1164
Гомбо Цыдынжаповай нэрэмжэтэ Буряадай гүрэнэй оперо болон баледэй театрта ехэ һонирхолтой үйлэ хэрэг январиин 29-дэ үнгэргэгдэхэ. Буряадай арадай дуушан, Ородой Холбоото Уласай соёлой габьяата хүдэлмэрилэгшэ Баир Базаровай гэрэлтэ дурасхаалда болон тэрэй наһанай нүхэр Виктория Жамьяндоржиевнагай ажаябуулгада зорюулагдаһан концерт бэлдэгдэнэ.
Мэдээжэ дуушаднай ирагуу дуунуудаа хангюурдахаһаа гадна, хүгжэмэй колледждо залуу дуушадта бэлиг шадабари, дүй дүршэл заажа, эрхим дуушадые хүмүүжүүлһэн габьяатай.
Холын хойто Хурамхаанһаа ургажа гараһан эрхим дуушадые арад зомнай һайн мэдэдэг: Ородой Холбоото Уласай арадай дуушад Саян Раднаев, Владимир Буруев, Буряад арадай артист Владимир Шагжиев! Тэдэнэй дунда арад зондоо хүндэтэй Баир Базаров онсо һуури эзэлдэг.
Буряадай эрхим дуушадые хүмүүжүүлһэн габьяата багша Вячеслав Баяндаевич Елбаевай эрхим шаби байһанаа Баир Базаров бүхы ажаябуулгаараа гэршэлээ. Ерээдүйн суута дуушад: Галина Шойдогбаева, Ольга Аюрова, Сурена Дашацыренова, Софья Данзанэ гэгшэдээр сугтаа һурахадаа, эрхим дуушадай оюун бэлигэй нюусануудые нээжэ олоһон габьяатай.
Өөрөө баритон һайхан хоолойтой Баир Новосибирскын консерваторидо һурахадаа, Ленинградай консерваториин оюутан Викторитой танилсажа, олон зуун модоной зайдашье һаа, халуун дуранай охиндо абтажа, гэр бүлэеэ зохёогоо. Эбтэй гэр бүлэ дүшөөд жэлэй хугасаада ажалай жолоо барижа, шамбай баатар хүбүүгээ хүлынь дүрөөдэ хүргэжэ, арад зонойнгоо эгээл дуратай дуушадай тоодо ороһон габьяатай.
Энэ үнгэргэгдэхэ уулзалга эмхидхэхэ гэһэн залуу дуушадай үүсхэл Виктория Жамьяндоржиевна дэмжээ. Баһал бидэ, үетэн болон хоолой ниилүүлһэн нүхэдынь Баирайнгаа мүнхэ дурасхаалые тэмдэглэлсэлгэдэ үшөө дахин хабаадалсажа, хубитаяа оруулалсаха байһандаа баярлажа, булта дэмжэбэбди.
Хүндэтэ багшанарайнгаа хүндэлэлдэ иимэ уулзалга эмхидхэхэ, туйлаһан амжалтануудаа харуулха дурадхал оруулһан залуу бэлигтэнэй дунда Санкт-Петербургын Мариинска театрай Аюна Базаргуруева, Нямсурэн Нацагдорж, Буряад театрай Бадма Гомбожапов, Доржо Шагдуров, Александр Хандажапов, Оюна Дарижапова, Мария Балданова, Соёл Батуев дуушад болон хүгжэмэй дээдэ һургуулиин Мария Басаева, Кассия Арутюнян оюутад эрхим дуушад боложо ябаһанаа харуулха бэзэ гэжэ найдаад, январиин 29-нэй 18 саг 30 минутада оперно театртаа уулзаял.
Ревомир Гармаев
