Гэр бүлын архивһаа гэрэ зураг абтаба
Ородой мэдээжэ, хүдөө нютагуудай байдал зураглан бэшэдэг уран зохёолшод Фёдор Абрамов, Валентин Распутин, Виктор Астафьев болон бусад 1960-70-аад онуудта хүдөөгэй зоной аргагүй ажалшые, оролдосые, сэхэ сэбэр, арюун һайхан зангыень тэмдэглэн, тэрэнээ алдажа магадгүй гэжэ һэргылһэн удхатайгаар бэшэһэн байдаг. Теэд, манай мэдэһээр, 1990-ээд онуудһаа хүдөө ажахын хүгжэлтэ бууража эхилээ гүб даа. Тэрээнтэй хамта хүдөө нютагуудаар булаг мэтээр бурьялжа байдаг агууехэ ажал замхажа захалаа һэмнай. Заримыень тоолобол, нооһо хайшалган, таряа хуряалган, үбһэ сабшалган, һү һаалган, машина, тракторнуудай сүлөөгүй ажал… Гайхалтайнь гэхэдэ, совет үеын хүдөөгэй басагад, хүбүүд агууехэ ажалаар хүмүүжүүлэгдэжэ, хүдэлмэридөө аргагүй абьяастай һэн.
Харамсалтайнь, оршон сагта хүдөөгэй олон залуушуул үхибүүдэйнгээ ерээдүйн түлөө, салин мүнгэнэй түлөө хото зөөгөөд байна. Теэд ямаршье сагай ерээ һаань, хүдөөгэйнгөө хүн бүхэнэйнь жаргалтай, баяртайл байбалнь, бултадаал хүхюутэй байхабди.
Совет үедэ хүдөө нютагуудай хүгжэлтэдэ трактористнарай, механизаторнуудай, жолоошодой, механигуудай, завгарнуудай хэһэн ажалынь сэгнэшэгүй ехэ юм. Мүнөө сагта хүдөөдэ трактор, комбайн заһаха зон аргагүй ехэ хоморой хүнүүд болонхой гэдэг. Тиихэдэ дээдэ үеын эрэшүүл доодо үеынгөө хүбүүдтэ тракторай, машинын нюусануудые задалжа, ехэ һайнаар заажа, мэдэсэеэ дамжуулдаг һэн, харин мүнөө тиимэ ёһо заншал алдагданхай ха. Энэ юун дээрэһээб гэхэдэ, нютагуудтамнай хүдөө ажахын ажалай үшөөл шахардуутай байһаниие гэршэлнэ.
Хүндэтэ уншагшадтаа совет үедэ трактористаар, комбайнёроор ба бэшэшье ажалда эрхимээр хүдэлһэн сэлгеэхэн Яруунын Улхасаа нютагай Сурхайта гэжэ гоё һайхан тоонтотой Дабаа-Самбуу Жамсаранович Чимитов тухай хөөрэхэ дуран хүрэнэ. Тэрэнэй ажалайнь стаж аяар холын 1968 онһоо, 16 наһатайханһаа эхилээ юм, харин 18 наһатайһаа бэеэ даагаад, трактористаар хүдэлөө.
Дабаа-Самбуу Жамсаранович механизаторайнгаа ажалда аргагүй дуратай байһан юм. «Трактор хүлэгые заһаха гээшэмнай, тиимэшье бэлэхэн хэрэг бэшэ, ухаан, бодолго, оролдолго хэрэгтэй», - гэдэг. Тэрэ ажалаа хэхэдээ, бүтээхэдээ, бүхы сэдьхэлээрээ оролдожо дүүргэдэг байгаа. Тэрэ оролдосотой ажалаараа гүрэн түрын зүгһөө олон тоото грамотануудаар, үнэтэй бэлэгүүдээр урмашуулагданхай юм.
