Февралиин 7-до Буряад Уласай Засагай газарай Түрүүлэгшын орлогшо, хүдөө ажахын сайд, халдабарита үбшэнэй дэлгэрэлгые һэргылхэ комиссиин түрүүлэгшэ Даба-Жалсан Чириповэй хүтэлбэри доро үргэн ехэ суглаан үнгэрөө.
Эндэ сугларагшад хүнүүдэй болон амитадай дунда дэлгэрдэг хумхаа үбшэниие (бешенство) сараха хэмжээнүүд тухай хэлсэһэн байна.
Энэ ехэ суглаанда федеральна болон уласай эмхи зургаануудай, муниципальна байгууламжануудай түлөөлэгшэд, Владимир, Омск, Иркутск хотонуудһаа уригдаһан эрдэмтэд хабаадаа. Даба-Жалсан Шагжиевич бултаниие эблэржэ, энэ ехэ аюултай үбшэнтэй тэмсэжэ зогсооел даа гэжэ суглаанай эхиндэ уряалаа. Хумхаа үбшые саг дары зогсоогоогүй һаа, малшадта ехэ гарза ушаруулха. Тэжээһэн малаа үүсэлжэ, мяхыень хэрэглэхын орондо хоггүйгөөр галдаха ёһотой. Тиихэһээ гадна, хумхаа үбшэн дэлгэрбэл, хүндэ халдаха аюултай.
Эд хэрэглэгшэдэй эрхэнүүдые хамгаалгые хинадаг федеральна албанай управлениин хүтэлбэрилэгшэ Сергей Ханхареев улас дотор хумхаа үбшэнэй ямар аймагуудта дэлгэрһые хөөрөөд, ерэһэн эрдэмтэдтэ баяраа мэдүүлээ. Энэ халдабарита үбшэнтэй үрэ дүнтэйгөөр тэмсэхын тула эрдэмтэдэй шэнжэлгэнүүд тон хэрэгтэй гэжэ тэмдэглээ.
Буряадай малай эмшэдэй захиргаанай хүтэлбэрилэгшэ Эрдэм Сангадиев, Эд хэрэглэгшэдэй эрхэнүүдые хамгаалгые хинадаг федеральна албанай управлениин хүтэлбэрилэгшын орлогшо Елена Кузьмина гэгшэд хумхаа үбшэнтэй тэмсэлгын хэмжээ ябуулганууд тухай хөөрөө.
Буряадтамнай ямар арьяатад хумхаа үбшөөр үбдэдэг бэ гэжэ амитадые хамгаалдаг, тоо толгойень гуримшуулдаг уласай албанай хүтэлбэрилэгшэ Сергей Щепин элидхээ. Хумхаа үбшэ дэлгэрүүлдэг арьяатад гэхэдэ, гол түлэб шоно, үнэгэн болоно. Илангаяа галзуурһан шоно аюултай. Тэдэ үсөөншье һаа, нэгэ мянгал тоологдоно, ехэ түргэн холуур зайжа ябадаг гээшэ. Харин мүнөө хумхаа үбшэ үнэгэнүүд дэлгэрүүлнэ. Тиимэһээ эдэ арьяатадые агнаха ажал эршэтэйгээр ябуулагдана. Бүхыдөө 1900 ангуушад ганса нэгээрээшье болон бүлэгүүдээр агнана. Тиимэ 70 бүлгэм байгуулагданхай. Юрэдөө, үнэгэн мүнөө сагта ехээр олзоборилогдодоггүй. Арһаниинь сэн хүрэхэеэ болинхой. Тиимэһээ хумхаа үбшэнтэй тэмсэлгын энэ үедэ нэгэ үнэгэнэй түлөө 5 мянган түхэриг шан үгтэнэ.
Элүүрые хамгаалгын яаманай таһагые даагша Наталья Логина уласта ажаһуугшадые хамгаалгын хэмжээ ябуулгануудай хэр бэелүүлэгдэжэ байһан тухай хөөрөө. Халдабарита үбшэнүүдтэй тэмсэлгын уласай түб байгуулагданхай, аймагуудаар 80 бригада хүдэлнэ гэжэ Наталья Юрьевна хэлэбэ. Һаяын мэдээгээр, нохойнуудта хазуулһан 3 мянга гаран зон эмшэдтэ хандаа. Тэдэнэй 57 хубинь Улаан-Үдын ажаһуугшад болоно. Ехэнхидээ үхибүүд хандана, энэнь ехэ һанаа зобооно.
Ямаршье амитанда хазуулбал, нэн түрүүн сабангаар (мылээр) угаагаад, спиртээр гү, али архяар, йодоор арюудхаха хэрэгтэй. Тиигээд тэрэ шархаяа оюулхагүй!
Хүн зониие һэргылэмжын хэмжээ ябуулганууд үргэнөөр ябуулагдана. Тиигэбэшье зарим аймагуудта хүсэлдүүлнэгүй. Нютаг нютагуудай захиргаанууд анхаралаа муугаар табина гэжэ тэмдэглэгдээ.
Сугларагшад эрдэмтэдэй элидхэлнүүдые анхаралтайгаар шагнаа. Амитадые хамгаалгын федеральна түбэй орлогшо захирал Артём Метлин, энэл түбэй лабораториие даагша Михаил Шульпин гэгшэд бүхыдөө орон соомнай хумхаа үбшэнтэй яажа тэмсэдэг бэ гэжэ хөөрэжэ үгөө. Омскын эрдэм шэнжэлэлгын институдай Елена Полищук хумхаа үбшэн хилэ гэжэ хизаарлахагүй, ехэ түргэн таран дэлгэрдэг хадаа бүри аюултай гэжэ һэргылбэ. Ехэнхидээ арьяатанай хазахада халдадагшье һаа, баһал миил үбшэн амитантай дайралдаһан хүндэшье халдажа болохо юм. Энэмнай ехэнхидээ нохойнууд болоно. Тиибэшье мүн баһа миисгэйһээ болон үрэмшөөһөө халдаха аюул ушардаг.
Буряадта 2011-2012 онуудаар урда хилэһээ эхилжэ, хумхаа үбшэн дэлгэрһэн байха юм. Харин 2017 ондо Үбэр Байгалай хизаарһаа нэбтэрээ гэжэ Эрхүүгэй ехэ һургуулиин Ренат Адельшин мэдүүлээ. Энэл һургуулиин проректор Александр Ботвинкин түрүүшын вакцина аяар 1885 ондо найруулжа, хэдэн сая зоной ами наһа абарһан юм гэжэ мэдээсээ. Тэрэ гэһээр эрдэмэй һалбари урагшаа дабшаа, олон шэнэ нээлтэнүүд хэгдэнэ. Тиимэһээ хумхаа үбшэнтэй тэмсээн, тэрэниие һэргылэлгэ шэнэ шатада гаранхай, харин тэдэниие саг дары хэрэглэхэ шухала гэжэ мэдүүлээ.
Юрий ЦЫРЕНОВ