Баясхалан амбаймнай урагшаа һанаатай, уужам сэдьхэлтэй, үнэн сэхэ, хөөрүү зугаатайхан гээд, утын Түгнын хүн бүхэн хэлэхэ байха. Энеэбхилһэн дулаахан шарайтай Баясхалан лама хүн зониие хүгшэн залуу гэжэ илгадаггүй - адли тэгшээр, зохидхоноор харилсадаг. Бүри балшар бага наһанһаа Баясхалан Бальжинимаев хүниие хүндэлхэ, нигүүлэсхы сэдьхэлтэйгээр томо болоһон.
1967 оной хабар Мухар-Шэбэр аймагай Нарһата һууринда Бальжинимаевтанай үнэр баян гэр бүлэдэ үнинэй хүлеэгдэһэн хүбүүн үри түрөө. Хайрата эсэгэнь эртүүр наһа бараһан. Тиимэһээ 10 үхибүүд сооһоо ганса хүбүүнэй мүр дээрэ ехэ харюусалга унаа. Бага балшар наһанһаа Баясхалан хүдөөгэй бүхы хүшэр хүндэ ажал хэдэг байгаа. 1985 ондо дунда һургуулияа дүүргээд, Ленинград зориһон. Тэндэ гүрэнэй ехэ һургуулиин юридическэ факультедтэ дансануудаа тушаагаад, арайл оюутаниинь болохо хубигүй байшоо. Кронштадта хоёр жэлэй туршада онгосо дээрэ модошо дарханаар ажаллаа. Тиигээд нютагаа бусаһан аабза. Удангүй Һутайн совхоздо токарь болоод хүдэлөө.
«1990 ондо Ивалгын дасанай дэргэдэ Буддын шажанай һургуулиин нээгдэхэдэнь, би тиишээ һурахаяа ошоо һэм. Хүгшэн эжымни ехэ һүзэгтэй, маани мэгзэмүүдые уншадаг бэлэй. Тиимэһээ би лама болохо гэжэ шиидээб»,- гээд, Баясхалан лама һанан дурсана.
1993 ондо энэ һургуулида Чой-Доржо лама хүдэлжэ байгаа. Һүүлдэ тэрэ хамба лама болоходоо, хубарагуудые Энэдхэгтэ һурахыень эльгээһэн юм. Сангхһаа холын газарта Бурхан багшын ном шудалхаяа түрүүшын бүлэг - 24 хубарагууд эльгээгдээ һэн. Тэдэнэй дунда ябалсаһан Баясхалан Бальжинимаев XIV- дүгээр үндэр түрэлтэ Далай багшаһаа адиста хүртэжэ, Еши-Гүнчен гэжэ нэрэтэй болоо. Буряад оронһоо тиишэ эльгээгдэһэн хубарагууд гэлэн ламын уялгануудые бэе дээрээ абаһан. Юуб гэхэдэ, юрын зон дасанда байха эрхэгүй. Энэдхэгэй урда зүгтэ оршоһон Гоман дасанда 17 жэлэй туршада үргэлжэлдэг Бурхан багшын һуралсал гурбан лэ хүн дабажа гараа...
Тиихэдэ табан жэл үнгэрһэнэй удаа Баясхалан Бальжинимаев эхынгээ гуйлтаар түрэл нютагаа бусаха баатай болоһон. Ори ганса хүбүүгээ айл бүлэ болгожо түбхинүүлхэ гэһэн эхынгээ захяа Баясхалан лама яагаад аладлаад гараха һэм даа.
Аймагаа бусахадань, Бандида хамба лама Дамба Аюшеев Баясхалан ламые Түгнэ-Галтайн дасанай шэрээтэ болгоо.
Удангүй Баясхалан Бальжинимаев Баян-Харын үбэртэ дасан бариха гэжэ зорилго урдаа табяа. Табан жэлэй саана, 2013 ондо хэһэн хөөрэлдөөнһөө нэгэ хэһэг та олондоо дурадхая:
- Найман жэлэй саана хүндэлэн талада хоёр хүбүүдтэй хамта балгааһан гэр хабтагайгаар барижа орообди. Тиихэдэмнай түгнөөрхин арга шадалаараа туһалаа. Жэшээлхэдэ, мэдээжэ бүхэ Илья Гармаев үхэр үгөө, совхозһоо үлэһэн дархашуулай гэрые асархыемни Боомой сомоной дарга дурадхал оруулаа. Тиигэ тиигэһээр, модон гэрнүүд бодожо, ажахы байгуулагдажа эхилээ. Түрэһэн нютаг Нарһатаһаам, мүн Боомһоо 15 хүн дасанай ажахыда хүдэлнэ. Олоһон олзоороо тэдэн гэртэхинээ тэжээнэ.
