Улаан-Үдэ хотын Дээдэ Онгостойдо Үбэр Байгалай арадуудай угсаата зүйн музейдэ үзэсхэлэн нээгдээ.
Энэ үзэсхэлэн хоёр таһагта хубааран дэлгээгдэнхэй. Нэгэ таладань - сартуул, сонгоол, хори буряадай хубсаһан, нүгөө таладань - урда үеын үбгэ эсэгэнэрэймнай, тэрэ тоодо эхирид, булагад, хонгоодор угсаатанай хубсаһан харуулагданхай.
Буряад Уласай Засагай газарһаа жасаяа шэнэлхэ гэһэн грант шүүһэн байжа, иимэ үзэсхэлэн нээгдэбэ. Бүхы хубсаһануудыень Дашима Гончикова оёжо хамһалсаһан, баһа хажуугаарнь эрдэмтэд өөһэдынгөө зүбшэлнүүдые үгэжэ, эбтэйгээр энэ ажалаа ябуулһан байна. Жэшээнь, нэгэ хүнэй хубсаһа оёходо, хоёр һара тухай саг хэрэгтэй. Тэрэнь үшөө эхэнэрэй гү, али бүһэтэй хүнэй хубсаһан гээд, оёгдохо болзор дулдыдана. Олон уран гартанай хүсөөр хубсаһа шэмэглэһэн гоёолтонуудынь бүтээ. Ехэнхи ажалыень уран гартан Юрий Эрдынеев бүлэг зонтой дархалжа үгэһэн.
Һонирхолтой энэ үзэсхэлэн ошожо харахаар лэ! Манай үндэһэн соёл, тэрэ тоодо хубсаһан олондо һонирхолтой. Минии тэндэ байха үедэ немец яһанай бүлэг зон буряад хубсаһа һайхашаан гоёшоожо, гэрэл зурагуудыень буулгаад ошонод һэн.
Һарын туршада мянгаад шахуу харагшад энэ музей хүрэжэ, үзэсхэлэнүүдтэйнь танилсадаг байна. Август һарын дүүрэтэр, тус үзэсхэлэн ажалаа ябуулха.
Авторай гэрэл зурагууд