Сомоной дарга Леонид Сониев сугларагшадые амаршална
Кабанскын аймагай Корсаково сомоной «Сурхарбаан» һонирхолтойгоор үнгэрөө.
Үглөөнһөө бүрхэг, бороо орохо шэнги байһан аад, наран игаажа, һэрюухэн, һэбшээтэйхэн үдэр болобо. Хүгжэм наадажа, һайндэрэй амисхаал оруулагдаа, тиихэдэнь хүн зоной сэдьхэлшье жэгнээд абаа. Һэеы гэртэл баряатай модон гэр обог бүхэндэ бии. Тэндээ сугларжа, амтан хоолтой шэрээ дэлгээгээд, урин зулгы, хүндэмүүшэ зангаар ороһон айлшадаа сайлуулжа, хүндэлөөд табина.
Ехэ һайхан тоонто нютагни
Эльгэ зүрхым эзэлнэ.
Элдин халюун Корсаковомни
Эгээл һайханаар үзэгдэнэ....
Иимэ үгэнүүдээр хүтэлбэрилэгшэд найр наадаяа эхилээ.
Корсаково нютагайхид арбан угуудаараа командануудые бүридхэдэг юм. Уг бүхэн бүлэг байгуулаад, жагсаалда ябаба: Хайтал, Сэгээнэд, Абзай, Балтай, Хамнай, Яртха, Һэнгэлдэр, Ехэ шоно, Дархад, Баахай абзай.
Энэ найр наада нээхыень тайзан дээрэ “Корсаковское” гэһэн сомоной дарга Леонид Сониев, Кабанскын аймагай засаг даргын орлогшо Александр Плюснин, “Байгал”гэжэ эблэлэй түрүүлэгшэ Борис Ботоев, Кабанскын аймагай һунгамалнуудай зүблэлэй түрүүлэгшэ Семён Онтобоев, Байгалай “Дамба Даржалинг” гэжэ дасанай шэрээтэ Жаргал лама Санжиев гэгшэд уригдажа, сугларагшадые амаршалаа, бэлэгүүдээ баряа. Тон ехэ бэлэгынь гэхэдэ, аймагай захиргаан соносхоһон гол шан “ГАЗель 3302” түхэлэй авто-унаагай түлхюур сомоной дарга Леонид Сониевта барюулагдаа.
Нютагайнгаа аха захатаниие, 80, 85-най оройдо гарагша наһатайшуулаа, нютагаа холо ойгуур суурхуулжа ерэһэн зоноо Леонид Сахилович амаршалжа, Хүндэлэлэй бэшэгүүдые гарай бэлэгүүдтэйгээр барюулаа.
«Худара» ансамблиин дуушан Мария Убогонова
Сурхарбаан гоё гэгшын тоглолтоор эхилээ. Эндэ нютагай “Худара” ансамбль, дуушад Мария Убонова, Мария Карпова гэгшэд аялга дуунуудаараа, һургуулиин һурагшадай “Байгалай шуранууд” ёохор хатараараа, соёлой ажалтад шог зугаатай зүжэгөөр, хүн зоной сэдьхэл хужарлуулба.
Концерт нааданай үедэ
Тиигэһээр тамиршадай урилдаан эхилжэ, эндэ бүхэ барилдаан, хүнгэн атлетикэ, волейбол, гарай хүсэ үзэлсэлгэ, аргамжа таталга, һур харбалга гэһэн тамирай зүйлнүүдээр хүн зон хаба шадалаа туршалсаба. Уг бүхэн өөһэдынгөө эгээл шанга, хүсэ шадал һайтай тамиршанаа табиха гэжэ оролдоо.
Үдэрэй туршада тамирай зургаан зүйлнүүдээр урилдаан үргэлжэлжэ, дүнгүүдынь согсологдожо, эли болоо.
Бүхэ барилдаагаар 75 килограммай жэндэ нэгэдэхи һуурида Юрий Соболев, хоёрдохидо Матвей Олмоев, гурбадахи һуури Василий Уладаев гэгшэд эзэлбэ. 75 килограммһаа дээшэ жэндэ Владислав Балдагуев, Владимир Бутуханов, Баясхалан Баяев гэгшэд тус тустаа шангай һууринуудта гараба. Харин гол уулзалгада Владимир Бутуханов Юрий Соболев хоёр уулзажа, эндэ Юра хүбүүн шамбай шуран байһандаа диилэжэ, Сурхарбаанай абарга бүхэ боложо, Байгал дасанай шан - хониндо хүртөө.
Абарга бүхэ Юрий Соболев
Хүнгэн атлетикээр Абзай угайхид шүүбэ, хоёрдохи һуури Хайтал эзэлбэ, гурбадахи һуурида Сэгээнэд гараба.
Гарай хүсэ үзэлсэлгөөр хадаа Сэгээнэд илаба. Хоёрдохи һуури Хайтал, Балтай хубаабад, харин гурбадахи һуурида Абзай уг гараба.
Гар хүсэтэй Владимир Андреев
Оюна Ефимова түрүүлбэ
Волейбол наадаар Сэгээнэд, Абзай, Хайтал гээд тус тустаа һубарибад.
Һур харбаан олоной анхарал татажа, һонирхолтойгоор үнгэрөө. Энэ мүрысөөндэ бүһэтэйшүүлэй дунда Һэнгэлдэр угай Владимир Андреев, эхэнэрнүүдэй хоорондо Балтай угай Надежда Илыгеева гэгшэд түрүү һууринуудые эзэлээ бшуу.
Балтай угай эхэнэрнүүд
Аргамжа таталгаар Сэгээнэдэй бүһэтэйшүүлдэ хүрэхэ команда байбагүй, харин Балтай угай эхэнэрнүүдые диилэхэ зон олдоогүй.
Байгал далайн эрьедэ ажаһууһан худара буряадуудай найр наадан үндэр хэмжээндэ үнгэрөө. Эрын гурбан наадан сэлгеэн Хударын дайдада ехэ һонирхолтойгоор эмхидхэгдэнэ. Аха захатан ургажа байһан үри хүүгэдээ шадахагүй юумэндэ һургажа, зүбшөөл үгэжэ, нютагайхидаа эблэрүүлжэ байдаг. Хүхюун зугаатайгаар иимэ хэмжээнүүд үнгэржэ байдагыень эндэ сугларагшад тэмдэглэнэ һэн.
Корсаково нютагта эмхидхэгдэдэг элдэб хэмжээ ябуулганууд нютагай захиргаанһаа, ажаһуугшадай оролдолгоһоо дулдыдана. Эдэ хэмжээ ябуулгануудаа бүри һонирхолтойгоор, эмхи журамтайгаар үнгэргэхэ гэжэ жүдхэнэ бшуу.
Авторай гэрэл зурагууд