​Аза тудабал, авто-унаа шүүхэт!

Июниин 22-то Түгнын түб дасандаГанжуур хуралай удаа 108 бурхадта зорюулhан наадам эхилхэ юм.

Энэ найрта оролсохо дуратайшуул апрелиин 19-һөө наймаанда табигдаһан билет худалдан абаха болоно. Аза талаан тудабал, 2005 оной Toyota Camry бэлэгтэ хүртэжэ болохот гээд, дасанай шэрээтэ Вандан лама дуулгаба.

Тиигэжэ Мухар-Шэбэр аймагай нютаг һууринуудай коллективүүд зохёохы шадабарияа харуулха, Түгнын «Даши Чойнхорлинг» дасан тухай эссе хабаадагшад буряад, ород хэлэнүүд дээрэ бэшэжэ урилдаха, арадуудай заншалта хубсаһанай харалган болохо.

Саашадаа энэ наадам заншалта боложо, хоёр жэлэй нэгэ удаа үнгэргэгдэжэ байха гээд, эмхидхэлэй хороон мэдээсэнэ.