​Фейсбук соохи фейкнүүд бэшэ

Хорбоо дэлхэйн холбоо улам бэхижэһээр гээд, хүн бүхэмнай өөр дээрээ мэдэрнэ. Илангаяа Интернет сүлжээнэй ашаар иимэ мэдэрэмжэ бүри эли болоо.

Улас түрын мэдээжэ ажал ябуулагшад, сэтгүүлшэд, тамиршад, юрыншье зон сонин мэдээнүүдээ социальна холбоонуудта үргэлжэ ниитэлүүлдэг болонхой. Хэрбэеэ тэдэнэй нэгэ хубинь хэһэн ажаябуулгаяа, амжалтануудаа олондо дуулгаха гэһэн зорилго урдаа баридаг һаань, заримашуул бэеэ журамтай болгохын, хубиингаа жаргалтай хубаалдахын тулада социальна холбоонуудта һууна. Теэдшье хүн бүхэн хуудаһан дээрээ юушье бэшэхэ аргатай бшуу. Мүнөө Фейсбук холбооной эдэбхитэйшүүлэй постнуудые хараалаад туршая.

ХYН ТАЛАЯА ХҮСЭД ХАРУУЛНА

Буряад Уласай Толгойлогшоһоо эхилэебди. Алексей Цыденов ута унжагай мэдээнүүдые бэшэдэггүй байна. Тобшохонооршье һаа, сэгнэлтэ үгэһэн тодо мэдээнүүдые 2 мянгаһаа үлүүтэй нүхэдтөө дамжуулна. Жэшээнь, нэгыень дурдаһуу. «Стальвира Оршуш Европын чепионадта түрүүлээ!!! Урррааа!!!», - гээд, апрелиин 12-то дуулгана. Зүгөөр хоёр үдэр болоод, нэгэ иимэ пост тунхаглаба. Тэрэнь бусадһаа илгарна. Орой һүни бэшээ ха:

• -Хүндэтэ нютагаархид, ажал хэрэг тухайгаа үнинэй бэшээгүйб. Москва ба Владивосток яагаад ниидэдэг тухайгаа бэшэхэ гээ һэм... Ямар хүндөөр ажал ябуулагданаб даа. Мүнөө дары шиидхэбэри хүлеэһэн хэды олон бэрхэшээлнүүд бии гээшэб. Саг дуталдана, хуу шууд хэхэ хэрэгтэй болоно. Аймагуудаар ябажа үрдинэгүйб. Эдэ мэтые бэшэхэ гэһэн аад... Үгы, болихом. Хайрлуулхаяа һанаһан шэнги, али бэеэ үмөөрһэн мэтэ байна. Юрэ хүдэлхэл хэрэгтэй. ВДВ-гэй уряа үгэ мэтэ: «Манһаа бэшэ хэншье хэхэгүй!».
• Үглөөдэр, үгы, мүнөөдэр - гарагай хоёр! Бидэнэй түлөө хэншье хэхэгүй! Өөһэдөөл хэхэбди!
• P.S. Ехэ һүрөөтэйгөөр бэшэбэ гээшэ гүб. Юрэл бэеэ һула табингүй – хүдэлэе!

Буряадай Толгойлогшын хуудаһан дээрээ иигэжэ сэдьхэлээ нээн бэшэһэниие олониитэ анхаралгүй орхёогүй. Танай зэргэ хүнүүд иигэжэ һанаһанаа бэшэдэггүй гэжэ зүбшөөһэн удхатай үгэнүүдые пост доронь уншанабди.

Улаан-Үдын мэрэй уялгануудые дүүргэгшэ Игорь Шутенков мүн лэ хүн талаяа нээһэн пост ниитэлүүлдэг байна. 

Инаг хайратаяа яагаад уулзаһанаа иигэжэ дурсаа: «33 жэлэй саана. Карл Марксын гудамжа. Зунай үдэшэ. Холохоно бэшэ ажаһуудаг нүхэртэеэ ябааб. Түхэреэн толбонуудтай плати үмдэнхэй гэзэгэеэ һанжуулһан тоомгүйхэн басаган урдаһаамнай ябаба. Бэеэ барингүй асуубаб:

• -Басаган, хайшаа ябаа?
• -Хүгшэн эжыдээ.
• -Пирожки абаашана?

