​Буряад Уласай аймагуудай болон Улаан-Үдэ хотын һурагшад авиациин заводой ажал хүдэлмэритэй танилсаба

Аймагуудай болон Улаан-Үдэ хотын 400-гаад һурагшадай хабаадалгатайгаар ВСГУТУ-гай байшанда тодо эрдэмүүдэй шэглэлээр “Авиатор” гэһэн олимпиада майн 17-до үнгэргэгдөө.

“Улаан-Үдын авиациин завод” ОАО-гой зууршалгаар ба Буряад Уласай Болбосоролой болон эрдэм ухаанай яаманай, Буряад Уласай эрдэм ухаанай бодолгын институдай дэмжэлтээр энэ олимпиада түрүүшынхиеэ эмхидхэгдээ. Тоо бодолго, физикэ, информатика, хими – эдэ дүрбэн шэглэлээр һурагшад хоорондоо эрдэм мэдэсэеэ шалгажа, илагшад элирэн гараа бшуу. 9-11-дэхи ангиин хүбүүд, басагадай дунда техническэ шэглэл шэлээд, заводто саашадаа хүдэлхэ арга боломжо тэдэндэ олгуулхын тулада энэ олимпиада эмхидхэгдээ.

Институдай мэргэжэлтэд олимпиадын дүримүүдые согсолон бэлдэжэ, хаа-хаанаһаа сугларһан бэлигтэй һурагшадай эрдэм мэдэсэ тусхай онол аргаар шалгажа, эгээл эрхимүүдыень элирүүлжэ гаргаһан байна. Улаан-Үдын авиациин завод тус хэмжээ ябуулгада 170 мянган түхэриг мүнгэ шагналай жасада һомолон гаргашалаа. Юрэнхы болбосоролой 9-дэхи дунда һургуулиин 30 һурагшад тус олимпиадада хабаадажа, Денис Иванов ба Виктор Ежиченко үндэр амжалта туйлаһан байна.

Үглөөдэрынь илагша бүлэг һурагшадые авиазаводой хүтэлбэрилэгшэд айлшаар урижа, үхибүүдтэ тусхай экскурси эмхидхэгдэһэн байна.

Тус эмхиин эрдэмэй болон техническэ номнолой байшаниие даагша Анна Гнитько заводой хэдэн цехэй ажал тухай тодорхойгоор хөөрэжэ үгөө. Зургаа мянган хүнһөө бүридэдэг энэ үйлэдбэриин ажал хэрэгтэй һурагшад бодото дээрэнь танилсажа, вертолёт хэдэн шатаһаа хабсаран бүтээгдэдэгыень ойлгожо абаһан байна. Механика суглуулгын цех соо вертолёдой бүридэлдэ ородог эгээл жэжэ хуби хэрэгсэлнүүдэйнь шудхалгын хүсөөр хэгдэдэгыень мүн лэ жэшээ дээрээ харуулан, һонирхолтой хөөрөө дэлгээ. Тусхай талмай дээрэ жэрын зогсоһон янза бүриин, ондо ондоо түхэлэй вертолёдуудые һурагшад хаража, ехэтэ һонирхоо. Тиихэдэ Советскэ Союзай Герой Дарма Жанаевай нэрэмжэтэ музей соогуур мүн лэ экскурси эмхидхэгдэһэн байна. Баян түүхэтэй авиациин заводой ажабайдалтай нягта дүтөөр танилсаха арга олгогдоһондонь, һурагшадшье, хүтэлбэрилэгшэ багшанаршье ехэ урмашаа.

Эгээл түрүүшынхиеэ иимэ холын хараатайгаар үнгэргэгдэжэ байһан ажаябуулгада авиазаводой ажалшадай оруулһан үүргэ нүлөөнь айхабтар ехэ гээд тэмдэглэлтэй. Юуб гэхэдэ, дунда һургуулияа дүүргэһэнэй удаа техническэ шэглэл шэлэһэн үхибүүдтэ Улаан-Үдын авиационно техникумдэ болон бэшэшье дээдэ һургуулинуудта орожо һураха тусхай һууринууд дурадхагдана бшуу. Тус һуралсалай эмхинүүдтэ һуралсал гаргуулхаһаа гадуур хамтын байрада һуури үгтэхэ, авиазаводто гурбадахи курсһаа практика гараха арга олгогдохо байна. Тэрээнһээ гадна токарь, таблагшын, түмэршэ дарханай эхин һууриин мэргэжэлтэй болохо аргатай. Һуралсалаа дүүргэхэдээ, энэл заводтоо юрын инженерһээ эхилээд, саашадаа мэргэжэлээ дээшэлүүлэн хүдэлхэ арга залуу үетэндэ олгогдохо юм.

Буряад Уласай Болбосоролой болон эрдэм ухаанай яаман ба Улаан-Үдын авиациин завод хоёрой хоорондохи холбоо харилсаан саашадаа улам үргэдэжэ, эхилһэн хэрэгынь урагшатай бэелүүлэгдэхэнь дамжаггүй.

Анна Гнитькогой гэрэл зураг