Эдэ үдэрнүүдтэ Улаан- Үдэ хотодо үнгэржэ байһан “Найдал” гэһэн V уласхоорондын урилдаанда 400 шахуу хүүгэд эдэбхитэйгээр хабаадажа байна.
Тус урилдаан 1997 онһоо эхи абажа, дүрбэн жэлэй нэгэ удаа үнгэргэгдэдэг юм. Тиин байгша оной мартын 26-да “Найдал” урилдаан эмхидхэгдэжэ, хүгжэмэй элдэб янзын зэбсэгүүд дээрэ наададаг бэлигтэй хүүгэдые элирүүлхэнь. Мүнөө жэл Алас Дурна зүгэй, Эрхүү можын, Кемерово болон Новосибирск хотонуудай, Амарай, Үбэр Байгалай болон Красноярскын хизаарнуудай, Яхад, Хакаси болон Тыва уласуудай, Монгол ороной хүүгэдэй болон дунда мэргэжэлэй хүгжэмэй һургуулинуудай һурагшад хаба шадалаа туршажа байна. Уянгата һайхан хүгжэм шагнаха дуратайшуулай һонорто энэ удаа “Найдалнай” түрүүшынхиеэ “Россия 24” субагаар сэхэ дамжуулагдана гэжэ дуулганабди.
Буряад Уласай Соёлой яаманай соёлой ба уралигай хорооной түрүүлэгшын орлогшо Татьяна Дугарова холо ойроһоо ерэһэн хабаадагшадые болон айлшадые амаршалхадаа, энэ хэмжээ ябуулга уласаймнай 95 жэлэй ойн баярта зорюулагдажа, бүри ехэ удха шанартай болоно гэжэ тэмдэглээ. Мүн тиихэдэ харагшад 15 жэлэй саана “Найдал” урилдаанай илагша болоһон Дмитрий Малеевэй видео-хандалга шагнаба. Тэрэ нэн түрүүн хабаадагшадта амжалта хүсэн, урилдаанда хабаадаһан тухайгаа иигэжэ хэлэбэ:
- Үсэгэлдэр лэ хабаадаһан шэнгеэр намда үзэгдэнэ. “Найдал” урилдаанай илагшын нэрэ зэргэ наһанайм саашанхи харгыда ехэ туһатай байгаа. Гадна 2014 ондо энэл урилдаанда түрүүшынхиеэ гансаараа тайзан дээрэ гаража, бэлигээ харуулһан байнаб.
П.И. Чайковскиин нэрэмжэтэ уралигай колледжын захирал Баир Турбянов эдир хүгжэмшэдые амаршалжа, урилдаанда зоригтойгоор хабаадахыень уряалба.
Энэ жэлэй “Найдал” урилдаанай Гран-при шанда хүртэһэн хабаадагшада эритэ зэбсэгүүдые бүтээдэг мэдээжэ уран дархан Жигжит Баясхалановай мүнгөөр ба хас эрдэнеэр бүтээһэн Кубок барюулагдаха, мүн тиихэдэ Франци гүрэндэ үнгэргэгдэдэг хүгжэмшэдэй урилдаанда хабаадаха арга олгогдохо.
Эршэ ехэтэй тус урилдаанай үедэ мастер-классууд үнгэргэгдэхэ, үхибүүд болон хүтэлбэрилэгшэдынь мэргэжэл дээшэлүүлгын һуралсал гараха. Түгэсхэлэй тоглолто болон лауреадуудые шагналгын баяр ёһолол мартын 29- дэ Гомбо Цыдынжаповай нэрэмжэтэ Буряадай Гүрэнэй оперо болон баледэй театрта үнгэрхэ. Эндэ уласхоорондын урилдаануудай лауреат, мэдээжэ пианист Екатерина Мечетина хабаадаха юм. Энэ ехэ хэмжээ ябуулга Буряад Уласай Толгойлогшын дэмжэлгээр үнгэргэгдэнэ гэжэ тэмдэглэе.