдбэрилдэг эмхинүүдтэ нёдондо онтой жэшэхэдэ, тоһоной үйлэдбэри 17,4 хубяар ургаа. Шэнэ жэлые угтуулан амтан шэхэр үйлэдбэрилдэг эмхинүүд 23 хубяар үйлэдбэриеэ дээшэлүүлһэн байна.
Эдеэ хоол үйлэдбэрилдэг эмхинүүд суг хамта ажалаа аша үрэтэйгөөр ябуулжа, байгша оной арбан һарын туршада үйлэдбэрииеэ 10,3 хубяар (8699,57 сая түхэригөөр) дээшэлүүлээ.
