​Буряад Уласта мяханай яармагай дүнгүүд согсологдобо

2017 оной декабриин 2-3-най үдэрнүүдтэ Улаан-Үдэдэ үнгэргэгдэһэн мяханай яармагай дүнгүүд согсологдобо.

Борис Балдановай гэрэл зураг.

Улаан-Үдын худаалдаа наймаанай дэлгүүрнүүдтэ үнгэргэгдэһэн мяханай үзэсхэлэн-яармаг Буряад Уласай Хүдөө ажахын болон эдеэ хоолой яаман, Улаан-Үдэ хотын захиргаан эмхидхэһэн байна. Энэ хэмжээ ябуулгада 200-гаад хүдөө ажахы үйлэдбэрилэгшэд, эд хэрэглэгшэдэй эмхинүүд болон үмсын ажахынууд хабаадаа. Хоёр үдэрэй туршада хамтадаа зуугаад сая түхэригэй 470 тонно мяхан худалдагдаһан байна. 

Үнгэрэгшэ жэлдэ 85 сая түхэригэй 450 тонно мяхан наймаалагдаа. Тиихэдэ мяханай сэн дээшэлһэн байна, килограмм үхэрэй мяхан 250-һаа 280 хүрэтэр, гахайн мяхан 230-250 түхэригтэ болоо. Саашадаа амаралтын үдэрнүүдтэ «Стимул» болон «Крестьянский» дэлгүүрнүүдтэ мяханай яармаг үнгэргэгдэжэ байха гэжэ Буряад Уласай Хүдөө ажахын болон эдеэ хоолой яаманда мэдээсэнэ. 

Борис Балдановай гэрэл зурагууд