Тоонто нютагтаа Аяна басагантаяа
Абхан Харгана омогой Шойдогой Цырендашын Батын Рэгзэма хоёрой гэр бүлэдэ 1951 ондо Цынжидма басаган табадахи үри боложо түрэһэн юм. Тиигэжэл одхон басаган нютаг дээрээ абынгаа нэрэ нэрлүүлхэ заяатай байгаал даа.
Согто-Хангилайнгаа дунда һургуулида һуража байхадань, ород хэлэнэй багша сэбэр һайхан Сэндэма Дугаровна ходол жэшээ боложо үгэдэг һэн. Тиимэһээл Цынжидма басагахан багшадаал адли багша болохо хүсэлтэй Шэтын багшын дээдэ һургуулида ород хэлэ бэшэгэй таһагта ороһон юм. Гурбадахи жэлээ һуража байтараа, сэдьхэлэйнь оёорһоо соёлой хүдэлмэришэн болохо хүсэлынь илажа, дээдэ һургуулияа орхижо, Улаан-Үдэ руу ерэбэ. Соёл гэгээрэлэй училищида орожо, эрхим сэгнэлтэтэйгээр дүүргэжэ, түрэл Ага нютагаа бусаһан.
Ага аймагай Хүнхэр нютагта залуу мэргэжэлтэн ажалайнгаа харгы эхилһэн намтартай. Хэды залуу байбашье, соёлой байшангай захиралаар томилогдоһон. Хүдөө нютагта соёлой ажал урагшатай, ядамаргүй ябуулһаар, 1980 онһоо түрэл Согто-Хангил нютагаа бусаа, түрэһэн эжыньшье харууһанда хэрэгтэй болоо. Тэрэ гэһээр түрэл нютагтаа 30 гаран жэлдэ соёлой ажал ябуулаа, 25 жэлдэ Соёлой байшанай захиралаар хүдэлөө. Эдэ жэлнүүдэй хоорондо гэр бүлынгөө шалтагаар автоклубые даагшаар ажаллаа.
Тэрэ үедэ телевизор, интернет байха бэшэ, хүдөө нютагай бүхы “онгоошхонь” соёлой байшан байгаа. Соёлой байшан үглөөнһөө үдэшын 10 саг болотор заабол нээлтэтэй байха. Залуушуулда хатар, наһатайшуулда элдэб наадануудые, бүһэтэйшүүл бильярд наадаха, үхибүүд элдэб кружогуудта ябаха.
- Минии һанахада, мүнөө үеын соёлой ажал тад ондоо болоһон. Аймагай, тойрогой эмхидхэһэн харалгануудта ошожо түсэбөөрөө хабаадаад лэ, тон клуб дотор ажал үсөөн болонхой. Хамтын ажалшье үгы шахуу, байдал тад ондоо болоо ха юм, - гэжэ Цынжидма Цырендашиева тэмдэглэнэ.
Бэлигтэйшүүлтэй суг ажаллаһандаа жаргалтайб
Ганса хүн соёлой ажал ябуулаа үгы аабза. Иимэ ажал олоной хүсөөр лэ бүтэдэг ха юм. Соёлой байшаниие дааха үедөө хэдэн бэлигтэй хүнүүдтэй суг хамта эбтэй эетэй ажаллаһанаа дурсана.
- Минии ажалай харгыда ямар бэлигтэй зон ушараа гээшэб даа. Нэн түрүүн Бадмажаб Батомункуевые тэмдэглэхэм. “Алтан гургалдай” гэжэ суурхаһан дуушан. Валитов Роман Гаврилович тон бэлигтэй, дуулаха, баяан дээрэ наадаха, зураха - шадахагүй юумэн үгы һааб даа, - гэжэ соёлой ажалшан хөөрөөгөө үргэлжэлүүлнэ.
Суг хүдэлһэн зоноо бултыень дулааханаар дурсана. Хамта олон жэлэй туршада ээм түшэн ажаллаһан Шойдокова Баирма Базаргуруевна тухай баһал хөөрэнэ.
Цынжидма Шойдоковна олон жэлэй туршада Согто-Хангил тоонтотой, Агын мэдээжэ хүгжэмшэн Ольга Тангатоватай суг ажаллаа. Тэдэнэй байгуулһан “Тэршээхэн унаган” ансамбль ганса Агадаа бэшэ, мүн дэлхэй дүүрэн суурхаһан габьяатай. Ольга Тангатова хүгжэм зохёохо бэлигтэй, үгэнүүдыеньшье өөрөө зохёохо, элдэб хүгжэмтэ зэмсэгүүд дээрэ наададаг, һайхан даруу зантай, һаруул сэлмэг сэдьхэлтэй хүн бэлэй. Арайл эртэ - дүшөөдхэн наһандаа алтан дэлхэйһээ халин ошоол даа. Энэнь лэ харамтай. Хэды ехэ хүгжэм, дуу үшөө зохёохо һэм. Хэды олон амжалтануудые туйлаха байгааб.
- “Ургы” гэһэн вокальна бүлэг байгуулаад, нютагуудай ойн баярнуудта Олиингоо зохёоһон дуунуудые зорюулан, гастрольнуудта гарадаг бэлэйбди, - гэжэ соёлой ажалшан дурсана.
