Василий Маланов
Хурамхаан аймагай Захиргаанай болбосоролой таһагые даагша Василий Малановтай уулзажа, аймаг доторхи һуралсалай һалбариин хэрэг тухай хөөрэлдэбэбди.
- Василий Цыремпилович! Танай аймаг дотор һуралсалай эмхинүүдтэ бүхыдөө хэды үхибүүд һурадаг гээшэб?
- Хурамхаан аймагта 28 һуралсалай эмхи 2018 ондо ажалаа ябуулна: 12 дунда һургуули, хүүгэдэй 12 сэсэрлиг болон нэмэлтэ һуралсалай 4 эмхи болоно. Һургуулинуудта бүхыдөө 2014 һурагша һурана, сэсэрлигүүдтэ 848 үхибүүн хүмүүжүүлэгдэнэ, нэмэлтэ һуралсалай эмхинүүдтэ 1428 үхибүүн ябадаг. Эдэ бүхы эмхинүүдтэ дүн хамта 737 мэргэжэлтэн ажаллана.
- Һуралсалай ямар шэглэлдэ гол анхарал табигдадаг гээшэб?
- Һүүлэй жэлнүүдтэ бүхы һургуулинуудта, сэсэрлигүүдтэ гүрэнэй шэнэ стандартнууд тон эдэбхитэйгээр нэбтэрүүлэгдэнэ. Үхибүүдтэ дээдэ шанарай болбосорол олгуулха гээшэ эгээ шухала зорилгомнай болоно. Тиимэһээ багшанар, хүмүүжүүлэгшэд һурагша бүхэнэй наһанай хэмжүүртэ таарама онол аргануудые хэрэглэжэ, тэдээндэ эрдэм мэдэсэеэ дээшэлүүлхэ дадал олгуулна. Мүн тиихэдэ гол зорилгоёо бэелүүлхын тула бидэнэй урда үшөө олон асуудалнууд бии. Тэдэнэй нэгэниинь гэхэдэ, эмхинүүдтэ мүнөө сагай эрилтэнүүдтэ таарама байшангууд хэрэгтэй. Һүүлэй гурбан жэлнүүдэй хугасаада аймаг соомнай хүүгэдэй 5 сэсэрлиг һэльбэн шэнэлэгдээ, бүхыдөө энэ хэрэгтэ 19 хахад шахуу сая түхэриг гаргашалагдаа.
- Мүн һургуулинуудшье заһабарилагдаа, шэнэлэгдээ бэзэ?
- 2017 ондо Гүрэнэй программаар мүнгэн тусхайлагдажа, Аргадын дунда һургуулида 15 сая 747 мянга гаран түхэриг һомологдожо, һэльбэн шэнэлэлгын ажал хэгдээ. Үшөө тиихэдэ Хурамхаанай нэмэлтэ һуралсалай түб шэнэ байшантай болоо. Һэльбэн шэнэлэлгэдэ, һуралсалай хэрэгсэлнүүдые ба эд бараа худалдажа абалгада бүхыдөө 6 сая 280 мянган түхэриг гүрэнэй болон аймагай һанһаа һомологдоһон байха юм.
Хэжэ байһан ажалаймнай дүнгүүд хадаа - үхибүүднай һайн шанартай һуралсал абажа, элдэб олимпиаданууд, мүрысөөнүүд, харалгануудта эдэбхитэйгээр хабаадана, амжалтануудые туйлана. 9-дэхи, 11-дэхи ангинуудые дүүргэгшэдэй олонхинь гүрэнэй шалгалтануудые амжалтатайгаар тушаажа, дээдэ болон дунда мэргэжэлэй һургуулинуудта һурана. Аймагаймнай багашуул 3 наһанһаа 7 наһа хүрэтэр булта хүүгэдэй сэсэрлигүүдтэ ябадаг.
Ажал хэрэгүүд түсэблэгдэһэн хэмдээ ябуулагдажал байдаг. Урдамнай үшөө олон түсэбүүд бии. Тэдэмнай булта бэелүүлэгдэжэ, нютагаймнай хүбүүд, басагад эрдэм шудалжа, зүб харгы шэлэжэ, шадамар бэрхэ хүнүүд боложо, нютагайнгаа нэрэ һүлдэ холо ойгуур һайн хэрэгээрээ суурхуулжа ябахал байха гэжэ найданаб. Юуб гэхэдэ, ерээдүймнай найдал – эрхим һурагшад ха юм даа.
- Һайн даа, Василий Цыремпилович, үүсхэһэн ажал хэрэгүүдтэтнай амжалта хүсэнэбди!
Цырегма САМПИЛОВА хөөрэлдэбэ