Буряад драмын театрай тайзан дээрэ табигдаһан “Далан худалч” гэһэн зүжэг тэрэ үедөө харагшадые дүүрэн суглуулдаг бэлэй. Тэрээндэ Далай баяниие шадамар бэрхээр наадаһан Чингис ГУРУЕВАЙ үүргэ, оюун бэлиг аргагүй ехэ юм. Баян хүнэй хэнтэг зангые уран гоёор харуулжа, ямаршье үе сагта баян хүн гээшэ баяжаха тумаа обтожо, ондоо юумые хуу мартажа, зөөриин түлөө улаагаараа орожо, хүн шэнжэеэ мартадаг гэжэ шадамар бэрхээр харуулжа шадаһан габьяатай юм.
Мүнөөдэр, апрелиин 24-дэ, үдэшын 18.30-да Буряад Уласай арадай зүжэгшэн, Ородой Холбоото Уласай габьяата зүжэгшэн Чингис Гуруевай зохёохы үдэшэ үнгэрхэнь.
Бэлигтэй зүжэгшэн нэн түрүүн буряад зүжэгүүдтээ наадажа суурхаһан ааб даа. Тиибэшье дэлхэйн суута зохёолшодой зүжэгүүдтэ ялас гэмэ рольнуудые гүйсэдхэһэн: Оберон (Шекспир. “Сон в летнюю ночь”), сэр Эндрю Эгьючик (Шекспир. “Двенадцатая ночь”), Кохинур (Т. Габбе. “Оловянные кольца Альманзора”), Александр (М. Горький. “Последние”), Дицман (Ю. Бондарев. “Берег”), Мечеткин (А. Вампилов. “Прошлым летом в Чулимске”), Гаутама (Г. Гессе. “Сиддхартха”), Тайжа (Р. Акутагава. “Жизнь идиота”), Нүүнж сайд (С. Жаргалсайхан. “Хаан түүхэ”), Балдан (С. Эрдэнэ. “Хойто наһандаа уулзахабди”) гээд олон даа.
Чингис Гуруев нэн түрүүн Буряадаймнай эрхим артистнуудай нэгэн гэжэ арад зонойнгоо дунда сууда гаранхай, гадна ирагуу шүлэгүүдээрээ үнинэй мэдээжэ. Хэзээ сагһаа нааша “Хуһахан” дууниинь хаа-яагүй зэдэлһээр зандаа. Энэнь ирагуу найрагшын оюун бэлигые алишье талаһаань гэршэлнэ. Үнгэрһэн жэлдэ шэнэ номтойнь уншагшадаа танилсуулаа һэмди. Зохёохы ажалайнь үдэшын үмэнэ Чингис Цыреновичтэй уулзажа хөөрэлдэбэбди.
- Чингис Цыренович, оюун бэлиг гээшэмнай саанаһаань, дээрэһээнь үгтэдэг гү, али нэтэрүү оролдолгын хүсэн гү?
- Хэнэй хэн болохониинь, ямар угтай хэнэйдэ, ямар сагта түрөөбши, ямар һургуулида һураабши, багшанаршни хэд байгааб, хэн яажа хүмүүжүүлээб гээд лэ, баһа өөрын хуби заяанһаа дулдыдадаг гэжэ һанадагби. Бэлигтэй зон тэнгэриһээ тэб гээд сэхэ буушадаг һаа, һайн байха һааб даа. Тиибэшье түрэхэһөө нюдэндөө галтай, шударгы бэрхэ үхибүүн гэжэ байха. Багаһаань юундэ дуратайб, шадабаритайб гэжэ адаглажа, үри үхибүүгээ зүбөөр хүмүүжүүлхэ, наһанайнь харгы замые залан шэглүүлхэ гээшэ ехэ удха шанартай. Тиигээд халима бэлигтэйшье һаа, үсэд нэтэрүүгээр ажаллажа, бэлигээ мүлеэгүй һаа, “тогтомол намаг” болохолши даа.
- Тобшохоноор зохёохы намтар тухайгаа хөөрыт.
- Хэбэд номхон Хэжэнгын Хөөрхэдэ Эсэгын дайнай дүүрэһэн жэлдэ түрөөб. Тэбхэр табин жэлэй саана Ленинградһаа ерэһээр, Хоца Намсараевай нэрэмжэтэ Ажалай Улаан Тугай орденто Буряадай гүрэнэй академическэ драмын театрта таһалгаряагүй хүдэлжэ, зуугаад рольнуудые гүйсэдхөөб. Шүлэгүүдэйнгээ хэдэн номуудые гаргуулааб. “Найдал” болон бэшэшье прозын номууд хэблэгдээ һэн. “Алдуу” гэжэ зүжэгни түрэл театрайм тайзан дээрэ табигдаа.
