1103
"Буряадай түрүү хүнүүд" мүрысөөнэй дүнгүүд Буряад театрта мүнөө соносхогдожо эхилбэ. Урилдаанда хабаадаһан зон, зураглалнуудые бэшэһэн сэтгүүлшэд, хүдөө бэшэгшэд Буряад ороной олон аймаг нютагуудһаа баяр ёһололдо суглараад байна.
Буряад Уласай Толгойлогшын болон Засагай газарай Захиргаанай Хүтэлбэрилэгшын орлогшо Виктор Аюшеев, Буряад Уласай Арадай Хуралай һунгамал Леонтий Красовский гэгшэд мүрысөөндэ сугларагшадые амаршалба.
1996 ондо анха түрүүн үнгэргэгдэжэ эхилһэн энэ мүрысөөн зондо һайшаагдажа, мүнөө болотор, хорин хоёр жэлэй туршада таһалгаряагүйгөөр эмхидхэгдэнэ. Арадаймнай эрхим олон түлөөлэгшэдые зураглажа, аша габьяаень олондо мэдүүлхынгээ хажуугаар, үндэһэн хэлэнэймнай хүгжэлтэдэ нүлөөлнэ, олон үндэһэ яһатанай хоорондохи харилсаа холбоо бэхижүүлнэ гэжэ хүндэтэ айлшад тэмдэглээ.
Хэдэн хэсэгээр үнгэргэгдэдэг энэ мүрысөөндэ элдэб һалбаринуудай - хүдөө ажахын, болбосоролой, соёлой, хүмүүжүүлгын, үйлэдбэриин, нютагай засагай байгууламжануудай түлөөлэгшэд тухай материалнууд толилогдоо бшуу.
Энэ удаа "Буряадай түрүү хүнүүд " урилдаанда анха түрүүшынхиеэ интернет сүлжээндэ дуу үгэлгэ эмхидхэгдээ бшуу. Энээн тушаа үшөө хөөрэхэбди.
Автор: Василий ЦЫБИКОВ