Дасан барилгада нютагай зоной даадхаһан мүнгэ ажахынгаа хүгжэлтэдэ олохон жэлдэ шэглүүлжэ байгаабди. Тиимэһээ нилээд шадалтай болообди.
Арад түмэн бидэниие эды болоторнай үргөө, мүнөө бидэ үгэһэн үргэлыень зондоо бусаахабди. Түгнын талада айл бүхэнэй хайшаагаар байдагые мэдэхэ тула намда энэ талаар бэлэхэншье байжа болохо.
- Арад зондоо ажахы зохёон байгуулаат...
Дасанай зөөри – арад зоной зөөри. Мүнөө 100-гаад толгой үхэр үсхэбэрилнэбди, үшөө «бүүбэй» хонитой болодог һайбди. Оньһон техникэ абтанхай, пилорама тодхогдонхой. Ажал ябуулагдаһаар даа. Үшөө тиихэдэ огород ургуулнабди, ерээдүйдэ саадтай болохо хүсэл бии. Тиихын тула 350 мянган түхэригэй худаг малтуулха хэрэгтэй болоод байна.
- Дасанай ламанар эдеэ хоолоор, хубсаһа хунараар түгэс хангагдаатай байха.
- Тиихэ даа. Орхимжо болон аягаһаа бэшэ ондоо юумэ хэрэгсээдэггүй даяанша ламанар лэ даадхалаар ажамидардаг. Ажахыгүй һаа, дасан хүгжэхэгүй. Дасангууд болбол буддын ном һудар шудалжа байгаа хубарагуудаа тэжээхэ, эрдэмээ дээшэлүүлхыень холо эльгээхэ ёһотой.
- Баян-Харын дасанда буддын номдо һурахаяа һанагшад бии гү?
- Нютагуудаар ябаад һураашалхадамни, хубараг болохоёо хүсэгшэд байна.
Мүнөө нэгэ хубараг Харгааһатын дасанда журам сахина, тиихэдэ Суулгын дасанда 2 ламанар һууна. Хамагай хүндэтэй Даша-Цырен ламбагаймнай Дээдэ-Онгостойдоо байна.
- Хубарагуудтнай буддын шажанай юу шудалха бэ?
Гүн ухаа, зурхай, эмнэлгэ...
Энэдхэгтэ һурахаһаа, үглөө бүри бэеэ һориноб. Тиигэхыень бусадыешье уряалхаб. Хитадай Шаолинь дасанда мэтээр ламанар Зүүн зүгэй аргаар бэеэ һорижо байха. Тэнхээгүй һаа, яагаад аша үрэтэйгөөр ном шудалха болоно бэ?
Оюун ухаагаа хүгжөөхэ зуураа гадар бэеэ хүгжөөхэ шухала. Тиихэдээл хүгжэлтын оройдо гарахабди. Лама болохо гээшэ тиимэшье бэлэн бэшэ. Зосоохи хүсэлнүүдтэеэ тэмсэнэбди, залхуугаа даранабди... Хүн бүхэндэмнай харашье, сагааншье һанаан байха. Сагаамнай диилээ һаа, зүб замаар ябана гээшэбди...
Ямаршье сагай тохёолдобол, ламанар хүн зонтоёо байхаараал байха. Уйдхар гашуудалыень хубаалдаха, урма зориг түрүүлхэ; унаа һаань, үргэхэ. Ажалтай, гэртэй бараатай, үнэр баян, амгалан тэнюун ажаһуухынь түлөө дасангууд бодхоогдоно. Би хайшаа ошохобиб даа, нютагтаа дасандаа байха – минии табилан, талаан.
Багахан хара гэр дотор дасан. Дасанай баруун хажууда гунгарбаа, зүүн тээнь Баясхалан лама ном һудараа уншаһаар зандаа. Дахинаа ерэхэдэм,шэнэ дасан соогоо ороод байһай!
Энэ хөөрэлдөөнэй болоһоор, табан жэл үнгэршэбэ. Эхилһэнээ эсэстэнь хүргэхэл гэжэ Баясхалан амбай зүдхэн ябаһаар, Баян-Харын үбэртэхи дасангаа одоошье нээхэ болзортоо хүрэбэ. Августын 18-да түхэреэн сагаан Түгнын «хүйһэн» дээрэ хүлгөөтэй байха – амгалан байдал үршөөхэ гэһэн удхатай «Амарлин» дасан нээлгын баяр ёһолол үнгэрхэ. Тиигэжэ Баясхалан ламын шухала нэгэ зорилгонь одоошье бэелүүлэгдэхэнь лэ. Теэдшье үшөө олон түсэбүүд урдань бии. Тиимэ байнгүй яахаб даа. Ажабайдал үргэлжэлһөөр бшуу... Харин иимэ урагшаа һанаатай, олондо туһатай амбайтай байһандаа, нютагаархин, аза талаантайбди!
Дашима ЦЫДЫПОВА, Сарюуна ЭРДЫНЕЕВА