572
Буряад Уласай Толгойлогшо Алексей Цыденов Муяын аймагай засаг дарга Александр Киргизовтэй уулзаба. Тэрэнэй удаа Александр Киргизов тушаалаа сүлөөлхэ тухай мэдүүлгэ бэшэбэ. Муяын аймагай һунгамалнуудай зүблэлдэ мэдүүлгэнь дамжуулагданхай гэжэ Буряад Уласай Засагай газарай хэблэлэй албанда мэдээсэнэ.
Мартын 2-то Буряад Уласай Толгойлогшо Алексей Цыденов болон “Северобайкальск хото” гэһэн нютагай засагай байгууламжын дарга Константин Горюнов хоёр уулзаһан байна. Удаань Константин Горюнов өөрын дураар тушаалһаа бууха тухай мэдүүлгэ бэшээ гэжэ һануулнабди. Тус мэдүүлгэ Северобайкальск хотын һунгамалнуудай зүблэлдэ дамжуулагданхай.
«Үнгэрһэн, байгша жэлнүүдтэ хойто аймагуудаар ябажа, гаргаһан дүнгүүдээр Северобайкальск хотын хүтэлбэрилэгшэтэй уулзаһан байнабди. Тиихэдэ олон асуудалнууд гараһан байна, тэрэ тоодо олзо тухай мэдүүлгэ, хүндөөр үргэжэ байһан дулаа үгэлгын хаһа, хүйтэн гэр байранууд болон бусад. Зарим асуудалнууд хэдэн жэлэй туршада шиидхэгдээгүй, тиимэһээ гэмнэхэ буруу. Тиигэбэшье зарим тэды асуудалнуудаар хүтэлбэрилэгшэ түргэн дары шиидхэбэринүүдые абаха аргатай байгаа», - гэжэ Алексей Цыденов хэлэһэн байна.
