902
Байгша оной май һарын эхиндэ Буряадай Үндэһэтэнэй 1-дэхи лицей-интернадай хүүгэдэй жэшээтэ «Наран» бүлгэм Солонгос орондо гурбадахияа үнгэргэгдэжэ байһан уласхоорондын фестивальда хабаадажа ерэбэ.
Санкт-Петербург хотын «Салют талантов» гэһэн урлалай холбооной зүбшөөлөөр болон Ородой Холбоото Уласай Солонгос орондо байрлаһан посольствын тэдхэмжээр энэ ехэ фестиваль Сеул хотодо майн дүрбэндэ үнгэрбэ. «Наран» бүлгэмэй ударидагша Арюна Николаевна Жанчикова, ахамад хүмүүжүүлэгшэ Оюна Валерьевна Лыгденова ба хүмүүжүүлэгшэ Эржэн Ивановна Чернинова гэгшэд һургуулиингаа хорин гурбан һурагшадые ударидажа ошобод.
Энэ ехэ хэмжээ ябуулгада ошохынгоо урда тээ «Наран» бүлгэм Буряадай уласай багшанарай, мүн П.И. Чайковскиин нэрэмжэтэ урлалай колледжнуудай тайзан дээрэ өөһэдынгөө гурбан ехэ тоглолто үнгэргэбэ. Тоглолтын үнгэрхэ үедэ «Наранһаа» эхи заха абажа, мүнөө сагта гансашье Буряад Уласта мэдээжэ бэшэ, харин хаа-хаанагүй нэрэ солотой болоһон һургуулиин түгэсхэгшэд, Буряад Уласай арадай дуушан Бадма-Ханда Аюшеева, Г.Ц. Цыдынжа́повай нэрэмжэтэ Буряадай гүрэнэй оперо болон баледэй театрай дирижёр Александр Саможапов, Галсанимын Гандик гэгшэд хабаадалсаһан. Улаан-Үдэ хотынгоо зониие хатар, дуугаараа баярлуулжа, харгы замайнгаа мүнгэ салин олоо гээшэ.
Фестивальда арбан долоон бүлгэмүүд хабаадажа, хатар, хүгжэм, арадай зэмсэгүүд, зүжэг гэһэн номинацинуудаар хубаараа. Өөһэдынгөө бэлиг талаангаа харуулха гэжэ туршахаяа ерэһэн айлшад гэхэдэ, Москваһаа, Приморскын хизаарһаа – Арсеньев, Находко, Уссурийск, Владивосток хотонуудһаа, Владимиро-Александровск һууринһаа, Ивдель-Свердловск можоһоо ерээ, Нижневартовск – Ханты-Мансийска автономито тойрогһоо, Хабаровскын хизаар түлөөлһэн – Хабаровск хотоһоо, Советская Гаваньһаа, Буряад Уласай Улаан-Үдэһээ, манай түрэл болохо Хальмагай ниислэл хото - Элһэтэһээ, Саха (Яхад) Уласай Якутск хотоһоо, мүн тиихэдэ Казахстанһаа – Алматыһаа, Солонгос оронойнгоо ёһо заншал дурадхаһан Сеул болон Сувон хотонуудһаа фестивальда морилоо.
Буряадай бүлгэм "Хатар" гэһэн номинацида хабаадажа, Сеул хотын ехэ тайзан дээрэ буряад арадайнгаа элинсэг хулинсагайнгаа нангинаар сахижа ябаһан ёһо заншал дээрэ үндэһэлжэ табигдаһан «Байгалай домог» гэһэн ехэ хатар болон анда түрэл болохо эвенк арадуудай хатар олоной һонорто дурадхажа, жюриин дура буляажа, түрүүшын һуури эзэлбэ. Мүн тиихэдэ фестивалиин айлшадай нюдэ баярлуулжа, шэхэ хужарлуулан, жюриие гайхуулжа, бүхы фестивалиин Гран-при гэһэн эгээл ехэ шандань хүртэжэ, октябрь һарада Санкт-Петербург хотодо үнгэрхэ хатарай фестивалиин урилгада хүртэжэ, һургуулиингаа багшанарые, һурагшадые, ажалшадые ба гэртэхинээ, түрэлхидөө баярлуулаа юм.
«Наран» бүлгэм үнэхөөрөөшье арадайнгаа ёһо заншал үргэжэ, хүгжөөжэ, һэргээжэ ябаһаниинь һурагшадай хатархада, дуулахада ехэ элиржэ, тодоржо гараа гэхэдэ, алдуу болохогүй", - гэжэ жюриин түрүүлэгшэ тодорхойлжо дурдаа.
Һурагшад, ударидагшад фестивальда хабаадахаһаа гадна Солонгос ороной гоё һайхан байгаалитай, болон Кёнбоккун хаанай ордон, Намсан үндэр башни, Эверленд гэһэн газарнуудаар ябажа танилсаа, худалдаа наймаанай дэлгүүрнүүдээр аяншалжа, өөһэдынгөө сүлөө саг һайханаар үнгэргэжэ, баяртайнууд Буряадаа бусаа.
«Наран» бүлгэмэй Солонгос ороноор аяншалжа, фестивальда хабаадажа ерэхынь тула туһалсаһан, эбээн тэдхэгшэ болоһон һургуулиингаа түгэсхэгшэдтэ - Анна Жаповна Будаевада, Цыбикова Жаргалма Лобсондоржиевнада, мүн тиихэдэ һурагшадай гэртэхиндэ - Цыпилма Цыденовна Цыренжапова, Светлана Цыдендамбаевна Бадмаева гэгшэдтэ һайниие хүргэжэ, буянтай бурхантай, зол жаргалтай, энхэ элүүр ябыт даа гэжэ “Наран” ансамблиин гэшүүд хүсэхэ байна.
Автор: Борис БАЛДАНОВ
