​​Шэнэ жэлэй бэлэг – морин хуур

Сэлэнгэ аймагай сомонуудай дарганарта нэ­гэ-нэгэ морин хуур дамжуулагдаба. Буряад Уласай Арадай Хуралай һунгамалнууд Солбон Дашанимаев болон Мунко Буянтуев гэгшэд нютагаархидтаа иимэ бэлэгүүдые баряа.

Аймагай засаг дарга Станислав Гармаевай тэмдэглэһээр, арадай хүгжэмэй зэмсэг дэлгэрүүлхэ, һургаха, арад зондо ойлгуулха талаар аргагүй ехэ ажал 2019 ондо Сэлэнгэ аймагта ябуулагдаха юм.

- Морин хуурта жэлээ зорюулаад, хүгжэмэй зэмсэг үгы байбал, худал болохо һэн. Энэ хэрэгтэ манай айма­гай һунгамалнууд аргагүй ехэ туһа хүргэбэ. Нютагаар­хиднай тэдэндэ баяраа мэдүүлнэ, - гэжэ Станислав Гар­маев баяртайгаар хэлэнэ.

Январиин 11-дэ баярай оршондо морин хуурнууд Сэлэнгын бүхы сомонуудай дарганарта барюулагдаа.

Аймагай захиргаанай соёлой таһагай хүтэлбэрилэгшэ Нимацоу Эрдынеевагай хэлэһээр, морин хуурай жэлдэ сэлэнгынхид бэлэн.

- Гусиноозёрск хотымнай “Шахтёр” гэһэн соёлой түбэй дэргэдэ морин хуур дээрэ наададаг мэргэжэл­тэн хүдэлнэ ха юм. Энэ буряад зэмсэг дээрэ нэн түрүүн ургажа ябаа залуу халааниие һургаха түсэб байна. Зэмсэгшэн Эдуард Сампилов аймагайнгаа бүхы нютаг һууринуудаар ябажа, һургаха аргатай, - гэжэ Нимацоу Эрдынеева хөөрэнэ.

Морин хуурай ашаар буряад хэлэ хүгжөөлгэ бүри үндэр шатада гараха гэжэ сэлэнгээрхид найдана. Энэ бэрхэшээлтэ асуудалда анхарал ехээр хандуулагдана. Сэлэнгэ аймагай засаг даргын нэгэдэхи орлогшо Свет­лана Бубеевагай хэлэһээр, буряад хэлэ хүгжөөлгын түб Сэлэнгэдэ һаяар нээгдэхэ юм.

Бадма ЯКШЕЕВ