Үнгэрэгшэ долоон хоногто Москва хотодо ажаһуудаг Буряадһаа гарбалтай арад зон Ородой Армиин академическэ түб театрта «Сагаалган-2019» гэһэн һайндэр үнгэргэбэ.
Зүүн зүгэй литээр шэнэ жэл угталгын баярта Москвада ажаһуудаг Буряадай нютаг зоной эблэлэй түлөөлэгшэд, ниислэл хотын ехэ һургуулиин оюутад, Буряад, Тыва, Хальмаг Уласуудай, Эрхүү можын, Үбэр Байгалай хизаарай айлшад олоор ерээ. Ехэнхи айлшад буряад арадайнгаа заншалта хубсаһаа үмдэжэ, баярай оршондо нютагаархидтаяа уулзаа.
Дүрбэн дабхар театрай дабхар бүхэнэй хоёр фойе бүхэндэ Сагаалганай найр нааданда зорюулагдаһан хэмжээ ябуулганууд үнгэргэгдөө. Эдэ танхимуудта буряад хубсаһан олондо харуулагдаа, хүүгэд дуу дуулажа, хатар дэлгээ, һээр шаалган болон бусад һонирхолтой хэмжээ ябуулганууд эмхидхэгдээ. Тиихэдэ уран бүтээлнүүдэй, буряад арадай эдеэ хоолой үзэсхэлэн дэлгэгдээ.
Энэ хэмжээ ябуулгада оролсоһон Буряад Уласай Толгойлогшо Алексей Цыденов шарагшан гахай жэлээр сугларагшадые амаршалба. Сагаан һарын нааданда Москва хотодо нютагаархид уулзажа, Буряад нютагаа һанан дурсаха аргатай гэжэ хэлэһэн байна.
Удаань Москва хотын мэр Сергей Собянинай амаршалгын бэшэг олоной һонорто уншагдаа. «Хэр угһаа хойшо Сагаалган хадаа байгаалиин һэргэхые тэмдэглэнэ. Энэ үедэ голхорол гомдолоо мартажа, үнэн зүрхэнһөө бэе бэеэ амаршалдаг. Сагаан һарын үедэ Москвагай ажаһуугшад болон айлшад Сибириин болон Алас Дурна зүгэй ёһо заншалтай танилсажа, арадай заншалта эдеэ амталжа, уран гартанай бүтээлнүүдые харана. Москва хотын Сагаалган хадаа баяр баясхалан, мартагдашагүй уулзалганууд», - гэжэ бэшэг дотор хэлэгдэнэ.
1500 хүниие нэгэ доро багтааха танхим соо сүлөө газар олдохогүй байгаа. Дүрбэн сагай туршада үнгэргэгдэһэн тоглолто харагшад халуунаар угтажа абаа.
Буряадай мэдээжэ дуушад Билигма Ринчинова, Намхайн Мунхзул, хүгжэмшэн, дуушан Виктор Жамбалов, Бадма-Ханда Аюшеева, Дулма Сунрапова, Елена Борохитова, Саян Цымпилов, Батор Унахаев, Согтын Должин, хатаршад Лия Балданова, Булыт Раднаев, Буряадай циркын зүжэгшэд тоглолтодо хабаадаа. Тиихэдэ РСФСР-эй арадай артист Виктор Елисеевэй хүтэлбэри доро Ород гүрэнэй үндэһэтэнэй гвардиин сэрэгэй дуу, хатарай ансамбль энэ үдэшэ шэмэглээ. Буряадаймнай бэлигтэй хүбүүд, басагад абьяас бэлигээ дүүрэн гэршэлээ.
Роза БУЛЫТОВА, Дарима АНАНДАЕВА