Дабаа-Самбуу Жамсаранович 8-дахи 5 жэлэйнгээ түсэбые 4,5 жэл соо уридшалһанай тYлөө ЦК ВЛКСМ- эй «Табан жэлэй залуу гвардеец» гэһэн хүрэл тэмдэгтэ хүртэһэн. Тиихэдэ үшөө тэрэ ажахынгаа ажалда үнэн сэхээр хүдэлһэнэйнгөө түлөө СССР-эй хэдэн герой-хотонуудаар аяншалжа, Москва ба бэшэшье олон гоё хотонуудые хараа. Гадна «Юбилейный» совхознай бэрхэ ажалшанаа Москвагай ВДНХ эльгээгээ юм.
Дабаа-Самбуу Жамсаранович 1952 ондо Сэбэг Жамсарановна Чимитова ба Гарма Базарович Цыденовэй ехэ гэр бүлэдэ мүндэлһэн юм. Ууган хүбүүн ехэ эбтэй, 5 хүбүүдтэй ба 4 басагадтай үнэр баян айлда үндыгөө. Тиин томо хүбүүн баабай эжынгээ баруун гарынь, гол туһалагшань болоһон юм. Дабаа-Самбуу багахан үхибүүн наһанһаа дүүнэрээ дүнгэлсөө, харалсаа, олон дүүнэрээ хойноо дахуулаа: Ринчин-Ханда, Хандажаб, Ринчин-Доржо (Витя), Галсан, Галя, Октябрина, Бэлигтэ, Доржожаб. «Ехэ ахаймнай - ехэл ахай даа, хорогүйхэн, олон үгэгүйхэн, бултанииемнай харалсаһан, аргагүй ажалша хүн юм», - гэжэ Бэлигтэ дүү хүбүүниинь тэмдэглэнэ.
Галина Гармаевна дүүнь ахай тухайгаа иигэжэ хөөрөө һэн: «Дабаа- Самбуу ахаймнай ехэ абааштай, урагшатай, юумэнһээ эшэхэеэ, гайхахаяа, айхаяа мэдэхэгүй, һургуулидаа математикаараа аргагүй бэрхэ байһан юм. Дээдэ һургуулида һураа һаа, арадай багша Нима Гуруевич Халзанов нагасадаал адли математик болохо һэн.
Арайл 52 наһатайхандаа Гарма баабаймнай мордоо һэн, харин хайрата эжы ехэ ахай хоёрнай бултыемнай үргөө, тэдхээ, ажабайдалай үргэн харгыда гаргаа. Манай дээдэ һургуулитай болоходо дэмжэлсэһэн, туһалһан зон эдэ хоёр гээшэ. Ехэ ахаймнай бултанаймнай түлөө мүнөөшье болотороо һанаагаа зобожо, хамһалсажа ябадаг юм. Эжы ехэ ахай хоёрнай маанадайнгаа нялха нарай наһые дурдажа, хүн бүхэн тухаймнай һониноор, заримдаа энеэдэтэйшье, хүхюутэйшье ушарнуудые дурдан хөөрэдэг юм. Мүн 1966 ондо Бэлигтэ дүүгэймнай 1 һараһаа үлүү боложо байхада, эжымнай хүндөөр үбдөөд, Нарһатын больницада орошоо һэн… Баабайнгаа совхозой ажал хэхэдэ, 14-тэйхэн ехэ ахаймнай нарай дүүгээ, маанадаа 2 һарын туршада бултыемнай жэншэдгүйхэнөөр хараад байгаа».
Дабаа-Самбуу Жамсаранович тэрэ сагай үхибүүдтэл бага наһанһаа Ярууна аймагай «Юбилейный» совхозойнгоо хониной нооһо хайшалганда, Yбһэ хуряалганда эдэбхитэйгээр хабаадаа. Түрэл һургуулиингаа 8-дахи класс дүүргэһэнэйнгээ удаа тэрэ совхоздоо һаалишанаар, тугалшанаар, хонишоноор хүдэлһэн. Удаань тэрэ залуу механизаторнуудай курсда һуража, тракторист болоо юм.
