Анна Огороднигой гэрэл зураг
Түнхэн аймагай Аршаан һууринда “Алтан мундарга” гэһэн һээр шаалгаар наадан болохонь. Эсэгэ ороноо хамгаалагшадай үдэр бүхы Буряад Уласай, Үбэр Байгалай хизаарай, Эрхүү можын болон бусад можо, хизаарнуудай шамбайшуул гол шан - автомашинада хүртэхын түлөө шамдаха.
Һээр шааха ёһо Түнхэн аймагта һэргээгдэжэ эхилээ бэлэй. Үшөө 2013 ондо эндэ түрүүшын мүрысөөн болоо. Тиигэжэ “Алтан мундарга” фестиваль үндэр хэмжээндэ Хойтогол һууринда болоһыень олон хүн зон мүнөөшье болотор һанажа ябадаг. Тэрээнһээ хойшо бүхы аймагуудта һээр шаалган һэргээгдэжэ, “Наадан- Сурхарбаанай” бүридэлдэ оруулагдаа. Мүн тиихэдэ Этигэл хамба ламада зорюулагдаһан һайндэрнүүдэй үедэ мүрысөөн эмхидхэгдэдэг болонхой.
Февралиин 23-да “Алтан мундарга” фестиваль гурбадахияа үнгэргэгдэхэнь гээшэ. Мүнөө жэлэй хэмжээ ябуулгые Буряад Уласай аяар гурбан яаман (Спортын болон залуушуулай хэрэгүүдэй талаар, Хүдөө ажахын болон эдеэ хоолой, Аяншалгын яаманууд) дэмжээ.
Һээр шаалганай найр нааданда эрэшүүлэй дунда зургаа наһанай бүлэгтэ мүрысөөн болохо юм. Мүн тиихэдэ эхэнэрнүүд өөрын бүлэгтэ чемпиониие элирүүлхэ.
Эмхидхэгшэдэй хэлэһээр, хабаадагша бүхэн үндэһэн хубсаһаараа байха ёһотой - заал һаа дэгэл, бүһэ, малгай, гутал үмдөөд, һээр шааха болоно. Команда бүхэндэ 35 һээр шаагша байха.
Иимэ томо мүрысөөнэй урда Түнхэн аймагай һээршэд бэлэдхэл хэжэ, Хужар һууринда болоһон мүрысөөндэ бэеэ туршаба. Аха, Захаамин болон Түнхэн аймагуудай 60 гаран хүн мүрысөөндэ хабаадаһан байна.
Жалсып Манзаров (Хойто-Гол), Аюр Шалбанов (Туран), Юрий Хохоноев (Хужар), Баир Балданов (Хойто- Гол), Надежда Балданова (Хужар) гэгшэд өөр өөрын наһанай бүлэгүүдтэ түрүү һууринуудые эзэлһэн байна. Аюр Шалбанов мүрысөөнэй абарга бүхэ боложо тодороо.