- Танай эгээл дуратайгаар наадаһан рольнуудтнай?
- Тиимэ дуратай, дурагүй гэжэ роль намда байгаагүй. Ехэ бага, урдахи хойтохи гэнгүй, найруулагшын дурадхаһан роль бүхэниие шадаха зэргээрээ гүйсэдхэжэ, хүсэд дүүрэнээр дүрэ шарайень, сэдьхэлэйнь байдалые харагшадтаа хүр- гэхые оролдооб. Хэды олон уран найруулагшадаар хүдэлөөбиб, хэнтэйншье үгэ хүүрээ ойлголсоод лэ байдаг һэм.
- Артистын ажал хүнгэн бэшэ гэжэ мэдээжэ. Ээлжээтэ театральна жэлээ дүүргээд лэ, гастрольнуудта ябаха саг болодог. Үргэн ехэ Буряадаараа, Ага, Усть-Ордагаар яһалал ябаа бэзэт даа. Үшөө хаагуур ябажа, түрэл соёл уралигаа харуулжа, олоной һайшаалда хүртөө һэмта?
- 1969-1976 онуудта Москвада, 1983 ондо Ленинградта, 1969 болон 1983 онуудта Хальмагай Элистада зүжэгүүдээ табяа һэмди. Хари гүрэнүүдээршье ябагдаа. Хүршэ Монголоо хэды дахин албан хэрэгээр ошогдоо һааб даа. Тиигэжэ хани барисаагаа ехэтэ үргэдхөө һэмди. Ганса зүжэгшэдөөр бэшэ, ирагуу найрагшадтай, уран зохёолшодтой мүнөөшье хани барисаагаа алдаагүйб, харин бүри үргэдэжэ байна. 1991 ондо баруулжаа айлшалжа, Польшын театральна ехэ хото Еленя-Гурада зүжэг наадаяа табяабди. 2004 ондо зүүлэжэ, Хитадай Нантун болон Шэнэхээндэ уран бэлигээ дэлгээбди.
- Уран зохёолдотнай бусая даа. Аяар 1975 ондо түрүүшынтнай ном “Харгы” гэһэн нэрэтэйгээр нара хараа бэлэй. Тэрэ гэһээр шүлэг дуунуудайшье, уран найруулгануудайшье номуудтнай олоор хэблэгдээ. Зай, һүүлэй үеынгөө зохёохы ажал тухай хөөрэжэ үгыт даа.
- Хүн түрэлтэн ямаршье үе сагта, ямаршье хаан түрын гү, али засаг зургаанай тогтоһон үедэ ажаһуухадаа, үе сагайнгаа үйлын ушараар өөһэдынгөө ажабайдалые үнгэргэдэг, гэбэшье алишье үедэ оюун ухаанай, гүн сэдьхэлэй хэлбэришэгүй баялиг хүмүүн түрэлтэн жэншэдгүй сахидаг. Энэ хадаа илангаяа уран зохёолдо элирхэйлэгдэдэг. Монгол уран зохёолшодоор харилсахадаа, гүн удхатай зохёолнуудые шүүмжэлэн уншахадаа, нэн түрүүн энэ уг удхые һанадагби. Сэдьхэлэйнгээ оёороор ойлгожо абаад лэ, һайнаар оршуулжа, буряад уншагшадтаа хүргэхые оролдоноб. Жэшээлхэдэ, минии оршуулһан Бальжимын Пүрэвдоржын “Даяаншын хашалан” ямар гүнзэгы удхатайб! Хүн гээшэ ямаршье зоболон, ядаралай урда нугараашье һаа - хухарангүй, ажабайдалай орёо харгыгаар үсэдөөр урагшаал тэгүүлнэ. Тиихэдээ хэды хардуулаа, гэмнүүлэгдээшье һаа, һэшхэлээ гээнгүй, сэдьхэлдээ урбангүй, ушарһан дабаануудые эрэлхэгээр дабана.
Теэд хатуу шэрүүн сагуудай үнгэржэ, амгалан тэнюун байдалай тогтоод байхада, ухаатай сэсэн, шадалтай шандааһатай хүн яагаад ажабайдалай гүн далайн оёорто шэнгэшэнэб? Энэ хүндүүлхэй асуудал эрид шангаар Ринчинэй Чойном “Гүлгэн”, “Хара сэсэг” туужанууд соогоо табина.
- Мүнөө та ямар зохёолнуудта анхаралаа хандуулжа, ямар асуудалнуудые табижа, юу түсэблэнэбта?
- Наһатай боложо, нарбаа сайшоод, тиигэжэ түсэблөөб, тиимэ түсэлтэйб гэхэнь хайшаа юм даа. Бүтэһэн дээрэнь хэлсүүжэмди.