Хүгжэм урлагай һургуули даажа абаа
2012 ондо Цынжидма Шойдоковнае Согто-Хангилайнгаа хүгжэмэй һургуулиин захирал болохыень дээдын зургаан гуйһан юм. Тэрэ гэһээр 6 жэл шахуу эндэ ажаллана. Гэхэ зуура эндэ туйлаһан амжалтануудыень тооломоор бэшэ олон.
1967 ондо Буряадай мэдээжэ хүгжэмшэн Юрий Ирдынеевые колхоз урижа асараад, хүгжэмэй һургуули нээһэн юм. Тэндэ эгээл түрүүшын бэлигтэй 18 үхибүүд шанга шалгалта дабажа, дуу хүгжэмэй оньһондо һуража, бэлиг шадабарияа мүлижэ эхилээ һэн.
Эгээл түрүүн һуража эхилһэн хүүгэд мүнөө сагта Буряадаймнай мэдээжэ соёлшод, хүгжэмшэд болонхой. Урагшаа һанаатай хамтын ажалай хүтэлбэрилэгшэдэй бодомжолһон ухаатай үйлэ хэрэгээр хүдөөгэй хүүгэд соёлоор гэгээрүүлэгдэжэ, энээхэн соёлой уурхайһаа дэгжэн, ехын харгы руу дабшанад.
Булта соёлшод болохошье бэшэ һаань...
Мүнөө энэ һургуулида 20-ёод үхибүүд ябана. Хаа-хаанагүй хүдөө һургуулинуудта һурагшад үсөөрөө гэһэн тоо баримта мэдээжэ. Анхан һургуулида 700-500-гаад һурагшадай байхада, тон бэлигтэй үхибүүдые шалгажа, шадабарииень элирүүлжэ, шүүжэ абадаг байгаа. Харин мүнөө.
- Одоо мүнөө ямаршье арга боломжотой үхибүүдээ ерэхэдэ, бултандань баяртай байдагбди. Агуу бэлигтэй хүгжэмшэн болохо бэшэшье һаань, нэмэлтэ һуралсал олгуулхада һайн ха юм. Саашадаа ямар нэгэ мэргэжэл шэлэбэшье, дуу дуулажа, хатаржа, зуража шадаха бэлигынь хэрэгтэйл болохо бшуу, - гэжэ багша тэмдэглэнэ.
Һурагшад соло асардаг
Цынжидма Цырендашиева шаби Дулма Сунраповатай
Хүгжэмэй энэ һургуули дүүргэһэн мүнөө үеын артистнар гэхэдэ, эстрадын одото дуушан Дулма Сунрапова болоно. Бага ябахадаа, эндэхи багшанарай, илангаяа абынгаа эгэшэ Ольга Тангатовагай одоол найдал, омогорхол бэлэй. “Байгал” театрай гол хатаршан Даба Дашинорбоев баһал энэ һуралсалай гуламтын шаби гээшэ. Буряадай драмын мэдээжэ боложо ябаһан артист Зоригто Цыбендоржиев баһал эндэһээ далижан гараа. Эдэ булта “Тэршээхэн унаган” ансамблиин хүмүүжэмэлнүүд гээшэ. Ирагуу һайхан хоолойгоороо “Алтаргана” ехэ нааданда арад зоноо гайхуулһан Аягма Дамдинова Улаан-Үдын хүгжэмэй һургуули дүүргээд, Владивостогой соёлой дээдэ һургуули мүнөө жэл түгэсэбэ. Болот Динганорбоев, Хандама Платонова, Жаргалма Гомбожапова, Абида Бабудоржиев болон бусад баһал эндэһээ эхи абаһан юм.
Уласхоорондын хэмжээндэ түрүүлнэ
Мүнөө үеын һурагшад урдань һураад гараһан бэлигтэй артистнарһаа өөрэгүй, амжалта түгэс ябанал даа. Урдандаа хүдөөгэйхид Бүхэроссиин, Уласхоорондын харалган болон мүрысөөнүүдтэ балай хабаададаггүй һэн. Мүнөө алас холуур ябуулдаг хэмжээ ябуулганууд олон болонхой. Согто-Хангилай хүгжэм урлагай һургуулиин шабинар хаа-хаанагүй амжалтатай хабаадана. Уласхоорондын “Молодой гуранёнок” гэһэн фестивальда, “Уникум” гэһэн Бүхэроссиин хэмжээнэй фестивальда оролсоо.
2015-2016 оной һуралсалай дүнгүүдээр “Ерээдүйн һургуули” гээһэн 5-дахи форумдо уригдаад, Ород гүрэнэй урлагай эрхим һургуули гэһэн шэглэлээр 2016 оной лауреат болоод, Цынжидма Цырендашиева эгээл эрхим захирал гэһэн нэрэ зэргэдэ хүртөө.
Уран һайханай шэглэлдэ абьяас бэлигтэй иимэ хүтэлбэрилэгшэтэй, багшатай байһан нютагай үхибүүд жаргалтай. Үгы юумэ бии болгожо, үхибүүн бүхэндэ бэлиг шадабари олгуулдаг, үргэн харгыда гаргажа байдаг багша буянтайл даа.
Гэр бүлын альбомһоо гэрэл зурагууд абтаба