Дабаа-Самбуу Жамсаранович Мухар-Шэбэрэй Шаралдай нютаг ошожо, тракторнуудые заһабари хэдэг байгаа. Һүүлдэнь һүри хаядаг (стогомёдтой) шэб шэнэхэн тракторта һуугаа. Өөрынгөө Улхасаагай отделенидэ гансаараа стогомётчик байгаа юм: тэрэ аарбада, прицепүүдтэ үбһэ ашадаг һэн. Тэрэ сагай трактористнар үглөөнэй үүрһээ, үдэшын харанхы болотор совхозойнгоо ажал хэдэг байгаа. Газаа хүйтэн гү, али дулаан гү – ямаршье сагта трактористнар совхозойнгоо ажалые эрхимээр дүүргэгшэ һэн гэжэ тэрэ хөөрэнэ.
«Тэрэ совет үедэ манай Улхасаада аргагүй олон бодото мал байгаа. Тиихэдэ хүдөөгэй зоной ажалынь хүршэгэнэжэ, хүдэлмэришэ зон һууха байха сүлөөгүйл ажалаа хэжэ ябагша һэн. Зарим бороогүй хүндэ сагта нютагтаа абаһан малаймнай тэжээл багадаа һаань, хүршэ Монгол орон гү, али ондоо аймагуудта ошожо, үбһэ бэлдэдэг байгаабди», - гэжэ Дабаа-Самбуу Жамсаранович хөөрэнэ.
Нэгэнтэ бэшэ тэрэ өөрынгөө тракторна бригадатай Шэтэ можын Улётовска, Оловянинска аймагуудта ошожо, үбһэ бэлдэжэ, Улхасаагаа асардаг байгаа юм. (Өөрынгөө бригада соогоо эгээл залуу тракторист ябаа). Улхасаагаймнай трактористнууд үбэлэй янгинама хүйтэн һарануудта гү, али намарайнгаа ургаса абаһанайнгаа һүүлээр тиишээ ошодог юм һэн. «Заримдаа хүйтэншье, эдихэ юумэмнайшье бага байха. Нютагһаа холо гэдэһээшье үлдэхэ саг алил бологшо һааб даа. Тиигэбэшье хэн ажалдаа зоригтойб, нэтэрүүб, тэрэмнай юушье диилэдэг гүб даа!... Хэһэн ажалдаа үнэн зүрхэнһөө дурлаха хэрэгтэй: ямаршье ажалдаа тон оролдосотойгоор хандабал, тэрэшни һүүлдэнь шамаяа дээшэнь, тэнгэриин оройдо үргэжэ, ажалдаа бүри зохёохы хандасатайгаар хандажа, улам урмашахаш», - гэжэ Дабаа-Самбуу Жамсаранович хөөрэдэг.
Тэрэ «Юбилейный» совхоздо хүдэлһэнэйнгөө удаа хүлгөөтэ 1990-ээд онуудаар фермер болоо һэн. Мүнөөшье нютагтаа олон үхэр малаа хаража, гэр бүлөөрөө жаргалтай һайханаар ажаһуудаг юм. «Дабаа-Самбуу хүгшэн баабайгаараа омогорходогбди, тэрэнээ хайрладагбди. Хүгшэн баабайдаал адли хэһэн ажалдаа оролдосотой байхаяа һананабди», - гэжэ Найдан зээ хүбүүниинь хөөрэнэ һэн.
Олон түрэл хамаатан соогоо Дабаа-Самбуу Жамсаранович өөрынгөө сэхэ сэбэр ажалаараа үхибүүдтээ, залуу үетэндөө жэшээ болонхой. Тэрэнэй дүүнэрынь бултадаа ехэ ахайгаа хүндэлдэг, гамнадаг юм. Мүнөөшье Дабаа-Самбуу Жамсаранович 90 наһатай Сэбэг алтан эжынгээ дали доро дүүнэрэйнгээ хада уулань, түшэг тулгань болонхой, залуушуулдаа ажалай жэшээ харуулдаг. Тэрэ наһанайнгаа амаралтада гаранхай, Улхасаадаа Цыбаан-Дари Дымбрыловна нүхэртэеэ, Сэсэгмаа, Дашима, Санжидмаа үхибүүдтээ туһатай, зээнэрээрээ тойрууланхай, үхэр малаа хаража, альгаараа дүүрэн ажалтай, сэдьхэлээрээ дүүрэн баяртай ан-бунхан ажаһуудаг юм…
Ринчин-Ханда ЦЫДЕНОВА