Бултадаа энеэлдэшэбэбди, хөөрэлдэбэбди... хүн бүхэмнай өөрынгөө харгыгаар саашаа ябаа, теэдшье хоёр һарын үнгэрһэнэй удаа автобус соо үнөөхи басагантаяа уулзашабаб. Дахинаа хөөрэлдэбэбди, би болохотой болохогүйшье газарта шоглоод үзэбэб. Тэрэшэлэн – дуран, түрэ найр, хоёр хөөрхэн басагад. Наташа, Гэгээн Валентинэй гэрэлтэ үдэрөөр амаршалнаб! Аза жаргал, хайра дура түхөөһэнэйш түлөө һайниие хүргэнэб! 33 жэлэй туршада өөр дээрээ шинии энэрхы халамжамэдэрнэб.

Ты разольёшься морем,
Я опрокинусь небом,
На горизонте синем
Встретимся на века.
Буду в тебе отражаться,
Будем с тобой целоваться,
И поплывут между нами
Лодки и облака.
(Н. Нимбуев)»

Үдэр бүри уладай урда тоосоо хэһэн мэдээнүүдээ тунхаглахаһаа гадуурдотор байдалаа нээн, хубиингаа жаргалаар хубаалдадаг Алексей Цыденов Игорь Шутенков хоёр Фейсбук холбооной ашаар улам дүтэшье, ойлгосотойшье болоодхино.

АЯНАЙ ЗАМҺАА

Буряадай Толгойлогшын хажуудахи пресс-секретарь Алексей Фишев гол түлэб албанайнгаа хэрэгтэ хабаатай мэдээсэлнүүдые хуудаһандаа ниитэлүүлнэ. Тиихэдэнь урдахи Толгойлогшын дэргэдэ үргэлжэ ябаһан Александр Дружинин даргаяа дахан, Москва зөөбэшье, Англи ябашахоор бэлэн ха: «Лондоной түбтэ Сокольнигуудһаа дутахагүй сэдьхэл дулаасуулһан парк нюдэндэ уринаар харагдана. Өөрынгөө квартира эндэхитэй һэлгэхэм гээшэ гү... ».

Удангүй тэрэ Тауэрай хүүргэ хойноо харуулһан гэрэл зурагаа олондо дурадхаад: «Һанаашадам хүрэмэ томо бэшэл», - гэжэ доронь тэмдэглэбэ. Александр Леонидович наһанайнгаа амаралтада гаража, сүлөө ороод, Лондон руу аянда гараха аргатай болоо ха юм.

Тиихэдэнь ирагуу найрагша Андрей Мухраевай наһанайнгаа амаралтада гаратар үшөө үдышье һаа, баһал Лондон руу зүг бариһаниинь гайхалтай бэшэ. Эгээл тэндэһээ тон олон гэрэл зурагуудые ниитэлүүлхэдээ, иигэжэ тэмдэглээ: «Лондон – мантан томо, этигэмээр бэшэ һайхан хото». Наһанайнгаа ханитаяа хамта хоёр үхибүүдээ дахуулаад, аяар һарын туршада Европын ехэ гүрэнүүдээр Андрей ябаад ерээ. 

Автор:
Описание:

Буудал бүхэнөө Фейсбук хуудаһандаа мэдүүлжэ байгаа. Франци, Германи, Шотланди, Польшо хүрэжэ, иишээ бэшэ хэзээдэшье ерэхэгүйб гэжэ шаналал гашуудалаар халиһан уянгата мүрнүүдые бэшээ.

Теэдшье аян замай гэрэл зурагууд, тэмдэглэлнүүд социальна холбоондо элбэгээр дэлгэгдээтэй байдаг. Зүгөөр шуяатай шааяатай мэдээжэ сэтгүүлшэн Батодалай Багдаев лэ сэхэ эфиртэ Таиландһаа, Вьетнамһаа гаража, олоной һонирхол татаа гэхээр. Багдаевые хараад, тиишээ өөрөө ошоод ерэһэн шэнги байгаа.

