​​Баатаршалга гаргаһан багашуулда, бароо!

Хэжэнгын эдир баатарнууд

Үнгэржэ байгаа жэлээ үдэшэхэ зуураа үхибүүдэй баатаршалга гаргаһаниие дурсаха шухала. Байг­ша ондо аяар зургаан үхибүүн гүрэнэй шангууд­та хүртэһэн байна. “Ами наһа абарһанай түлөө” гэһэн медальнуудта Зэдын, Хэжэнгын, Загарайн зурга­ан үхибүүд хүртөө.

Үхибүүд хэды багашье һаа, аюултай ушарһаа айнгүйгөөр, томо зонһоо дээрэ тохёолдоһон тодхорто бай­дал сэгнэжэ, хүнүүдэй ами наһа абарһан байна бшуу.

Август һарын үдэшэ Егор Елькин болон Ники­та Сухарев гэжэ хоёр нүхэд уулзажа, наадахаа гараһан байгаа. Харан гэхэдэнь, нэгэ бага хүбүүн үйлсэдэ мори хаража, эльбэхээ һанаа хаш.

- Манай хараад байм­саар, тэрэ морин муухай­гаар үдьхэлжэрхёо. Бидэ танилайдаа ошожо, такси ерэхэ гүүлээд, хуу шуһан болошоһон хүбүүе больни­цада абаашаабди. Һүүлдэнь тэрээнэй гэртэхиндэ дуул­гаабди, - гэжэ Егор Никита хоёр хөөрэнэ.

Энэ ушар Зэдэ аймагай Петропавловка һууринда тохёолдоо.

Тэрэл августын үдэрнүүдтэ Хэжэнгэ аймагай Ху­дан голой уһанда шэнгэжэ байһан хоёр басагадые гур­бан хүбүүд обёорһон байна.

- Тэрэ үедэ бидэ “Хэжэн­гэ” гэһэн элүүржүүлгын ла­герьта амаржа байгаабди. Голой нүгөө эрьедэ гарашо­од байгааб. Шэнгэжэ байһан басагад “абарыт, абарыт” гэжэ байгаад хашхархадань, нэгэшье юумэ һанангүй, уһанда орооб. Тэдэниие абархаа үшөө хоёр хүбүүд тамарһан байшоо. Булта тэдэ басагадые уһанһаа гаргаабди. Удаань уулза­ад, энээн тухай ехээр ама гарахагүйбди гэжэ хэлсэ­эбди, - гэжэ Ородой-Адагай һургуулиин шаби Дансаран Цыбикжапов хөөрэнэ.

Баатаршалга гаргаһан үшөө хоёр хүбүүд гэбэл, энэл һургуулиин Балдоржо Бальжиров болон Худанай һургуулиин шаби Даши Гомбоев гэгшэд болоно.

Февралиин хүйтэндэ Ки­рилл Журавлёв Владимир нүхэртэеэ заншалта хар­гыгаараа Новоильинскын һургуулиһаа бусажа ябаа. Тэдэ наадажа ябаһаар, шэнэ саһан дээгүүр голой харза уһанда орошоһоноо ойлгоогүй.

- Минии нүхэр нэгэ хүлөөрөө уһа руу орошоо. Гараха гэхэдэнь, хажууга­архи мүльһэн тэһэржэ эхи­лээ. Тиихэдэнь өөрөөшье уһанда орожо, нүхэрөө түлхижэ гаргааб. Энэ үедэ ганса нүхэрөө яагаад абар­хабиб гэжэ һанажа байга­аб, - гэжэ Кирилл Журавлёв хөөрэнэ.

Манай хүүгэдэй дун­да баатаршалга гаргаха зүрхэтэй, урагшаа һанаатай хүбүүд, басагад ургажа яба­на гэжэ тэмдэглэмээр. 

Борис Балдановай гэрэл зураг