​​“Уян бэлигэй” амжалта

Мартын 27-31-эй үдэрнүүдтэ Монгол ороной Улаан-Баатар хотодо үнгэргэгдэһэн “Алтан гадаһан” гэһэн хүүгэдэй уласхоорондын фестивальда хүүгэдэй хатарай, дуунай “Уян бэлиг” ансамбль хабаадаа.

“Алтан гадаһан” гэһэн урилдаан 11-дэхи жэлээ үнгэргэгдөө. Эндэ Үбэр Байгалай, Улаан-Үдэ хотын нэгэдэхи лицей-интернадай хатарай “Наранай толон” бүлгэм, уласай уран бүтээлэй “Булжамуур”, хүүгэдэй соёлой наймадахи һургуулиин дуунай бүлгэм, Хитад, Монгол гүрэнүүдһээ, Эрхүү можоһоо - бүхыдөө 500-гаад хүүгэд хабаадаа.

11 наһа хүсөөгүй, мүн 12-һөө дээшэ наһатай үхибүүдурилдаанай хоёр номинацида хаба шадалаа туршаа. 11 наһа хүсөөгүйшүүлэй дунда “Уян бэлиг” ансамблиин хатаршад нэгэдэхи шатын дипломоор, алтан медаляар шагнагдаа. Тиихэдэ 12 наһатайһаа дээшэ хэмжүүртэ тус ансамбль лауреадай хоёрдохи шатын дипломдо хүртөө. Тиин “Театр моды” гэһэн номинацида буряад арадайнгаа уг бүхэнэй хубсаһа гоё гэгшээр харуулжа, түрүүшын һуури эзэлээ. Харин дуунай урилдаанда 5 басагад хабаадажа, дипломантын нэрэ зэргэдэ хүртэжэ ерээ.

Буряадай гүрэнэй “Байгал” театрай дэргэдэ 2013 ондо “Уян бэлиг” гэһэн хүүгэдэй хатарай ансамбль байгуулагдаһан юм. Теэд удангүй энэ ансамбльда дуунай таһаг нээгдэһэн байна. “Уян бэлиг” ансамбль хатарай 3 бүлэгтэ хубаардаг.

Энээн тухай тобшохоноор “Буряад үнэн” сониной дугаарта уншаха аргатайт.

Гэрэл зураг «Уян бэлиг» ансамблиин архивһаа абтаа