759
Мэргэдэй хэрэм гэһэн түүхэтэ газарые хамгаалха тухай олониитын ажал ябуулагшадта улад зон олоор хандадаг болоо.
Ушар юуб гэхэдэ, Мэргэдэй хэрэм руу хүн зон үргэлжэ ябадаг болоо, илангаяа үлирһэнэй сэсэглэхэ үеэр үлүү олон болошоно. Байгаалиин үзэгдэл хаража, түрэл дайдатаяа танилсажа байһан ушар өөгшөөхөөр.
Үлирһэнэй сэсэглэхэ үе
Зүгөөр тиишэ ошоһон зон эхэ байгаалидаа гам хайрагүйгөөр хандана. Нобшо ноохой үлээнэ, үлирһэ хухална. Үнгэржэ ерэхэдээ, энэ хоморой модохонуудые үндэһөөрнь малтажа абаад ябашана. Энэ асуудалаар социальна холбоондо хөөрэлдөөн болоно, һанамжанууд зүбшэгдэнэ. Дарима Бальжирова һанаата боложо, иигэжэ бэшэнэ: “ Эдэ амаралтын үдэрнүүдтэ нэгэ доро зуугаад авто-унаанууд жэрылдэжэ харагдаа. Эльбэр Шэбээтые тойроод, хүн зон бэеэ заһана. Мэргэдэй хэрэм хадаа Тэмүүжэнэй түрүүшын байлдаанай газар гэжэ монголшуудай «Нюуса тобшо» соо бэшээтэй. Мүнөө эндэ хүн зон амардаг болошоод байна. Нобшо хаядаг хайрсагууд архиин хооһон шэлээр дүүрэнхэй. Иимэ олон зоной аяг ааша абрикосово шугы даанагүй”.
Соёлма Сандакдоржиевагай тэмдэглэһээр, “их хориг” гэжэ ойлгосо бии. Манай уласта нангин шүтөөнэй, эзэдтэй газарнууд байна. Хорилто табиха шухала.
Мэргэдэй хэрэмые хамгаалха асуудалаар һаяын сагта дүхэриг шэрээ үнгэргэхэ тухай дурадхал оруулагдаба. Мүн Буряад Уласай Толгойлогшын дэргэдэ байгуулагдаһан Аяншалгын соведэй майн 28-да үнгэрхэ ээлжээтэ зүблөөн дээрэ энэ асуудал хараалха тухай хэлсэгдэбэ.
Вера Шведка, Дина Пурбуева гэгшэд оршон тойронхи байгаалияа аршалан сэбэрлэхэ зорилготойгоор аяншалгануудые эмхидхэнэ. Тэдэн иимэ нангин шүтөөнэй болон түүхэтэ газарнуудаар ябагаар аяншалха үедөө бог шоройһоо сүлөөлдэг заншалтай юм.
Михаил Бабинцевай гэрэл зураг
Автор: Цырегма САМПИЛОВА
