Үнэтэй болон шанар муутай бензинээр хангагдадаг байһан ушараар ехэтэ һанаагаа зобожо, өөрын үйлэдбэри байгуулхаар бэлэн болоһоноо Саха (Яхад) Уласай Засагай газар мэдүүлбэ. Энээн тухай уласай Толгойлогшо Айсен Николаев хөөрөө гээд Россиин мэдээсэлэй “Новости” албан һаяхана дамжуулһан байха юм.
Автоунаагай түлишын сэнгые өөһэдөө тогтоохо ба харгалзалха тусхай хамжаан Яхадта үгы юм гээд тэрэ онсолоо. Улас руунь асарагдадаг бензинэй нэмэлтэ сэнгыень лэ тэндэхи Засагай газар ехэ, бага болгохо аргатай.
Яхадай Толгойлогшын хэлэһээр, байгша оной июнь һараһаа тэдэнэй уласта АИ-92 ба АИ-98 түхэлэй бензинэй бөөнөөр (оптоор) худалдагдадаг сэн найман түхэригөөр, харин АИ-95 түхэлэй түлишын сэн – юһэн түхэригөөр дээшэлээ. Дизельнэ түлишын нэгэ литрынь аяар 12 түхэригөөр үнэтэй болоо бшуу. Харин тиихэдэ эдэ түхэлэй түлишые ганса нэгээр (розницоор) наймаалха сэнгүүд табан түхэригөөр дээшэлээ гэнэ.
“Эгээл энэ ушарһаа уламжалан, уластамнай хэрэгтэй мотоорой түлишэ үйлэдбэрилэн гаргадаг болохо тухай асуудал шэнээр табигдаба гээшэ. Тэрэниие шиидхэхэ талаар хэрэгтэй бүхы шэглэлнүүдээрнь даабаринуудые үгэһэн байнаб, тэдэмни мүнөө бэелүүлэгдэжэ эхилбэ”, - гээд Николаев тэмдэглээ.
Уластань хэрэглэгдэдэг автотүлишын муу шанар тухай Ородой Холбоото Уласай Засагай газарай Түрүүлэгшын орлогшо Дмитрий Козагай хэлэһые Яхадай Толгойлогшо мүн лэ һануулаа. “Яхадай болон Үбэр Байгалай АЗС-үүдэй худалдадаг түлишэ тухай Ородой Холбоото Уласай вице-премьер Дмитрий Козак хэлэһэн байна. Үнэхөөрөөшье һайн шанартай гэхын аргагүй. Түлишын шанар хинаха гээшэ имагтал холбоото уласай хиналтын албануудай дүүрэн ба сэхэ уялга, харюусалгынь дэбисхэр гээшэ. Тэдэнэйл анхаралда иигэжэ хэлэгдээ ха юм”, - гээд Николаев һанамжаяа тайлбарилба.
Россиин бүхы рознично дэлгүүрэй зуунай 62 хубиие бэеэ дааһан АЗС-үүд эзэлдэг юм. Эгээ олон дутагдал, хуули хазагайруулха ушарнууд тэндэл ушарна. Дмитрий Козагай хэлэһээр, тус һалбарида байдал эрид һайжаруулха хэрэгтэй. Гэхэтэй хамта, ехэ болгоомжотойгоор, нарин нягтаар, автотүлишэ худалдадаг газарнуудай хаагдашахагүйгөөр энэ ажал хэхэ хэрэгтэй гээд Козак онсолоо юм.