БЭЕЫН ЭЛҮҮРЫЕ САХИГШАД

Ажал хэрэгээ, аян замаа ниитэлүүлхэһээ гадна бэеынгээ элүүрые, спортын талаар туйлалтануудые Фейсбук хуудаһандаа үргэлжэ бэшэжэ байдаг зон бии. Тэдэнэй дундаһаа Михаил Гергенов онсо илгарна. 

Олониитэдэ мэдээжэ Арадай Хуралай һунгамал хэды зайда гүйгөөбиб гэжэ ходо мэдээсэжэ байдаг. Жэшээнь, Улаан-Үдын Соведүүдэй талмайһаа Зүүн эрье болотор зайе хэды сагай туршада гаталаабиб гэжэ дүнгүүдээрээ танилсуулдаг. Үбэлэй сагта сана углаадшье гүйжэ байһан гэрэл зурагуудаа дэлгээдэг заншалтай. Тиихэдэнь заримашуул Гергеновые дэмжэдэгшье, шоо үзэдэгшье. Хараагаад абадаг харагшадшье дайралдана. Тэрээндэ тамиршан анхаралаа балай хандуулдаггүй. Олониитые бэеын элүүрые сахихыень, спортоор бэеэ һорихыень өөрынгөө жэшээ дээрэ харуулан, уряална бшуу.

Сумо-барилдаанда бэеэ сүм зорюулһан Анатолий Михаханов Буряадаа бусаһаар лэ, турахын тулада хэмжээнүүдые абажа эхилэнхэй. Энээн тухай баһал хубиингаа хуудаһанда үргэлжэ бэшэнэ. Жэшээнь, майн 8-да иигэжэ дуулгаба: «Барилдажа байхадаа, тон хүндэ шэгнүүрни 253 килограмм байгаа. 3-4 һарын туршада 58 килограмм хаяаб. Хүдэлсэмни ехэ болоо, үглөөгүүр гүйнэб, фитнес зал руу харгылнаб. 4-5 дахин эдеэлнэб, турахын тулада ямаршье эм уунагүйб. Гол түлэб ехэ хүсэл, тэсэбэри хэрэгтэй. 193 сантиметр үндэртэй намда 205 килограмм болотор турабални, һайн байгаа. Саашадаа хүндэшэг байха. Хүдэлхэл, хүдэлхэл хэрэгтэй... 

Гэрэл зураг дээрэ: 2018 оной сентябрь һарада барилдахаяа болиходомни оёһон костюм. Бага болгоожо байнабди».

Анатолий Михахановые Япон руу ябуулһан Зоригто Саханов хуудаһан дээрээ Америкэдэ бэеэ һорижо байһан Дари басаганайнгаа туйлалтануудые ходо бэшэжэ байдаг. Гадна өөрөө яагаад бэеэ һорижо байһанаа буулгадаг заншалтай юм.

Майн 18-да хэдэн селфи шэдээ. Теэд доронь иигэжэ дуулгаа: «Сколково. Фитнес. Теннис. Гольф-поле».

Үнгэрэгшэ апрель һарада «Буряад үнэн» Хэблэлэй байшанай захиралай орлогшо Норжима Цыбикова урда нэрлэгшэдэй жэшээ халан абажа, үглөө бүри бэеынгээ шалаа гарган, гүйжэ эхилээ. Тиихэ зуураа оршон байгаалияа бог шоройһоо сүлөөлжэ үрдиһэн байна. Энээн тухайгаа хубиингаа хуудаһанда үргэлжэ дуулгажа байгаа. Апрелиин 18-да иигэжэ бэшэбэ: «Нугаhад ниидэжэ ерээ. Үглөөнһөө манай нуурта абяа гарана. Бидэ гүйлдэнэбди! Тоосоо хэнэб, журамтай болгоно».