964
Байгша оной апрелиин 28-һаа майн 5 болотор Буряадай оперо болон баледэй театрта Ородой-Японой Евразиин I мүрысөөн үнгэргэгдэхэ. 200-һаа дээшэ хабаадагшад болон делегациин гэшүүд хэмжээ ябуулгада ерэхээр хүлеэгдэнэ.
Буряад Уласай соёлой яаман, Буряадай оперо болон баледэй театр, дэлхэйдэ мэдээжэ Японой «Конкурс артистов балета «NAMUE» болон "Мицубиси Корпорейшн (РУС)" гэһэн компанинууд хэмжээ ябуулгын нүхэд болоно.
Апрелиин 28-да баледэй хатаршадай мүрысөөнэй нээлгын ёһолол үнгэргэгдэжэ, «Красавица Ангара» гэһэн балет Буряадай оперо болон баледэй хатаршад харуулха юм. Майн 5-да хэмжээ ябуулга түгэсэхэ.
Классическа баледэй ород һургуулиин заншал сахиха, үндэһэн баледэй хатар хүгжөөхэ гэһэн зорилготой уласхоорондын мүрысөн эмхидхэгдэнэ. Һонирхолтойнь гэхэдэ, баледэй хатаршадай мүрысөөнэй түүхэдэ анха түрүүшынхиеэ үндэһэтэнэй хатар сэгнэгдэхэ юм. Ородой Холбоото Улас болон Япон уласуудай жэлэй хэмжээндэ урилдаан соносхогдожо, Ород, Япон болон Евразиин гүрэнүүдэй хоорондо соёлой харилсаа бэхижүүлэгдэхэ.
Марий Эл уласай соёлой сайд Константин Иванов, Астраханиин гүрэнэй оперо болон баледэй театрай уран һайханай хүтэлбэрилэгшэ Константин Уральский, М.И. Глинкиин нэрэмжэтэ Челябинскын гүрэнэй оперо болон баледэй театрай прима-балерина Татьяна Предеина, «Кремлевский балет» театрай хатаршан байһан Айдар Шайдуллин, «Yan Ballet Academy» гэһэн Сингапурай баледэй академиин захирал Ванг Ян болон бусад уласхоорондын урилдаанай жюриин гэшүүд болохо юм. Морихиро Ивата жюри хүтэлбэрилхэ.
6-11, 12-15, 16-18, 19-30 гэһэн наһанай хубаряар 4 бүлэгтэ мүрысөөн үнгэргэгдэхэ.
