1105
«Хүн болохо багаһаа, хүлэг болохо унаганһаа» гэжэ арад зон дэмы хэлсэдэггүй. Үхибүүн бүхэн томо боложо, хүнэй тоодо ямараар орохонь абари зан, досоохи сэдьхэлһээ, аба эжын һургаалһаа дулдыдадаг. Эрдэмдэ һуража, арад зондоо хүндэтэй байхадань, олон зон үхибүүмнай хүн болобо гэхэ. Үхибүүн ябахаһаа эхилээд, али нэгэ юумэндэ бэлигээ, бэрхэеэ харуулжа, мэргэжэл шэлэдэг.
2013 ондо Шэбэртын һургуулиие алтан медальтайгаар дүүргэһэн Валерия Гомбоева һуралсалдаа шалгаржа, амжалта туйлажа, арад зоноо, нютагайхидаа баярлуулдаг. Буряадай суута уран зохёолшо Ц. Доной дүшэ басаган Валерия Гомбоева 1995 ондо Шэбэртэ нютагай Гомбоев Александр Баяровичай ба Басанова Оксана Германовнагай бүлэдэ түрэһэн. Нагаса абань, эжынь соёлой байшанда нилээн хүдэлжэ, нютагтаа уралиг, соёлые үргэһэн зон гээшэ. Һургуулидамнай уран һайханай үхибүүдэй жэшээтэ уран һайханай “Аянга” коллективые даажа байһан абга эгэшэнь Эрдынеева Сэржэн Германовна юм.
Һургуулида һуража ябахадаа, Лера Сагаалганай “Эдир Дангина” урилдаанда, дуунай олон конкурснуудта, “Наранай туяада” түрүү һууринуудые эзэлһэн, аймагайнгаа, уласайнгаа олон шагналнуудта хүртэһэн юм.
Сүлөө саг оложо, “Орос-монголой толёор” монгол хэлэ шудалдаг. Эрдэм-шэнжэлгын «Ерээдүй алхам” конференцидэ, һурагшадай мүрысөөнүүдтэ, оронойнгоо, тоонто нютагайнгаа түүхэ шэнжэлжэ, һайн сэгнэлтэнүүдые абадаг һэн.
2013 ондо һургуулияа алтан медальтайгаар дүүргэжэ, Буряадай гүрэнэй ехэ һургуулиин Дорно дахинай (Восточно) дээдэ һургуулиин хитад, солонгос хэлэнэй таһагта ороһон.
Һуража байгаад, уласхоорондын “Караоке без границ» урилдаанда хабаадажа, түрүүшын шанда хүртэһэн юм. Алас Дурнын “Орлёнок” лагерьта оюутадай мүрысөөндэ шалгараа. “Оюутадай хабарай” фестивальда II шатын дипломдо хүртөө. Тайзан дээрэһээ буряад, монгол, англи хэлэнүүдээр ирагуу дуунуудые гүйсэдхэжэ, харагшадые баярлуулдаг.
Дуу дуулахаһаа гадна, шүлэг найруулжа, хүгжэмынь зохёодог. Мэдээжэ болоһон дуунуудынь: “Эжымни”, “Шэбэртэ”, “Хүгжэм дуудана”, “Алтан мүшэн”. Мүн баһа англи хэлээршье зохёодог.
Ехэ һургуулияа “Улаан дипломтойгоор” дүүргээд, Зүүн Сибириин Соёлой ехэ һургуулиин режиссёрой таһагта һуралсалаа үргэлжэлүүлнэ.
Сүлөө сагай гарахада, гэрэл зураг буулгаха, гоё хубсаһа оёхо дуратай, эдеэшье шанахадаа бэрхэ. Дүү Лиза басагандаа дуу тааруулжа, мүнөөнэй зангаар дуулахыень һургана. Зангаар һайн, түргэн бодолтой, нарин нягта, нүхэдтөө найдамтай Лера нютаг нугадаа, тоонто дайдадаа дуратай. Үбэр Байгалай хизаарай Агада болоһон «Алтаргана-2012» нааданда Шэбэртынгээ байгаалиие магтан дуулаа.
Шэбэртэ - минии нютаг
Ямар һайхан байгаалиб -
Сэлмэг огторгой шэнги.
Ямар гоё нютаг бэ -
Алтан наран шэнги.
Валерия Гомбоевагай нютаг соогоо, аймагтаа, уластаа ехэ хүндэтэй болоһондонь, бидэ, багшанар, бэрхэ шабяараа омогоржо байдагбди.
Манай шаби, саашадаа үшөө үндэр амжалтануудые туйлажа, эрдэм бэлигээ алдангүй, эдэбхитэй зандаа Буряад Уластаа, Ород гүрэндөө улам мэдээжэ боложо, бүхы ажалайшни, һуралсалайшни амжалтанууд номой ёһоор бүтэжэ, бурхандаа шүтэжэ ябыш даа.
Цырендондок ЗАНДРАЕВ, багшын ажалай ветеран
